ەلدىك رۋحتىڭ ءتالىمى
جۇما, 20 ءساۋىر 2012 8:17
ەلىمىزدىڭ تىنىشتىعى مەن بەيبىتشىلىگىن قورعايتىن قۇرىلىمداردىڭ قاتارىندا بويىندا پاتريوتتىق سەزىمى جوعارى جاستاردىڭ بولۋى مەملەكەتىمىزدىڭ مىعىمدىعىن قامتاماسىز ەتەدى. سوندىقتان دا ەل قورعانى بولار جاستارعا تالاپتىڭ دا جوعارى بولاتىنى تۇسىنىكتى. وسى ماقساتتا ەلىنىڭ تاريحىن, ءتىلى مەن ءدىلىن, ءانى مەن كۇيىن جاستاردىڭ بويىنا ءسىڭىرۋ ءۇشىن كوپ جۇمىستار جاسالۋدا. وبلىستىق ىشكى ساياسات باسقارماسىنىڭ ۇيىتقى بولۋىمەن №6655 اسكەري بولىمىندە وتكەن «جاس ۇلان – 2012» اسكەري-پاتريوتتىق اندەر بايقاۋى وسى باعىتتاعى جوسپارلى شارالاردىڭ ءبىرى عانا.
جۇما, 20 ءساۋىر 2012 8:17
ەلىمىزدىڭ تىنىشتىعى مەن بەيبىتشىلىگىن قورعايتىن قۇرىلىمداردىڭ قاتارىندا بويىندا پاتريوتتىق سەزىمى جوعارى جاستاردىڭ بولۋى مەملەكەتىمىزدىڭ مىعىمدىعىن قامتاماسىز ەتەدى. سوندىقتان دا ەل قورعانى بولار جاستارعا تالاپتىڭ دا جوعارى بولاتىنى تۇسىنىكتى. وسى ماقساتتا ەلىنىڭ تاريحىن, ءتىلى مەن ءدىلىن, ءانى مەن كۇيىن جاستاردىڭ بويىنا ءسىڭىرۋ ءۇشىن كوپ جۇمىستار جاسالۋدا. وبلىستىق ىشكى ساياسات باسقارماسىنىڭ ۇيىتقى بولۋىمەن №6655 اسكەري بولىمىندە وتكەن «جاس ۇلان – 2012» اسكەري-پاتريوتتىق اندەر بايقاۋى وسى باعىتتاعى جوسپارلى شارالاردىڭ ءبىرى عانا.
بايقاۋدى وتكىزۋدىڭ ماقساتى مەملەكەتتىك جاستار ساياساتىن جۇزەگە اسىرۋ, جاستاردىڭ ەلىنە, جەرىنە دەگەن سۇيىسپەنشىلىك سەزىمىن وياتۋ بولىپ تابىلادى. فەستيۆال وتەتىن الاڭعا №6655 ءاسكەري ءبولىمىنىڭ «ۇلان», اقتوبە زاڭ ينستيتۋتىنىڭ «قورعان», ەسەت باتىر اتىنداعى اسكەري-پوليتسيالىق مەكتەپ-ينتەرناتىنىڭ «ارلان», ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىسى كۇشتەرى ينستيتۋتىنىڭ كوماندالارى سالتاناتتى كيىنىپ شىعا كەلگەندە, كوز ءسۇيسىنىپ, كوڭىل كوتەرىلىپ قالدى. سىپتاي بوي تۇزەگەن جاستاردىڭ جاراسىمدى قيمىل-قوزعالىسىنىڭ ءوزى بۇل شارانىڭ اجارىن اشىپ جۇرە بەردى.
«بولاشاق بۇگىننەن باستالادى» اتتى رەسپۋبليكالىق اكتسيانىڭ اياسىندا وتكىزىلىپ جاتقان بۇل شاراعا اتالعان مەكەمەلەر عانا ەمەس, وسىندا اسكەري قىزمەتىن وتەپ جانە وقىپ ءجۇرگەن بالالاردىڭ اتا-انالارىنىڭ كەلۋى دە جاراسىمدى بولدى. فەستيۆال ءۇش نوميناتسيا بويىنشا وتكىزىلدى. فەستيۆالعا قاتىسۋشىلار پاتريوتتىق, ساپتىق اندەر ايتۋدان, مەملەكەتتىك رامىزدەرىمىزگە جانە ەل ءتاۋەلسىزدىگىنە قاتىستى سۇراقتارعا جاۋاپ بەرۋدەن سىنعا ءتۇستى. كىرىسپە سوزبەن اشقان وبلىستىق ىشكى ساياسات باسقارماسى باستىعىنىڭ ورىنباسارى سىرىم ءابدىراحمانوۆ ەلىمىزدىڭ ەرتەڭى جاستار ەكەنىن تىلگە تيەك ەتە كەلىپ, پاتريوتتىق سەزىمنىڭ ءىرگەتاسى وسى اسكەري بولىمدەردەن قالاناتىنىن جەتكىزدى. فەستيۆالعا ۇلى وتان سوعىسى جانە تىلداعى ەڭبەك ارداگەرلەرى فەدور چەمودانوۆتىڭ, مۇسا الدانيزوۆتىڭ, وتەش جالماعامبەتوۆتىڭ جانە عۇبايدوللا ءبىتىكوۆتىڭ قاتىسۋى دا بۇل شارانىڭ ماڭىزدىلىعىن ارتتىرا ءتۇستى. سوعىس جانە ەڭبەك ارداگەرلەرىنىڭ كەلىپ وتىرعانىن كورگەن قاتىسۋشىلار ءمىنسىز ونەر كورسەتىپ, اعا ۇرپاق الدىندا ۇيالماۋعا تىرىستى.
