استانا قالاسىنىڭ اكىمى باقىت سۇلتانوۆ حالىققا ەسەپ بەرۋ كەزىندە قالادا ەنگىزىلىپ جاتقان جاڭا تەxنولوگيالار تۋرالى ايتىپ بەردى.
«يننوۆاتسيالاردى ەنگىزۋ – بۇل تەحنولوگيالار اراسىنداعى جارىس ەمەس. بۇل – باسەكەلى كۇرەستىڭ قۋاتتى قۇرالى. يننوۆاتسيانىڭ ەرەكشەلىگى دە وسىندا. ەلوردادا «اقىلدى قالانىڭ» زاماناۋي تسيفرلىق تەحنولوگيالارى ەنگىزىلۋدە. بۇل – ۇلكەن دەرەكتەردى جيناۋ جانە تالداۋ جۇيەسى, «سەرگەك» بەينە-باقىلاۋ جۇيەسى, Smart ءبىلىم بەرۋ, Smart مەديتسينا, ەلەكتروندى پيك جوبالارى. بۇل – كوممۋنالدىق-تۇرعىن ءۇي سالاسىن تسيفرلاندىرۋ», – دەدى باقىت سۇلتانوۆ.
ونىڭ ايتۋىنشا, بيىل قالادا «اقىلدى جارىقتاندىرۋ» جوباسى اياسىندا 31 مىڭ شام اۋىستىرىلادى. بۇل تەحنولوگيا قۇرىلعىلاردى قوسۋدى, دەرەكتەردى جيناۋدى جانە اناليتيكالىق اقپاراتتى الۋدى قامتاماسىز ەتۋگە, شىعىنداردى قىسقارتۋعا جانە جۇمىس تيىمدىلىگىن ارتتىرۋعا مۇمكىندىك بەرەدى. ءىسىن جاڭا باستاعان كاسىپكەرلەر قولايلى يننوۆاتسيالىق ورتا قۇرۋدى كوزدەيدى.
«اعىمداعى جىلدىڭ ءساۋىر ايىندا كاسىپكەرلەر مەن يننوۆاتورلاردى بىرىكتىرەتىن قالالىق يننوۆاتسيالىق الاڭدى اشۋدى جوسپارلاپ وتىرمىز. بۇل تمد-دا «Seedstars» باسقاراتىن العاشقى كوۆوركينگ-ورتالىق بولادى, ولاردىڭ جەلىسىنە الەمنىڭ ءار ءتۇرلى ەلدەرىنەن 70 مىڭنان استام ستارتاپشى, كاسىپكەرلەر مەن ينۆەستورلار كىرەدى. جوبا «Seedstars» حالىقارالىق بيزنەس اكسەلەراتورىمەن بىرلەسىپ ىسكە اسىرىلادى», - دەدى ب.سۇلتانوۆ.
سونىمەن قاتار وسى جىلى ەكسپو پاۆيلوندارىنىڭ بىرىندە اكىمدىك "IDEA Park" ۇزدىك شەشىمدەر كەڭىستىگىن اشادى. وندا استانادا اقىلدى قالا سالاسىندا قولدانۋعا بولاتىن پەرسپەكتيۆالى تەحنولوگيالار: ۆيرتۋالدى شىندىق, زاتتار ينتەرنەتى, smart city تەحنولوگيالارى, روبوتتار جانە باسقا ترەندتىك تەحنولوگيالار ۇسىنىلادى.
