كورمەگە قويىلعان شەبەرلىك جۇمىستارىنان قۇران كارىم اياتتارى, پايعامبارىمىز مۇحاممەدتەن (س.ع.س) جەتكەن سابىر, ۇيات, يمان تۋرالى حاديستەرى مەن شىعىس عۇلامالارىنىڭ مازمۇنعا باي رۋباياتتارى كورىنىس تاپقان. اتاپ ايتقاندا, مەحمەد ءوزچاي (تۇركيا), مۋحاممەد حاككي (تۇركيا), مۋحامماد اي زاحيد (پاكىستان), ماحفۋز زاننۋن ءال-ۋبايدي (يراك), سابەر سافاي (يران), ابدەسساماد ميحفاد (ماروككو) سىندى يسلام تاريحى, ونەرى مەن مادەنيەتىن عىلىمي-زەرتتەۋ ورتالىعىنىڭ (IRICACA) كاللليگرافيا بويىنشا ءار جىلداردا وتكەن حالىقارالىق ءداستۇرلى بايقاۋى جۇلدەگەرلەرىنىڭ ايشىقتى ەڭبەكتەرىن كورە الاسىز.
سالتاناتتى جيىندا ءسوز العان يسلام تاريحى, ونەرى مەن مادەنيەتىن عىلىمي-زەرتتەۋ ورتالىعىنىڭ (IRICACA) باس ديرەكتورى, دوكتور حاليت ەرەن يسلام مادەنيەتىن بيىككە شىعارۋ جولىندا تۇرىك حالىقتارىنىڭ دا ولشەۋسىز ۇلەس قوسىپ كەلە جاتقانىن ايتادى.
– يسلام ىنتىماقتاستىعى ۇيىمى اشىلعالى بەرى 56 مەملەكەتتىڭ مادەني ورتالىعى رەتىندە ىستانبۇلدا جۇمىس ىستەپ كەلەدى. قازاقستان دا 1991 جىلدان بەرى وسى ۇيىمنىڭ مۇشەسى. يسلام تاريحى, ونەرى مەن مادەنيەتىن عىلىمي-زەرتتەۋ ورتالىعى (IRICACA) جىلداعى داستۇرگە ساي بيىل كالليگرافتاردىڭ 11-ءشى جارىسىن ۇيىمداستىرماق. ودان بولەك الماتىلىق عالىمدارمەن بىرلەسىپ, «كاسپي-ارال ماڭايىنداعى مادەني مۇرا» اتتى جوبالاردى باستاۋ جوسپاردا بار, – دەگەن دوكتور حاليت ەرەن ورتالىقتا ساقتاۋلى قولجازبالار جيناعىن قولجازبالار جانە سيرەك كىتاپتار ۇلتتىق ورتالىعىنا تابىستادى.
يسلام كوركەم جازۋىنىڭ تانىمال حاتتاسى (كالليگراف) تۇركيالىق حاسان چەلەبي مەككە مەنە مەدينەدەگى مەشىتتەردى ارلەۋىمەن داڭقى شىققان تۇلعا. يسلام ارحيتەكتۋراسىنىڭ ەڭ ءبىر عاجايىپ تۋىندىسى سانالاتىن مەدينەدەگى ۇلكەن مەشىتتى بەزەندىرۋگە ول اتتاي 3 جىلىن ارناعان. ونىڭ ەستەتيكالىق كوركەمدىك فورماسىمەن دارالاناتىن بىرەگەي كومپوزيتسياسىنىڭ ۇزىندىعى 1400 مەترگە, ياعني ءبىر جارىم شاقىرىمعا پارا-پار بولىپ شىققان. 3 مىڭنان استام وقۋشى تاربيەلەگەن حاسان چەلەبي سىندى ايتۋلى ۇستازدىڭ شاكىرتى, قازاقستاندىق اراب كالليگرافياسىنىڭ مامانى اسىلبەك ورىنباساروۆ تا بۇگىنگى كورمەگە ارنايى شاقىرىلعان قوناقتاردىڭ ءبىرى.
– 2006 جىلى كاير قالاسىنداعى حاليل اعا كالليگرافيا ينستيتۋتىنا وقۋعا ءتۇستىم. قازاقستاننىڭ وبلىس ورتالىقتارىنداعى كوپتەگەن مەشىتتەردىڭ ارلەۋ جۇمىستارىنا قاتىسىپ, ءوز قولتاڭبامدى قالدىردىم. ءار كالليگرافتىڭ ءوز قولتاڭباسى, ءادىس-ءتاسىلى بولادى, – دەيدى ول. بۇگىندە اسىلبەكتىڭ جۇمىستارى قازاقستان عانا ەمەس, شۆەيتساريا, ۇلىبريتانيا, اراب امىرلىكتەرىندەگى جەكەلەگەن كوللەكتسيالاردا ساقتاۋلى. بۇگىنگە دەيىن استانا, الماتى, ماسكەۋ قالالارىندا جەكە شىعارماشىلىق كورمەسىن وتكىزگەن اسىلبەك 18 جىلدان بەرى كالليگرافيا سالاسىندا تاباندى ەڭبەك ەتىپ كەلەدى.
ايا ءومىرتاي,
«Egemen Qazaqstan»