اسكەري ءبولىمنىڭ الاڭىنداعى ساحنا تورىنە كوتەرىلگەن №6655 اسكەري ءبولىمىنىڭ ءانشىسى اسحات قۋاندىقوۆ پاتريوتتىق اندەردىڭ شەرۋىن باستاي ءجونەلدى. الاڭ اسپانىن №6655 اسكەري ءبولىمىنىڭ وكىلى جاسۇلان ەرتاسوۆ, اۋە قورعانىسى كۇشتەرى اسكەري ينستيتۋتىنىڭ كۋرسانتى ميراس بەكەسوۆ, وسى جوعارى وقۋ ورنىنىڭ كۋرسانتى التىنبەك اقكەرەەۆ ورىنداعان پاتريوتتىق اندەر جالعاستىردى. امانات قاراتاەۆتىڭ ءانى دە تىڭدارماننىڭ كوڭىلىنەن شىقتى.
جاڭا عانا ساحنادان تۇسكەن امانات ءوزىنىڭ اقتوبە زاڭ ينستيتۋتىندا ەكىنشى كۋرستا وقيتىنىن, قازاقشا ءان ايتۋدى ۇناتاتىنىن جەتكىزدى. ونىڭ ورىنداۋىنداعى «ءوز ەلىم!» ءانى شاراعا جينالعانداردى ءبىر سەرپىلتىپ تاستادى. ءاندى ورىنداپ ساحنادان تۇسكەن امانات قاراتاەۆ اتا-اناسى جومارت پەن ءمۇسليمانىڭ سەنىمىنەن شىعۋ باستى ماقساتى ەكەنىن, ونەرگە تالاپتانىپ جۇرگەنىن جەتكىزدى.
سودان كەيىن فەستيۆالعا قاتىسۋشى كوماندالار ساپتا ءان ايتىپ, سايىسقا ءتۇستى. قازاقستان رەسپۋبليكاسىنىڭ مەملەكەتتىك رامىزدەرىنە قاتىستى ساۋالدارعا دا فەستيۆالعا قاتىسۋشىلار مۇدىرمەي جاۋاپ بەردى. جارىس بولعان جەردە جانكۇيەر دە قالمايتىنى بەلگىلى. ءبىز سونداي جانكۇيەردىڭ ءبىرى زاريپا كۇلەكەنوۆامەن تىلدەستىك. ول وسىندا جيەنى اسقاربەكتى قولداۋعا كەلگەنىن, ونىڭ ساپتا ءان ورىنداپ وتكەنىنىڭ ءوزىن كوڭىلگە مەدەۋ تۇتاتىنىن ايتتى. وسىنداي شارالاردىڭ جاستاردىڭ بويىندا ەلگە, تۋعان جەرگە, اتا-اناعا, باۋىرعا دەگەن ءسۇيىسپەنشىلىكتى وياتاتىنىن تىلگە تيەك ەتتى. ەلىمىزدىڭ بولاشاعى جاستاردىڭ قولىندا ەكەنىن, ولاردىڭ ادامگەرشىلىگى مول, تۋعان ەلىنە دەگەن ۇلكەن جۇرەكتى ازامات بولىپ ءوسۋى وسىنداي يگى ىستەردەن باستاۋ الاتىنىن انالىق سەزىممەن تۇيىندەدى.
فەستيۆالعا قاتىسۋشىلاردىڭ ونەرلەرىن باعالاۋشى قازىلار القاسى ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىن گران-پري جۇلدەگەرى دەپ تانىدى جانە ساپتا ءان ايتۋدان جەڭىمپاز بولدى. ءبىرىنشى ورىندى №6655 اسكەري ءبولىمىنىڭ كومانداسى يەلەندى. اقتوبە زاڭ ينستيتۋتىنىڭ كومانداسىنىڭ جەتەكشىسى دامير حايرۋشەۆ «ۇزدىك كوماندا كاپيتانى», №6655 اسكەري ءبولىمىنىڭ قىزمەتكەرى جاسۇلان ەرتاسوۆ «ۇزدىك ورىنداۋشى» نوميناتسياسىن جەڭىپ الدى. جەڭىمپازدار مەن جۇلدەگەرلەرگە العىس حاتتار مەن سىيلىقتار تاپسىرىلدى.
ساتىبالدى ءساۋىرباي,
اقتوبە وبلىسى.
