اي باسىنان باستالعان ءىس-شارا بارىسىندا ءتارتىپ ساقشىلارى ءارتۇرلى قۇقىق بۇزۋشىلىققا قاتىستى 400-دەن استام ءجاسوسپىرىمدى ىشكى ىستەر بولىمدەرىنە جەتكىزگەن. بالالارىن تاربيەلەۋ جونىندەگى مىندەتتەرىن ورىنداماعانى ءۇشىن 10 اتا-انا, تۇنگى ۋاقىتتا كامەلەتكە تولماعانداردىڭ ويىن-ساۋىق ورىندارىندا بولۋىنا جول بەرگەن 14 ويىن-ساۋىق يەلەرى اكىمشىلىك جاۋاپكەرشىلىككە تارتىلدى.
سونداي-اق يۋۆەنالدى پوليتسيا قىزمەتكەرلەرى تۇنگى ۋاقىتتا ويىن-ساۋىق ورىندارىندا بولعان 20 ءجاسوسپىرىم جانە تۇندە زاڭدى وكىلىنسىز تۇرعىن ۇيدەن تىس جەرلەردە جۇرگەن 345 كامەلەتكە تولماعانداردى انىقتادى. قۇقىق بۇزۋشىلىققا بەيىم 45 ءجاسوسپىرىم جانە 43 قولايسىز وتباسى ەسەپكە الىنعان. جاسوسپىرىمدەر قىلمىسىن ازايتۋ جانە كامەلەتكە تولماعاندار اراسىندا قۇقىق بۇزۋشىلىقتاردى بولدىرماۋدىڭ الدىن الۋ ماقساتىندا, وبلىس اكىمىنىڭ باستاماسىمەن ءارى قولداۋىمەن مەكتەپتەردە بەينەكامەرالار پايدالانىلاتىن قاناتقاقتى جوبا قولعا الىندى. مىسالى, تۇركىستان قالاسىنداعى №23 ورتا مەكتەپ عيماراتىنا جانە اۋلاسىنا پوليتسيا دەپارتامەنتىنىڭ جەدەل باسقارۋ ورتالىعىمەن ينتەگراتسيالانعان 5 بەينەباقىلاۋ كامەراسى ورناتىلعان. قازىر ءتارتىپ ساقشىلارى بالالاردىڭ قاۋىپسىزدىگىن جانە مەكتەپ وقۋشىلارىنىڭ ورتاسىنداعى قانداي دا بولماسىن قۇقىق بۇزۋشىلىقتار ارەكەتىن باقىلاي الادى. مۇنداي بەينەباقىلاۋ كامەرالارىن بۇگىنگى تاڭدا 39 مىڭنان استام بالا ءبىلىم الاتىن تۇركىستان قالاسىنىڭ بارلىق مەكتەبىندە ورناتۋ جوسپارلانۋدا.
جاسوسپىرىمدەر اراسىندا قۇقىق بۇزۋشىلىقتىڭ الدىن الۋ جۇمىستارى ماقتاارال اۋدانىندا دا كۇشەيتىلۋدە. بۇل ورايدا اتا-انالارعا ارنالعان كونفەرەنتسيا وتكىزىلىپ, اۋدان اكىمى ب.اسانوۆ بالالار مەن جاسوسپىرىمدەر اراسىنداعى قۇقىق بۇزۋشىلىقتىڭ الدىن الۋ بويىنشا اتقارىلىپ جاتقان جۇمىستار تۋرالى باياندادى. «بۇگىنگى تاڭدا مەكتەپ جاسىنداعى بالالاردىڭ بوس ۋاقىتىن ءتيىمدى پايدالانۋ ماقساتىندا اۋداننىڭ بارلىق مەكتەبىندە «سەنىم جاشىكتەرى» ورناتىلدى. ءبىلىم بەرۋ مەكەمەلەرىندەگى اتا-انالار جينالىسىنىڭ كۇن تارتىبىنە «قيىن» بالالارمەن جۇمىستى قولعا الۋ جانە وقۋ جىلى بارىسىندا ولاردى وسى كاتەگوريادان شىعارۋ ماسەلەسى قويىلدى. ادىستەمەلىك كەڭەستەر بەرىلدى. بۇل كۇندەرى ءاربىر مەكتەپتەگى «قيىن» بالالاردى ەسەپكە الىپ, ولاردىڭ ءجۇرىس-تۇرىسى, مىنەز-قۇلقى, ساباق ۇلگەرىمىن باقىلاپ, دەر كەزىندە پەداگوگيكالىق-پسيحولوگيالىق كومەك بەرۋ ءۇشىن مەكتەپتەگى پسيحولوگ, تالىمگەرلەر مەن ديرەكتوردىڭ ورىنباسارلارى بەكىتىلىپ, ارنايى باعدارلاما بويىنشا جۇمىس جۇرگىزىلۋدە. بۇدان بولەك, اكىمشىلىك بەكىتكەن ارنايى كەستە بويىنشا ىشكى ساياسات, اۋداندىق ىشكى ىستەر ءبولىمى مەن اۋداندىق ءبىلىم ءبولىمى, باق وكىلدەرى جانە مەكتەپ مۇعالىمدەرىمەن بىرىگىپ, كەشكى مەزگىلدە رەيد جۇرگىزۋدە. بەيمەزگىل ۋاقىتتا جۇرگەندەردى انىقتاپ, ەسكەرتۋ جاساۋدا», دەدى اۋدان اكىمى. سونداي-اق كونفەرەنتسيا بارىسىندا جارىسسوزگە شىققاندار ءوز ۇسىنىستارىن ءبىلدىردى.
عالىمجان ەلشىباي,
«Egemen Qazaqstan»
تۇركىستان وبلىسى
