بۇل كومەديادا تەاتر اكتەرلەرى اسا ءبىر شەبەرلىكپەن قوعامدا بەلەڭ العان «مەنىكى جۇرە تۇرسىن, سەنىكى تۇرا تۇرسىن» دەگەن وزىمشىلدىكتى مىسقىلداپ, اياۋسىز ءاجۋالاپ كورسەتەدى.
وقيعا قاراقالپاق اۋىلدارىنىڭ بىرىندە ورىن الادى. ماتريزا مەن حالمۋراد ەسىمدى ەل اعالارى شاي ۇستىندە ءوسىرىپ وتىرعان ۇل مەن قىزىنا قۇدالىق تۋرالى سويلەسەدى. وسى ەكى ورتادا اۋزى دۋالى اۋىل اقساقالدارىنىڭ ارالاسۋىمەن قىزدىڭ قالىڭمالىنا قوس قۇدا كەلىسىمگە كەلەدى. كەنەتتەن داستارقان باسىندا ورىن العان ونبەيتىن داۋعا بولا ءوز ايتقاندارىنان قايتپاي, ءتاپ-ءتاتتى قانتتاي قۇدالىق بۇزىلادى.
كوركەم تۋىندىدا كۇلكىلى ديالوگتەر مەن ەبەدەيسىز ارەكەتتەر ارقىلى «تەك مەنىڭ ايتقانىم عانا بولادى» دەپ ءىس قىلاتىن جانداردىڭ ءوزىمشىل بەينەسى ايپاراداي اشىلادى. كومەديادا ۇلتتىق قۇندىلىقتار باستان-اياق اسا ءبىر سەزىمتالدىقپەن كورەرمەننىڭ كوڭىل تارازىسىنا تارتىلادى.
بولاشاق قۇدالار ماتريزا مەن حالمۋرادتىڭ قىرسىقتىعى مەن مەنمەندىگى سالدارىنان پەرزەنتتەرى قاراكوز بەن سافاردىڭ اراسىنداعى نازىك سەزىمگە سىزات تۇسەدى. الايدا, ءسوز بايلاسقان قوس عاشىقتىڭ پاك ماحابباتىن ۇلكەندەردىڭ وجار مىنەزدەرى توقتاتا المايدى. تاشكەنتتە ءبىلىم الىپ جاتقان ستۋدەنت جاستار ءتۇرلى كەدەرگىلەرگە قاراماستان نەكەلەسەدى. ۋاقىت كوشىمەن داۋكەس قۇدالاردىڭ مىنەزىندەگى قىڭىرلىق سول باياعىسىنشا جالعاسا بەرەدى. اراعا جىلدار سالىپ نەمەرەلەرى دۇنيەگە كەلەدى. ەندى ەكى اۋلەتتىڭ وتاعاسىلارى تاتۋلاسپاسا بولمايتىنداي جاعدايعا جەتەدى. قويىلىم سوڭىندا نەمەرەلەرىن بىرگە ەركەلەتكەن قۇدالار ۇرپاقتارىنىڭ باقىتى مەن بايلىعى ءۇشىن ءتوس قاعىستىرىپ تاتۋلاسادى. باستارىنان وتكەن كۇلكىلى جاعدايلاردان قوعام بولىپ ساباق الۋعا شاقىرادى.
قۇرىلعانىنا 15 جىلدان اسقان وزبەك تەاترىنىڭ شىعارماشىلىق ۇجىمى سايرامدىقتارعا كوتەرىڭكى كوڭىل كۇي سىيلاۋ ءۇشىن بارىن سالعانى كورىنىپ تۇر. اسىرەسە قوس قۇدا ءرولىن سومداعان سايديكاريم ماحمۋدوۆ پەن وديلجون تۋعونبوەۆتىڭ, اۋىل ابىزى جاندۋللانى اينىتپاي ويناعان ۋلۋگبەك ءنوسيروۆتىڭ اكتەرلىك شەبەرلىگىنە قول سوقپاي تۇرا المايمىز.
قويىلىم سوڭىندا تەاتر ديرەكتورى يكرام حوشيمجانوۆ كورەرمەن كوپ كوڭىل اۋدارا بەرمەيتىن ءبىر قىزىق جايتتى ايتىپ بەردى. «جالپى, تەاتر ۋاقىتىن كەشكە جوسپارلاۋىمىزدىڭ دا وزىندىك سىرى بار. سەبەبى كەلىندەر مەن ەنەلەر كۇنى بويى ۇيدە بىرگە تۇرادى. بىراق كۇيبەڭ شارۋامەن ءبىر-بىرىمەن كوپ اڭگىمەلەسە بەرمەيدى. ولاردىڭ ءتىسىنىڭ اعىن كورسەتىپ, ءتىل قاتىساتىن شاعى كەشكى اس ازىرلەيتىن ۋاقىت. ءدال سول ساتتە ۇيدە كەرىس بولماس ءۇشىن ەنەلەردى ونەر تاماشالاۋعا شاقىرۋ ارقىلى ەنە مەن كەلىننىڭ دەمالىسىن ءتيىمدى ۇيىمداستىرىپ وتىرمىز», دەيدى تەاتر ديرەكتورى.
ءبىر قاراعاندا سالت پەن داستۇرگە بەرىك قاراقالپاق, وزبەك حالىقتارىنىڭ باسىنداعى بۇل جايت ءبىزدىڭ قوعامعا دا جات ەمەس. سول باياعى ولەتۇعىن تاي مەن كوشەتۇعىن ساي ءۇشىن جەلكە تەرىسى قۇرىسىپ, مىڭجىلدىق قۇدالارىمەن كۇنارا داۋلاسىپ جۇرگەن اعايىن قازاقتا دا بار. بىراق وسى ادامزاتقا ورتاق ەسكىدەن كەلە جاتقان ەرسىلىكتىڭ جەڭىلىس تاباتىن, سوزگە توقتايتىن تۇسى دا جوق ەمەس. ول – ءسابيدىڭ ىڭگالاعانى, نەمەرەنىڭ شات كۇلكىسى. ءبىر سوزبەن ۇرپاقتار ساباقتاستىعى. كۇلكىگە قارىق ەتكەن كومەديانىڭ ءتۇيىنى دە وسى ەدى.
نۇرشات توكەن,
«Egemen Qazaqstan»
شىمكەنت
