وسى ورايدا اقتوبە وبلىستىق اكىمدىگىنىڭ باستاماسىمەن «اشىق ەسىك كۇندەرى» وتۋدە. قازىرگى كەزدە وڭىردە 1 ميلليونعا جۋىق, سونىڭ ىشىندە اقتوبە قالاسىندا بەس ءجۇز مىڭنان استام حالىق تۇرادى. ونىڭ بەلگىلى ءبىر بولىگىن تۇرمىسى تومەن وتباسىلار, كوپ بالالى انالار, ءارتۇرلى الەۋمەتتىك كومەكتى كەرەك ەتەتىن وزگە دە مۇقتاج جاندار قۇرايدى. جەرگىلىكتى وكىلەتتى ورگان جەتەكشىلەرىنىڭ ولاردىڭ ءبارىن بىردەي قابىلداپ, مۇڭ-مۇقتاجدارىن بولىسۋگە مۇمكىندىگى بولا بەرمەيتىنى بەلگىلى.
سوندىقتان وڭىردە تۇرعىندارعا جان-جاقتى قولداۋ كورسەتۋ ءۇشىن «اشىق ەسىك كۇندەرىن» وتكىزۋ تاجىريبەسى ەنگىزىلدى. سوعان سايكەس ارنايى جۇمىس توبى قۇرىلىپ, قالا جانە وبلىس اكىمدىكتەرىنىڭ جاۋاپتى ماماندارى مەن قىزمەتكەرلەرى جانە وبلىستىق باسقارمالار مەن دەپارتامەنتتەر باسشىلارى قابىلداۋلار جۇرگىزە باستادى. وسىنداي كەزدەسۋلەر كەزىندە كۇردەلى جاعدايعا تاپ بولعان وتباسىلاردىڭ جاي-كۇيى سارالانىپ, ءوتىنىش, تىلەكتەرى باقىلاۋعا الىنادى. ءارى شىن مانىندەگى كومەككە مۇقتاج وتباسىلارعا جەرگىلىكتى اتقارۋشى ورگاندار تاراپىنان ءتيىستى كومەك كورسەتۋ جولدارى بەلگىلەنەدى.
«اشىق ەسىك كۇندەرىنىڭ» العاشقى كەزەڭىندە وڭىردە كوپ بالالى انالاردى الاڭداتاتىن جايتتار از ەمەس ەكەندىگى انىقتالدى. سونىڭ ىشىندە ولار تۇراقتى باسپانا جانە الەۋمەتتىك جاردەماقىلار مەن تولەمدەر تولەۋ جونىندەگى جايتتاردى ورتاعا تاستادى. وسى ەكى ماسەلەگە قاتىستى تومەندەگىدەي تۇيىندەر جاسالدى. ارنايى جاسالعان كەلىسىمگە سايكەس, كوپ بالالى انالارعا پاتەر بەرۋدىڭ وزىندىك ءتارتىبى بار. بۇگىن تۇرعىن ءۇي الۋ مەن وعان يە بولۋ جونىندەگى زاڭدىلىقتار مەن نورماتيۆتەرگە سايكەس بارشاعا بىردەي تەگىن باسپانا ۇسىنىلمايدى. ايتسە دە تابىسى تومەن وتباسىلار جالعا بەرۋ باسپانالارعا قول جەتكىزە الادى. وڭىردەگى قۇرىلىس كومپانيالارى بيىل جالعا بەرىلەتىن قۇرىلىس كولەمىن وتكەن جىلمەن سالىستىرعاندا اجەپتاۋىر ءوسىردى. بۇل تۇرعىندار تىلەگىن تولىقتاي قاناعاتتاندىرا الادى.
كوپ بالالى وتباسىلارعا ارنالعان تۇرعىن ءۇي كەزەگى ساقتالماسا نەمەسە تىم ۇزاققا سوزىلىپ كەتسە ءارتۇرلى تۇسىنبەستىكتەر تۋى مۇمكىن. مىسالى, قارعالى اۋىلىنىڭ تۇرعىنى, «التىن القا» يەگەرى جانسايا كەرىمباەۆا تۇرعىن ءۇي كەزەگىنە جەتى جىل بۇرىن تۇرعان ەكەن. سودان بەرى ءالى كۇنگە كەزەگى قاي شامادا ەكەنىن بىلە الماي ءجۇر. مۇنداي ءوتىنىش ايتۋشىلار جەتكىلىكتى. بۇل جايتتىڭ ءوزى تۇرعىن ءۇي كەزەگىنە اشىقتىق پەن جاريالىلىق قاجەت ەكەنىن كورسەتەدى.
ال كوپ بالالى انالاردىڭ كوكەيىندە جۇرگەن ورتاق ماسەلە – جاردەماقىنىڭ جاي-كۇيىنە كەلسەك, ونىڭ شەشىمى جەرگىلىكتى اتقارۋشى ورگانداردىڭ قولىندا تۇرماعانى انىق. دەگەنمەن, بۇل ارادا كەيبىر دەرەكتەردى وقىرمان نازارىنا بەرە كەتكەننىڭ ارتىقشىلىعى جوق سەكىلدى. ايتالىق, اقتوبە قالالىق اكىمدىگىنىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ماقپال تۇرماعامبەتوۆانىڭ ايتۋىنشا, وبلىس ورتالىعىندا 7 مىڭنان استام كوپ بالالى انا تۇرادى. ولاردىڭ جارتىسىنان استامى – «التىن القا» جانە «كۇمىس القا» يەلەرى.
