«مەديتسينا بويىنشا بىزدە ءتورت باسىمدىق بار: اۋرۋلاردان بولاتىن ءولىم-ءجىتىمدى ازايتۋ, ءتيىمدى الدىن الۋ مەن ەمدەۋ ماقساتىندا ينفراقۇرىلىمداردى قۇرۋ, كادرلارعا ارنالعان الەۋمەتتىك پاكەت جانە جابدىقتاۋ مەن يننوۆاتسيا» دەدى استانا قالاسىنىڭ اكىمى باقىت سۇلتانوۆ حالىققا ەسەپ بەرۋ كەزدەسۋىندە.
ونىڭ ايتۋىنشا, ەلوردادا قان اينالىمى جۇيەسى (-18%), ينفاركت (-9%), گيپەرتونيا (-8%), ونكولوگيا (-8%) بويىنشا كورسەتكىشتەر ايتارلىقتاي جاقساردى.
«بۇل ساندارمەن ونداعان مىڭ ناۋقاستىڭ ءومىرى بايلانىستى. ورتا ەسەپپەن ءولىم-ءجىتىم 10%-عا تومەندەدى» دەپ اتاپ ءوتتى قالا اكىمى.
استانانىڭ اۋرۋحانالارى مەن مەديتسينالىق ورتالىقتارى ەل بويىنشا كوپتىڭ كوڭىلىنەن شىعىپ ءجۇر. ەلوردالىق كلينيكانىڭ ءاربىر بەسىنشى ناۋقاسى ەلىمىزدىڭ ايماقتارىنان كەلەدى. «ۇيدەگى دارىگەر» بىرەگەي جوباسىن استانالىقتاردىڭ ماقتانىشى دەپ اتاۋعا بولادى. ونىڭ ەرەكشەلىگى – ىقشام ەمدەۋ امبۋلاتوريالارىنىڭ جەلىسىن قۇرۋ ءۇشىن تۇرعىن ۇيلەردىڭ ءبىرىنشى قاباتتارىن پايدالانۋ. ولار كەز كەلگەن تۇرعىن ءۇشىن قولجەتىمدى بولۋى ءتيىس.
«دارىگەرلەر دوكتريناسى ەمدەۋ ەمەس, الدىن الۋ جاعىنا قاراي جىلجىپ كەلەدى. سكرينينگ, گيپەردياگنوستيكا جانە ايەلدەرگە, اسىرەسە كوپبالالى ايەلدەرگە قامقورلىق جاساۋ ءوز جەمىسىن بەرەدى», دەدى سۇلتانوۆ.
