قالىپتاسۋ كەزەڭى 4 مىڭجىلدىق ۋاقىتتى قامتيتىن تۇركى حالىقتارىنا ورتاق مۇرا توعىزقۇمالاق ويىنى سوڭعى جىلدارى تەك ازيادا عانا ەمەس, تورتكۇل دۇنيەدە قارقىندى دامىپ كەلەدى.
– 6 كۇنگە سوزىلاتىن جارىس ەلىمىزدەگى توعىزقۇمالاق ويىنىنىڭ دامىپ جاتقاندىعىنىڭ كورىنىسى. قازىرگى ۋاقىتتا الەمنىڭ 27 مەملەكەتى وسى سپورت تۇرىمەن اينالىسادى. اسىرەسە, تۇركى حالىقتارىندا ويىن جاقسى دامىعان. جاقىندا انتاليا قالاسىندا الەم بىرىنشىلىگى وتەدى. ءبىزدىڭ سپورتشىلار الەم الدىندا ەل نامىسىن اسقاقتاتادى دەگەن سەنىم باسىم,– دەيدى باس تورەشى باتىرحان ابىلبەكوۆ.
جارىس ەكى كەزەڭنەن تۇرادى. كوماندالار ەكى توپقا ءبولىنىپ ىرىكتەۋ ويىندارىن وينايدى. ءار توپتان سۋرىلىپ العا شىققان كوماندالار اقتىق مارەدە وي جارىستىراتىن بولادى. شىمكەنت قالاسىنان كەلگەن سالتانات ساپاربەكوۆا ۇلتتىق ويىننىڭ بۇل تۇرىمەن 6 جاسىنان باستاپ اينالىسادى ەكەن. سپورتشى قىز 25 جىلدا تولاعاي تابىستارىمەن قازاق ەلىنىڭ رۋحىن اسقاقتاتىپ جۇرگەن جان.
–توعىزقۇمالاققا قىزىعۋشىلىعىم اكەمنىڭ ارقاسىندا پايدا بولدى. قازىرگى ۋاقىتتا ءتۇرلى دارەجەدەگى سايىستاردا جۇلدەلى ورىنداردى يەلەنىپ ءجۇرمىن. وتكىزىلىپ جاتقان جارىستىڭ ءبىرىنشى اينالىمىندا جەڭىسكە جەتتىك. وسى قارقىندى سوڭىنا دەيىن ساقتاۋعا تىرىسامىز,–دەيدى توعىزقۇمالاقتان حالىقارالىق دارەجەدەگى سپورت شەبەرى سالتانات ساپاربەكوۆا.
رەسپۋبليكالىق چەمپيوناتتا حالىقارالىق دارەجەدەگى سپورت شەبەرلەرى كوپ. ءداستۇرلى تۇردە وتكىزىلەتىن جارىس جەڭىمپازدارى توعىزقۇمالاقتان قازاقستان رەسپۋبليكاسىنىڭ قۇراماسىنا ەنىپ, كەلەر جىلى ۇيىمداستىرىلاتىن حالىقارالىق دودالاردا ەل نامىسىن قورعايتىن بولادى.
بايقال ءبايادىل,
«ەگەمەن قازاقستان»
اقمولا وبلىسى
