2019 جىلدىڭ 19 اقپانىندا ساعات 03.40 شاماسىندا قىزىلوردا قالالىق پوليتسيا باسقارماسىنىڭ جەدەل باسقارۋ ورتالىعىنا قالا تۇرعىنىنان قىزى 7-سىنىپ وقۋشىسىنىڭ ۇيىنەن اشۋلانىپ شىعىپ كەتىپ, قايتا ورالماعانى جايلى حابارلاما تۇسەدى.
تەكسەرۋ بارىسىندا اناسى قىزىنا ىدىس-اياقتى جۋماعانى ءۇشىن ۇرىسقانى بەلگىلى بولدى.
ءجاسوسىپىرىمدى ىزدەۋ جۇمىستارىنا يۋۆەنالدى پوليتسيا, ءپاترۋلدى پوليتسيا ناريادتارى جۇمىلدىرىلىپ, كوپقاباتتى ۇيلەردىڭ وجىرەلەرى مەن شاتىرلارى, اۋلالارى, قۇرىلىس ءجۇرىپ جاتقان وبەكتىلەر, مەكەمەلەردىڭ اۋلالارى ارالانىپ, تۇرعىنداردان سۇراستىرۋ جۇمىستارى جۇرگىزىلدى.
جەدەل-ىزدەستىرۋ جۇمىستارىنىڭ ناتيجەسىندە 05:20 شاماسىندا تيتوۆ قىستاعىنىڭ تۇرعىنىنان تۇسكەن حابارلامادان سوڭ قىز «ەسكى» بازار اۋماعىنان تابىلدى. ءتارتىپ ساقشىلارىمەن جوعالعان ءجاسوسپىرىم پوليتسياعا جەتكىزىلىپ, اتا-اناسىنا امان-ەسەن قولحاتپەن تاپسىرىلدى.
ايتا كەتەرلىك جايت, سوڭعى ۋاقىتتاردا كامەلەتكە تولماعانداردىڭ اتا-اناسىمەن رەنجىسىپ, ۇيدەن كەتىپ قالۋ دەرەگى ءجيى ورىن الۋدا.
ماسەلەن, 14 اقپاندا تاسبوگەت كەنتىندە كامەلەتكە تولماعان كوللەدجدىڭ 1- كۋرس ستۋدەنتى ساباققا كەتىپ, ۇيىنە قايتا ورالماعان.
تەكسەرۋ بارىسىندا تۋىسقان اپاسىنىڭ تۋعان كۇن كەشىنەن كەش قايتقانى ءۇشىن اناسىنىڭ قىزىنا ۇرىسقانى انىقتالدى. ىزدەستىرۋ جۇمىستارى بارىسىندا كامەلەتكە تولماعان قىز سىنىپتاسىنىڭ ۇيىندە جۇرگەن جەرىنەن تابىلدى.
سونىمەن قاتار, 18 اقپاندا كوللەدجدىڭ تاعى ءبىر ستۋدەنتى ساباققا كەتكەننەن قايتا ورالماعان. اتالعان حابار-وشارسىز كەتۋ دەرەگى بويىنشا بارلىق جەكە قۇرام قۇلاقتاندىرىلىپ, ىزدەستىرۋ جۇمىستارى جۇرگىزىلدى. كۇشتەر مەن قۇرالداردى جان-جاقتى جۇمىلدىرىپ ىزدەستىرۋ شارالارىنىڭ ناتيجەسىندە ارادا 7 ساعات وتكەننەن سوڭ حابار-وشارسىز جوعالعان قىز سابالاق ساياجايىندا تابىلدى.
وبلىس بويىنشا 2019 جىلدىڭ 1 اي 19 كۇنىندە كامەلەتكە تولماعاندار اراسىندا حابار-وشارسىز كەتۋدىڭ وسىنداي 7 دەرەگى تىركەلىپ, ولاردىڭ بارلىعى اتا-انالارىنا امان – ەسەن تاپسىرىلعان.
وسىعان وراي, پوليتسيا قىزمەتكەرلەرى بالالارعا دەگەن باقىلاۋدى جانە جاۋاپكەرشىلىكتى كۇشەيتىپ, قاۋىپسىزدىگىن قامتاماسىز ەتۋ باعىتىنداعى شارالاردى ارتتىرۋ قاجەتتىگىن قاتاڭ ەسكەرتەدى.
