«حالىق سانىنىڭ ءوسۋىن ەسكەرە وتىرىپ, سوڭعى 3 جىلدا 12 جاڭا اۋرۋحانا مەن ەمحانا سالىندى. پرەزيدەنتتىڭ تاپسىرماسى بويىنشا جۇمىسقا جاڭا لەپ اكەلگەن ۋچاسكەلىك دارىگەرلەردىڭ جالاقىسى 20%-عا ارتتى. ياعني, 3,5 مىڭنان اسا دارىگەر مەن مەدبيكەنىڭ جالاقىسى كوتەرىلدى» دەدى باۋىرجان بايبەك.
اكىمنىڭ ايتۋىنشا, قالالىق مەديتسينالىق ۇيىمداردا ءالى دە شەشىمىن تاپپاعان تۇيتكىلدى ماسەلەلەر وتە كوپ. اتاپ ايتقاندا, سىبايلاس جەمقورلىق, جاريالىلىقتىڭ جوقتىعى, ءدارى تاعايىنداۋ, ونىڭ ەسەبىن جۇرگىزۋ, مەديتسينالىق قىزمەتتىڭ ساپاسىنا قاتىستى ساۋال كوپ.
«بىلتىر مەديتسينالىق مەكەمەلەردىڭ باسشىلارىنا قاتىستى 29 تارتىپتىك شارا قولدانىلدى. 12 باسشى قىزمەتىنەن قۋىلدى. ولاردىڭ ەكەۋى جاعىمسىز سەبەپتەرمەن كەتتى. قالادا دەنساۋلىق ساقتاۋ جۇيەسىن قالىپتاستىرۋ ماقساتىندا جول كارتاسى قابىلداندى» دەدى قالا اكىمى.
اكىم قالالىق دەنساۋلىق ساقتاۋ جۇيەسىن باقىلاۋ كەڭەسىنە مەكەمە باسشىلارى مەن باس دارىگەرلەر كىرمەيتىنىن ايتتى.
«قوعامدىق دەنساۋلىق باسقارماسىنىڭ باسشىسى, سىزگە ەسكەرتەمىن. وسى كارتانىڭ جۇزەگە اسۋىنا جاۋاپكەرشىلىكتى ءسىز ءوز موينىڭىزعا الاسىز» دەدى ول.