«تىركەلگەن كوپ بالالى انالاردىڭ بارلىعى دا مەملەكەتتەن 16160 تەڭگە كولەمىندە جاردەماقى الادى. ولار مۇنىڭ ازدىعىن العا تارتىپ, الداعى ۋاقىتتا ۇكىمەت تاراپىنان ونى ءوسىرۋ جولدارى بەلگىلەنسە, كوپ بالالى انالار ءۇشىن اجەپتاۋىر قارجىلىق قولداۋ بولا الاتىنىن العا تارتادى. سونىمەن بىرگە مۇنداي قادام بالا تۋدى ىنتالاندىرۋدىڭ ءبىر تۇتقاسى بولار ەدى», دەيدى كوپ بالالى انا شامسيا قۇراشەۆا.
«اشىق ەسىك كۇندەرى» كەزىندە انالاردىڭ ءبىر توبى اتاۋلى الەۋمەتتىك كومەك الۋعا قاتىستى ماسەلەلەردى دە العا تارتتى. سونداي-اق ستۋدەنتتەردىڭ شاكىرتاقىسى مەن مۇگەدەك بالالار ءۇشىن تولەنەتىن جاردەماقى تابىس كوزى رەتىندە ەسەپتەلمەسە ەكەن دەگەن وي-تىلەكتەرىن جەتكىزدى.
بۇگىن دە ۇلكەندى-كىشىلى قالالاردىڭ شەتكەرى ايماقتارى مەن ىرگەلەس ساياجاي اۋماقتارىندا تۇراتىن قاراپايىم تۇرعىنداردىڭ جاي-كۇيى وكىلەتتى ورگانداردىڭ ۇدايى نازارىندا بولۋى كەرەكتىگىن ءومىردىڭ ءوزى كورسەتتى. بۇل ماسەلەگە قاتىستى تۇيتكىلدەر اقتوبە اۋماعىندا دا كەزدەسىپ قالاتىنىنا «اشىق ەسىك كۇندەرى» كەزىندە كوز جەتكىزدىك. ايتالىق, اقتوبە قالاسىنىڭ ىرگەسىندەگى «گەولوگ-1» ساياجاي اۋماعىنان كەلگەن انالار ءبىلىم بەرۋ سالاسى جەتەكشىلەرىنە قىستىڭ كوزى قىراۋدا بالالارىن مەكتەپكە جەتكىزەتىن اۆتوبۋستىڭ توقتاپ قالعانىن قىنجىلا ايتىپ بەردى.
سونداي-اق ساياجاي ۋچاسكەلەرىنىڭ اراسىندا بوسىپ جۇرگەن قاڭعىباس يتتەر كوپ. تۇراقتى مەكەنجايى جوق ماسكۇنەم جاندار دا كوپ كەزدەسەدى. جۇمىستا جۇرگەن اتا-انالاردىڭ بالالارىن مەكتەپتەن كۇتىپ الۋىنا ۇنەمى مۇمكىندىگى بولا بەرمەيدى.
جەرگىلىكتى مەملەكەتتىك ورگان وكىلدەرىنە تۇرعىنداردىڭ جەتكىزگەن شاعىمدارى سان الۋان – تۇرعىن ءۇي-كوممۋنالدىق شارۋاشىلىق سالاسى, جەر قاتىناستارى جانە ءبىلىم بەرۋ, دەنساۋلىق ساقتاۋ سالاسىنداعى تۇيتكىلدەر.
– بۇلاردىڭ بىردە-ءبىرى ەسكەرۋسىز قالمايدى. ارىز-شاعىمدار مەن ءوتىنىش-تىلەكتەردىڭ جەرگىلىكتى جەرگە قاتىستى بولىگىن تىكەلەي ءوزىمىز شەشۋگە شەشىم قابىلدادىق. ال ءوز قۇزىرەتىمىزگە كىرمەيتىن ماسەلەلەردى جوعارى مەملەكەتتىك ورگانداردىڭ نازارىنا بەرۋدى ويلاستىرىپ وتىرمىز. تۇرعىندار كوتەرگەن ماسەلەلەرگە وراي بارىنە ناقتى جاۋاپ قايتارۋعا تىرىستىق. سونىمەن بىرگە اكىمدىك پەن باسقارما, دەپارتامەنتتەرگە تۇسكەن تىلەكتەر جان-جاقتى تالدانىپ, زەرتتەلىپ, سۇزگىدەن وتكىزىلىپ, ءتيىستى قورىتىندى شىعارىلاتىن بولادى. قالاي دەگەندە دە, مۇقتاج جاندار قامقورلىقسىز قالمايدى, – دەدى اقتوبە قالاسىنىڭ اكىمى ءىلياس يسپانوۆ.
تەمىر قۇسايىن,
«Egemen Qazaqstan»
اقتوبە
