وكم وپەراتورىنا كولىكتەردى اقشاعا جانە سەرتيفيكات بەرۋ باعدارلاماسى بويىنشا قابىلداۋعا بيىل 50 مىڭ كۆوتا ءبولدى. سونىڭ 25 مىڭى جەڭىلدىك سەرتيفيكاتى باعدارلاماسىنا بولىنسە, قالعان 25 مىڭى اقشالاي وتەماقى باعدارلاماسىنا قاراستىرىلىپ وتىر. سونىمەن قاتار جۇك كولىكتەرىنە بەرىلەتىن سەرتيفيكات قۇنى بيىل ۇلعايتىلدى. بىلتىر ونىڭ قۇنى 450-650 مىڭ تەڭگە بولسا, وسى جىلدان باستاپ ونىڭ كولەمى 550-دەن 750 مىڭ تەڭگەگە دەيىن كوتەرىلدى. ال جەڭىل اۆتوكولىك سەرتيفيكاتىنىڭ قۇنى باياعى 315 تەڭگە قالپىندا قالدى.
ەسكى كولىكتەردى قابىلداۋ باعدارلاماسى 20-شى اقپانىنان باستاپ جالعاسىن تابادى.
باعدارلاما تالابى بويىنشا جويۋعا تاپسىرىلاتىن كولىكتەر تولىق جيىنتىقتا قابىلدانادى. ەسكى تەحنيكانى وتكىزۋشىگە جەڭىلدىك سەرتيفيكاتى بەرىلەدى. وتاندىق اۆتووندىرۋشىدەن كولىك ساتىپ العان كەزدە سەرتيفيكات سوماسى كولىك باعاسىنان شەگەرىلىپ قالادى. جەڭىلدىك سەرتيفيكاتتىڭ قۇنى تاپسىرلاتىن كولىك قۇرالىنىڭ ساناتىنا بايلانىستى باعالانادى. باعدارلاما بويىنشا وتاندىق وندىرۋشىدەن كەز كەلگەن ساناتتاعى كولىك قۇرالىن سەرتيفيكات ارقىلى الۋعا بولادى. جانە دە اۆتوكولىك ساتىپ العاندا 2 سەرتيفيكاتتى بىرىكتىرۋ مۇمكىندىگى قاراستىرىلعان. جەڭىلدىك سەرتيفيكاتى اتاۋلى جانە ونى وزگەنىڭ اتىنا تىركەۋ ەكى رەتتەن ارتىق جۇرگىزىلمەيدى. سونداي-اق ونى قايتارىپ بەرۋگە نەمەسە قولما قول اقشاعا اۋىستىرىلمايدى. سەرتيفيكات تىركەلگەن كۇننەن باستاپ 12 ايعا جارامدى.
جەڭىلدىك سەرتيفيكات باعدارلاماسى بويىنشا قانداي كولىك ساتىپ الۋعا بولاتىندىعى تۋرالى مالىمەتتى اۆتووندىرۋشىلەردىڭ رەسمي سايتىنان («بيپەك اۆتو» www.bipek.kz, www.aziaavto.kz. www.sap.com.kz, www.hyundai-hta.kz, www.daewoobus.kz, www.kamazkamaz.kz) كورۋگە بولادى.
ەستەرىڭىزگە سالامىز, جەڭىلدىك سەرتيفيكاتى باعادارلاماسى قازاقستاندا 2017 جىلدىڭ 26 ماۋسىمىندا ىسكە قوسىلعان بولاتىن. وسى ارالىقتا قازاقستاندىقتار اتالعان باعدارلاما بويىنشا 20 939 كولىگىن سەرتيفيكاتقا الماستىردى. سونداي-اق, ساتىپ الۋ باعدارلاماسى بويىنشا 67 052 جەڭىل كولىك قابىلداندى. ەسكى كولىگەن تاپسىرعان قازاقستاندىقتارعا 10 ملرد 48 ملن تەڭگە كولەمىندە قاراجات اۋدارىلدى. قوس باعدارلامانىڭ قورىتىندىسى بويىنشا وكم وپەراتورى 88 مىڭعا جۋىق ەسكى كولىك قابىلدادى.
ايتا كەتۋ كەرەك, ەسكى كولىكتەردى جويۋعا قابىلداۋ باعدارلاماسى وتاندىق اۆتوپاركتى جاڭارتىپ, ەكولوگيالىق كولىك قۇرالدارىنىڭ ءوندىرىسىن ىنتالاندىرۋ جانە قايتا وڭدەۋ سالاسىن دامىتۋعا مۇمكىندىك بەرەدى.
