بۇگىنگى تاڭدا وڭىردە 112 مىڭنان استام زەينەتكەر بولسا, وبلىس ورتالىعى كوكشەتاۋ قالاسىندا 26 565 ارداگەر تۇرىپ جاتىر. ورتالىق ارقىلى قارت ادامداردىڭ ءومىر ءسۇرۋ ساپاسىن ارتتىپ, ولاردىڭ بوس ۋاقىتىن ءتيىمدى وتكىزۋگە جاعداي جاسالماق. سونداي-اق, مۇندا زەينەت جاسىنداعى ادامداردى سالاۋاتتى ءومىر سالتىن ۇستانۋعا, كومپيۋتەرلىك بىلىمدەرىن ارتتىرۋعا, قازاق ءتىلىن ۇيرەنۋگە, پسيحولوگيالىق, زاڭگەرلىك كومەك الۋعا مۇمكىندىك جاسالاتىن ارنايى كلۋبتار اشىلادى.
بۇگىنگى كۇنى وبلىستا ارداگەرلەردىڭ بوس ۋاقىت ءماندى وتكىزۋىنە باعىتتالعان 40-تان استام كلۋب جۇمىس ىستەيدى. بۇلاردىڭ قاتارىنداعى «رودنيك» مادەني ورتالىعىنىڭ, قالالىق ارداگەرلەر كەڭەسى جانىنان اشىلعان شاحمات-دويبى كلۋبىنىڭ, وتباسىلىق «التىن جاس» كلۋبىنىڭ, دوستىق ءۇيى جانىنداعى ەتنومادەني ورتالىقتاردىڭ جانە باسقا مۇددەلەر بويىنشا جۇمىس ىستەيتىن ۇيىرمەلەردىڭ بەلسەندى قىزمەتىن اتاپ وتۋگە بولادى.
بايقال ءبايادىل,
«ەگەمەن قازاقستان»
اقمولا وبلىسى
