«بارلىقتارىڭىزدى قۋانتقىم كەلەدى: ءبىز ەلىمىز بويىنشا جاڭا ۇيلەر سالىپ, پايدالانۋعا بەرۋ جونىنەن كوش باستاپ كەلەمىز. 2,3 ملن شارشى مەتر, 23 مىڭ پاتەر. «نۇرلى جەر» باعدارلاماسى بويىنشا دا ەلوردامىز قازاقستان بويىنشا كوش باسىندا كەلەدى. 110 مىڭ ش. م. –1 419 پاتەر. 15 تك سالىنىپ جاتىر. بۇل – شامامەن 4,5 مىڭ پاتەر, ونىڭ ىشىندە 3106 پاتەر وسى جىلى پايدالانۋعا بەرىلەدى», – دەدى استانا اكىمى باقىت سۇلتانوۆ حالىققا ەسەپ بەرۋ بارىسىندا.
سونىمەن قاتار, 228 اپاتتى ءۇي بۇزىلىپ, 3,5 مىڭعا جۋىق وتباسى جاڭا جايلى پاتەرلەرگە يە بولدى. «7-20-25» باعدارلاماسى بويىنشا 1 875 وتباسى 27 ملرد تەڭگەگە نەسيە الادى. باعدارلاما قولجەتىمدى بولۋى ءۇشىن جاڭا جىل قارساڭىندا اكىمدىك ءبىلىم بەرۋ, دەنساۋلىق ساقتاۋ جانە پوليتسيا قىزمەتكەرلەرىنە تۇرعىن ءۇي سەرتيفيكاتى تۇرىندە 1 ملن تەڭگەدەن 100 سۋبسيديا ءبولدى, بيىل تاعى 2 مىڭ سەرتيفيكات بەرىلەدى دەپ جوسپارلانۋدا.
«تۇرعىن ءۇي سەرتيفيكاتتارى مەنىڭ وزىمە قاتتى وتە ۇنايدى. بىراق ءبىر ماسەلە بار: ءبارى بىردەي تالاپتان وتە المايدى. ايتپەسە, 2 مىڭ سەرتيفيكات – كۇنىنە 5 سەرتيفيكات دەگەن ءسوز. بىراق بۇل شىن مانىندە شەشىمدى تالاپ ەتەتىن ماسەلە. جۇمىس ىستەيتىن بولامىز», – دەپ اتاپ ءوتتى ب.سۇلتانوۆ.
قالا اكىمى ۇلەستىك قۇرىلىسقا بايلانىستى ماسەلەلەر ونىڭ جەكە باقىلاۋىندا ەكەنىن ەرەكشە اتاپ ءوتتى.
ء«بىز ۆەدومستۆوارالىق كوميسسيا اياسىندا الدانعان ۇلەسكەرلەرمەن تۇراقتى كەزدەسۋلەر وتكىزەمىز. مەن ايتقانداي, قالاعانىمىزداي بۇل ماسەلەنى تەز ارادا بولماعانىمەن, شەشەمىز. قابىلدانعان شارالاردىڭ ارقاسىندا ءبىز پروبلەمالى نىسانداردىڭ سانىن 68-دەن 29-عا دەيىن قىسقارتتىق. بۇل – 10 344 ۇلەسكەر. ءبىز «جول كارتاسىن» ازىرلەدىك. سونىمەن, ءبىزدىڭ جوسپار 2022 جىلعا دەيىنگى مەرزىمدى قامتيدى. مەملەكەتتىك قاراجات ءبولىندى. ولار, بىردەن اتاپ وتەيىن, قايتارىمدى. جۇمىستار جۇرگىزىلۋدە. تابىستى ساتتەر كوپ. جۇمىستار دا كوپ. بىراق تاعى دا قايتالايمىن: بۇل – مەنىڭ جەكە باقىلاۋىمداعى ۇلەستىك ماسەلە», – دەدى سۇلتانوۆ.
بۇدان بولەك, ستۋدەنت جاستاردى تۇرعىن ۇيمەن قامتاماسىز ەتۋ ماسەلەسى دە شەشىلۋدە. قازىرگى ۋاقىتتا استانادا 90 مىڭعا جۋىق ستۋدەنت تۇرادى. 32 جاتاقحانا جۇمىس ىستەيدى, وندا 14 مىڭ ستۋدەنت تۇرادى. الايدا تاعى 11 مىڭ ستۋدەنت ورنالاستىرۋدى قاجەت ەتەدى. وسىعان بايلانىستى اكىمدىك جوعارى وقۋ ورىندارىنا قۇرىلىس ءۇشىن 15 جەر تەلىمىن ءبولدى.
كوللەدج ستۋدەنتتەرى ءۇشىن تۇرۋ ماسەلەسى جەرگىلىكتى بيۋدجەتتەن مەملەكەتتىك تاپسىرىس ارقىلى حوستەلدەرگە ورنالاستىرۋ ەسەبىنەن تولىق شەشىلدى. بۇل عيمارات قۇرىلىسىن ۇنەمدەۋگە جانە دايىن ينفراقۇرىلىمدى ءتيىمدى پايدالانۋعا مۇمكىندىك بەردى.
