بريفينگتە وبلىستىق دەنساۋلىق ساقتاۋ باسقارماسى باستىعىنىڭ ورىنباسارى بولات ابىشەۆ جانە اقمولا وبلىسىنداعى «سق-فارماتسيا» سەرىكتەستىگىنىڭ ايماقتىق وكىلدىگىنىڭ باسشىسى روزا تىلەسپاەۆا مىناداي مالىمدەمە جاسادى.
– اقمولا وبلىسىندا 2018 جىلى 88 مىڭ ادام الەۋمەتتىك مەديتسينالىق ساقتاندىرۋ قورىنان 3,6 ميلليارد تەڭگەنىڭ تەگىن مەديتسينالىق ءدارى-دارمەكتەرىمەن قامتاماسىز ەتىلدى. ال, 2019 جىلى 5 ميلليارد تەڭگەگە 120 مىڭعا جۋىق ادامدى قامتاماسىز ەتۋ جوسپارلانىپ وتىر. تەگىن بەرىلەتىن دارىلەردىڭ بەلگىلى ءبىر ءتىزىمى جاسالعان. بۇل ءتىزىم قازاقستان رەسپۋبليكاسى دەنساۋلىق ساقتاۋ ءمينيسترىنىڭ 2017 جىلعى 29 تامىزداعى №666 بۇيرىعىمەن كورسەتىلگەن. سونداي-اق, سىرقاتتار تەگىن ءدارى-دارمەكتەردى تۇرعىلىقتى جەرى بويىنشا تىركەلگەن ەمحانادا بەلگىلەنگەن ءبىر ءدارىحانادان الۋعا بولادى.
2018 جىلدان باستاپ بارلىق ءدارى-دارمەكتەردى جەتكىزۋ قازاقستان رەسپۋبليكاسى دەنساۋلىق ساقتاۋ مينيسترلىگىمەن ورتالىقتاندىرىلعان. «سك-فارماتسيا» جشس ءدارى-دارمەكتەردى امبۋلاتوريالىق جەتكىزۋ شەڭبەرىندە بارلىق ءدارى-دارمەكتەردى ساتىپ الۋ جانە جەتكىزۋ بويىنشا بىرىڭعاي ديستريبيۋتور رەتىندە انىقتالدى. ولاردى قارجىلاندىرۋ الەۋمەتتىك مەديتسينالىق ساقتاندىرۋ قورى ەسەبىنەن جۇزەگە اسىرىلادى, – دەدى بولات قالقامان ۇلى ءوز مالىمدەمەسىندە.
– العاشقى ءدارى-دارمەكتەردى جەتكىزۋ اعىمداعى جىلدىڭ 28 قاڭتارىندا باستالدى. وبلىسقا 235 ميلليون تەڭگە كولەمىندە 177 ءدارى-دارمەكتىڭ ءتۇرى جەتكىزىلدى. كوكشەتاۋ قالاسىنا 105 ميلليون تەڭگە كولەمىندەگى ءدارى-دارمەك ءبولىندى. قازىرگى ۋاقىتتا جەتكىزىلمەگەن ءدارى-دارمەكتەردى قاڭتار ايىندا جانە اعىمداعى جىلدىڭ اقپان ايىنا جەتكىزۋ جۇزەگە اسىرىلۋدا, – دەدى ءوز حابارلاماسىندا روزا اقپاشقىزى.
سونىمەن قاتار سويلەۋشىلەر تەگىن ءدارى-دارمەكپەن قامتاماسىز ەتۋ ماسەلەلەرى بويىنشا بۇكىل قازاقستاندىق ناۋقاستار كەز-كەلگەن جەرگىلىكتى تەلەفوننان 1439 نومىرىنە تەگىن قوڭىراۋ شالا الاتىنىن جەتكىزدى.
بريفينگتى وتكىزۋشىلەر ءدارى-دارمەككە بايلانىستى قويىلعان سۇراقتارعا جاۋاپ بەرىپ, بايلانىس ورتالىعىنىڭ وپەراتورلارى كەپىلدىك بەرىلگەن تەگىن مەديتسينالىق كومەك شەڭبەرىندە ديسپانسەرلىك تىركەۋ جانە امبۋلاتوريالىق ەم الۋ ءۇشىن پاتسيەنتتەرگە تەگىن ۇسىنىلاتىن قاجەتتى دارىلىك زاتتاردى جەتكىزۋدە جوسپارلانعان مەرزىمدەرى تۋرالى اقپارات بەرەدى.
بايقال ءبايادىل,
«ەگەمەن قازاقستان»
اقمولا وبلىسى
