بۇل ناۋرىز ايىنىڭ 1-ءى مەن 7-ءسى ارالاعىندا وتەتىن رەسپۋبليكالىق جارىسقا ىرىكتەۋ تۋرى. سپورتشىلاردىڭ قاراسى دا قالىڭ. ارقايسىسى وقۋ ورنىنىڭ ءۇمىتىن ارقالاپ كەلگەندەر. ءوڭىردىڭ 15 جالپى ءبىلىم بەرەتىن مەكتەپتەرى مەن 11 ورتا ارناۋلى وقۋ ورىندارىنىڭ سپورتشى ۇل-قىزدارى قاتىسقان باسەكە تارتىستى ءوتتى. ۇيىمداستىرۋشىلاردىڭ ايتۋىنشا, پرەزيدەنتتىك كوپسايىس جاستاردىڭ سپورتپەن شۇعىلدانۋىنا كوپ سەپتىگىن تيگىزەدى.
–بۇل جاستاردىڭ سپورتپەن اينالىسىپ, سالاۋاتتى ءومىر سالتىن ۇستانۋعا سەپتىگىن بەرەتىن جارىس. سەبەبى, مۇندا مەكتەپ وقۋشىلارىمەن بىرگە ستۋدەنت جاستار قاتىسىپ, ءوز باقتارىن سىناۋدا. ءبىز رەسپۋبليكالىق وليمپياداعا دايىنداۋ ورتالىعىمەن تىعىز قارىم-قاتىناستا جۇمىس ىستەۋدەمىز,–دەيدى وبلىستىق ءبىلىم باسقارماسى جانىنداعى دەنە تاربيەسى جانە وقۋ-ادىستەمەلىك ورتالىعىنىڭ ديرەكتورى امان ەرمۇحانوۆ.
قىسقى سپارتاكيادا سپورتتىڭ بىرنەشە تۇرىنەن وتكىزىلدى. الدىمەن, جارىسقا قاتىسۋشىلار كەرمەگە تارتىلۋ, گيمناستيكا, كوز مەرگەندىگى جانە كەۋدەنى جەردەن كوتەرۋ بويىنشا سايىستى. كەيىن ءجاسوسپىرىم ۇل-قىزدار شاڭعى جارىسى بويىنشا باقتارىن سىنادى. دەگەنمەن, باسەكە جوعارى.
وبلىس بىرىنشىلىگىنىڭ قورىتىندىسى بويىنشا جالپى ءبىلىم بەرەتىن مەكتەپتەر اراسىندا العاشقى ورىن ستەپنوگورسك قالاسىنا بۇيىردى. ال, ورتا ارناۋلى وقۋ ورىندارىنىڭ ىشىندە ۇزدىك شىققان ششۋچينسك جوعارى پەداگوگيكالىق كوللەدجى بولدى. وبلىس بىرىنشىلىگىندە ىرىكتەلىپ شىققان كوماندا ەندى رەسپۋبليكالىق دەڭگەيدە ءوڭىر نامىسىن قورعايتىن بولادى.
بايقال ءبايادىل,
«Egemen Qazaqstan»
اقمولا وبلىسى
