تاۋەلسىزدىك العان كەزدەن بەرى قازاقستان ايتۋلى جارىسقا ۇزدىكسىز قاتىسىپ كەلەدى. 13 مارتە ۇيىمداستىرىلعان الەم چەمپيوناتتارىندا وتانداستارىمىز 9 مارتە جەڭىس تۇعىرىنا كوتەرىلدى. تارقاتىپ ايتساق, 3 التىن, 2 كۇمىس جانە 4 قولانى قورجىنعا سالدىق. بارلىعى – 9 جۇلدە. ءبىزدىڭ شاڭعىشىلار اراسىنان ۆلاديمير سميرنوۆتىڭ شوقتىعى بيىك بولدى. ول 1993 جىلى شۆەتسيانىڭ فالۋن قالاسىندا قوس كۇمىس پەن ءبىر قولا مەدالدى يەلەنگەن ەدى. سميرنوۆ 10 شاقىرىمدىق كلاسسيكالىق جانە 10 شاقىرىمدىق ەركىن تاسىلدە مارە سىزىعىن ەكىنشى بولىپ قيىپ وتسە, 30 شاقىرىمدىق كلاسسيكالىق ادىستە ءۇشىنشى ورىنعا تابان تىرەدى.
1995 جىلى كانادانىڭ تاندەر-بەي قالاسىندا 3 التىن جانە 1 قولا مەدالدى ولجالاعان قازاقستان قۇراماسى جالپى كوماندالىق ەسەپتە ءتورتىنشى ساتىعا جايعاستى. الدىمىزدا تەك قىسقى سپورت تۇرلەرىنىڭ الپاۋىتتارى – رەسەي, نورۆەگيا جانە جاپونيا. بۇل جۇلدەلەردىڭ بارلىعىن ايگىلى شاڭعىشى ۆلاديمير سميرنوۆ جەڭىپ الدى.
داڭقتى ۆلاديمير سميرنوۆ ۇلكەن سپورتتان قول ۇزگەننەن كەيىن قازاقستاننىڭ شاڭعىشىلارى ۇزاق جىلدار بويى ەڭسە تىكتەي المادى. ءتۇرلى دودالاردا ءبىزدىڭ سپورتشىلار جۇلدە الىپ جۇرگەنىمەن, تورتكۇل دۇنيەنىڭ مىقتىلارى باس قوسقان جارىستا جەر سيپاپ قالدى. ماسەلەن, 1997-2011 جىلدار ارالىعىندا ۇيىمداستىرىلعان سەگىز بىردەي بايراقتى باسەكەدەن قۇرالاقان ورالدىق. تەك 2013 جىلعى الەم چەمپيوناتىندا تۋىمىز قايتا بيىكتە جەلبىرەدى. يتاليانىڭ ۆال-دي-فەممە قالاسىندا ۇيىمداستىرىلعان الەم چەمپيوناتىندا 50 شاقىرىمدىق ماسس-ستارتتا الەكسەي پولتورانين قولا مەدالدى موينىنا ىلسە, ءدال سول پولتورانين ءوزىنىڭ كوماندالىق ارىپتەسى نيكولاي چەبوتكومەن بىرگە 6ح1,5 شاقىرىمدىق ەركىن تاسىلدەگى كوماندالىق سپرينتتە دە ءۇشىنشى ورىندى ەنشىلەدى.
مىنە, سودان بەرى باقانداي التى جىل ءوتتى. 2015 جىلعى الەم چەمپيوناتى شۆەتسيانىڭ فالۋنىندا وتسە, 2017 جىلعى دودانى فينليانديانىڭ لاحتي قالاسى قابىلدادى. وسى جارىستىڭ ەكەۋىندە دە كوماندالىق ەسەپتە نورۆەگيا مەن گەرمانيا كوش باستادى. شۆەتسيادا ءۇشىنشى ورىنعا جارىس قوجايىندارى تابان تىرەسە, سۋومي ەلىندە رەسەيلىكتەر سول مەجەدەن كورىندى. وكىنىشكە قاراي, وسى جارىستاردىڭ ەكەۋىندە دە جەرلەستەرىمىزدىڭ جولى بولماي, ەلگە ەڭسەلەرى تۇسكەن كۇيدە ورالدى. ەندى تاياۋ كۇندەرى اۋستريانىڭ زەفەلد-ين-تيرول قالاسىندا باستالاتىن ءدۇبىرلى دودادا سول ولقىلىقتىڭ ورنى تولادى دەپ ۇمىتتەنەمىز.
عالىم سۇلەيمەن,
«Egemen Qazaqstan»
