بۇگىنگى تاڭدا ۋنيۆەرسيتەتتە جۋرناليستيكا ماماندىعى بويىنشا 100-گە جۋىق ستۋدەنت ءتالىم الۋدا. تۇركى الەمىنىڭ رۋحاني استاناسى سانالاتىن تۇركىستان شاھارىن تۇلەتۋدە اقپاراتتىق سالانىڭ الار ورنى ەرەكشە ەكەنى داۋسىز. حالىقارالىق ۋنيۆەرسيتەتتىڭ رەكتورى بولاتبەك ابدراسيلوۆ ساپالى كادرلاردى دايارلاۋ ىسىندەگى وڭ وزگەرىستەردىڭ ورىن الىپ جاتقانىن ايتا كەلە, وسى مەموراندۋم اياسىندا جەمىستى جۇمىستاردىڭ اتقارىلاتىنىنا سەنىم ءبىلدىردى. «تۇركىستاننىڭ تۇلەپ, تۇرلەنە تۇسۋىندە بۇقارالىق اقپارات قۇرالدارى ايرىقشا ماڭىزعا يە, سەبەبى شاھارداعى وڭ وزگەرىستەر جايلى جاعىمدى جاڭالىقتاردى ەلمەن ءبىرىنشى كەزەكتە جۋرناليستەر بولىسەدى.
سوندىقتان ستۋدەنتتەرىمىز ءۇشىن تاجىريبە الماسىپ, بىلىكتى كادر رەتىندە قالىپتاسۋى ءۇشىن بارىنشا اتسالىسۋىمىز قاجەت.
ء«بىلىم» تۋرالى زاڭعا ەنگىزىلگەن وزگەرىستەرگە سايكەس, تەوريالىق ساباقتاردان گورى پراكتيكاعا باسىمدىق بەرىپ, ستۋدەنتتەردىڭ ءتۇرلى اقپارات قۇرالدارىندا تاعىلىمدامادان وتۋىنە جاعداي جاسالاتىن بولادى. وسى تۇرعىدا قازاقستان جۋرناليستەر وداعىنىڭ وبلىستىق فيليالىمەن ارادا تۇزىلگەن مەموراندۋمعا ارتار ءۇمىتىمىز مول», - دەپ وي ءبولىستى ۋنيۆەرسيتەتتىڭ رەكتورى ب.ابدراسيلوۆ.
قازاقستان جۋرناليستەر وداعى تۇركىستان وبلىستىق فيليالىنىڭ توراعاسى عالىمجان ەلشىبايدىڭ ايتۋىنشا, ەكىجاقتى كەلىسىمنىڭ اياسىندا الداعى ۋاقىتتا جاستاردىڭ شىعارماشىلىعىن شىڭداۋ ماقساتىندا شەبەرلىك سىنىپتارى, ترەنينگتەر, فورۋمدار مەن باسقا دا ءىس-شارالار ۇيىمداستىرىلادى. ستۋدەنتتەردىڭ ەلدەگى ەڭ بەدەلدى اقپارات قۇرالدارىندا پراكتيكادان وتۋىنە, جاستار تاراپىنان ۇسىنىلعان مەدياجوبالاردى جۇزەگە اسىرۋعا جۋرناليستەر وداعى تاراپىنان بارىنشا قولداۋ كورسەتىلمەك. بۇگىنگى تاڭدا وقۋ ورداسىنداعى جۋرناليستيكا سالاسىن مەيلىنشە دامىتۋ باعىتىندا بىرقاتار جوبا جۇزەگە اسىرىلۋدا.
الداعى ۋاقىتتا ۋنيۆەرسيتەتتە راديو جانە تەلەستۋديا ءوز جۇمىسىن باستاماق. جاستار اۋديتورياسىنا ارنالعان «ياسساۋي.FM» راديوسىن اشۋ باعىتىندا دا قادامدار جاسالۋدا.
سونىمەن قاتار ۋنيۆەرسيتەت پەن «وڭتۇستىك» تەلەارناسىنىڭ اراسىندا دا ءوزارا ىنتىماقتاستىق جايلى مەموراندۋمعا قول قويىلدى. بۇل تۇركىستان وڭىرىندەگى تەلەديدار سالاسى ءۇشىن قاجەتتى بىلىكتى كادرلاردى دايارلاۋداعى ماڭىزدى قادام رەتىندە باعالانۋدا.
نۇرشات توكەن,
«Egemen Qazaqstan»
تۇركىستان
