بۇرشىك جاردى اق قايىڭ
بەيسەنبى, 19 ءساۋىر 2012 8:12
قازىر قاي قالا مەن اۋىلدىڭ بولسىن باستى ءسانى رەتىندە جاسىل جەلەككە قالاي بولەنىپ, مالىنۋى الدىمەن كوزگە تۇسەدى. كوشەلەرى مەن اۋلالارى كەربەز قايىڭدارعا, سىلاڭداعان تەرەكتەرگە, كوككە شانشىلعان قاراعايلارعا تولى بولسا, ورتانىڭ كوركەمدىككە دەگەن كوڭىلى تانىلىپ قالادى. تابيعاتى اعاشتىڭ كوكتەپ-وسۋىنە قىتىمىرلاۋ دالالىق ايماقتىڭ بارلىق جەرىندە دە سان ءتۇرى ءبىر-بىرىمەن قويىنداسىپ, ايمالاسىپ, قۇشاق ايقاستىرىپ تۇرۋى بۇگىندە ءۇيرەنشىكتى كورىنىسكە اينالعانمەن, جاسىل جەلەكتى كوبەيتۋگە قاشاندا ىنتا تۇسكەن ەمەس. ءبىر كەزدە قاراعانىنان باسقا بۇتاسى جوق قاراعاندىنىڭ كوركى سول ارقىلى جاراسىمدىلىعى كوپتەگەن جىلدار جۇرگىزىلىپ, جالعاستىرىلىپ جاتقان ايالى الاقاننىڭ جەمىسى ناتيجەسى ەكەنى داۋسىز.
بەيسەنبى, 19 ءساۋىر 2012 8:12
قازىر قاي قالا مەن اۋىلدىڭ بولسىن باستى ءسانى رەتىندە جاسىل جەلەككە قالاي بولەنىپ, مالىنۋى الدىمەن كوزگە تۇسەدى. كوشەلەرى مەن اۋلالارى كەربەز قايىڭدارعا, سىلاڭداعان تەرەكتەرگە, كوككە شانشىلعان قاراعايلارعا تولى بولسا, ورتانىڭ كوركەمدىككە دەگەن كوڭىلى تانىلىپ قالادى. تابيعاتى اعاشتىڭ كوكتەپ-وسۋىنە قىتىمىرلاۋ دالالىق ايماقتىڭ بارلىق جەرىندە دە سان ءتۇرى ءبىر-بىرىمەن قويىنداسىپ, ايمالاسىپ, قۇشاق ايقاستىرىپ تۇرۋى بۇگىندە ءۇيرەنشىكتى كورىنىسكە اينالعانمەن, جاسىل جەلەكتى كوبەيتۋگە قاشاندا ىنتا تۇسكەن ەمەس. ءبىر كەزدە قاراعانىنان باسقا بۇتاسى جوق قاراعاندىنىڭ كوركى سول ارقىلى جاراسىمدىلىعى كوپتەگەن جىلدار جۇرگىزىلىپ, جالعاستىرىلىپ جاتقان ايالى الاقاننىڭ جەمىسى ناتيجەسى ەكەنى داۋسىز.
تال سيرەك جەرلەردە اعاش ەگۋدىڭ ءمانى ۇلكەن, قۋانىشى زور سانالادى. بۇل يگىلىكتى ىسكە ءۇلكەن-كىشى بولىپ جۇمىلا قاتىسىپ, ءبىر-ءبىر ءتۇپ بۇتا, ودان دا اسىرىپ وتىرعىزۋ اركىمگە قاستەرلى پارىز. كوكتەم مەن كۇزدىڭ تامىرلاندىرۋعا قولايلى شاقتارىندا بۇكىل ۇجىم, كورشى-قولاڭ, دوس-جاران, وتباسى توپتاسىپ, اينالانى جاپىراعى ءبۇر جارا باستاعان كوشەتتەرگە كوركەيتۋ – ءسۇيىنىشتى مەرەكەلىك شارا. وسى ورايدا كەيىنگى كەزدە جاس قاۋىمنىڭ بەلسەندىلىگى ەرەكشە ءوسىپ, انىق بايقالۋى – كوپشىلىك ريزالىعىن تۋدىرىپ وتىرعان قۇبىلىس. «جاسىل ەل» جاستار ەڭبەك جاساقتارى وبلىستىق شتابىنىڭ ۇيىمداستىرۋىمەن قالانىڭ جاڭا ساياباعىندا وتكەن اعاش ەگۋ اكتسياسى سونىڭ بيىلعى ءبىرىنشى كورىنىسى بولدى. وعان قوعامدىق, ازاماتتىق دەڭگەيدە قوزعاۋ سالىپ, ءۇلگىلى ۇردىسكە ۇيىتقى بولعان جاستار باستاماشىلىعىنا قولداۋشىلىق تۇرعىنداردىڭ قولدارىنا كۇرەكتەرىن ىلە كەلىپ, كوپتەپ جينالۋىنان ءبىلىندى. سولاردىڭ بەل ورتاسىنداعى وبلىس اكىمى ابىلعازى قۇسايىنوۆ باستاعان مەملەكەتتىك قىزمەتكەرلەر توبىنا جوعارى وقۋ ورىندارىنىڭ ۇستازدارى مەن ءشاكىرتتەرى, كاسىپورىندار ەڭبەككەرلەرى قوسىلدى. اعاش كوشەتتەرى تامىرىن جەرگە نارلەندىرۋ جۇمىستارى مەجەلى ۋاقىتقا دەيىن تىنىم تاپپادى.
وسىناۋ ىستە سوڭعى جىلدارداعى جاعىمدى ءبىر جاڭالىق, بۇرىنعىداي اعاشتاردىڭ ۇيرەنشىكتى تۇرلەرى ەگىلۋمەن عانا شەكتەلمەيدى. ەندى الاتاۋدىڭ قىسى-جازى جاسىل جاپىراعى بۇتاعىنان ارىلمايتىن الىپ ەمەندەرى, بۋراباي مەن قارقارالىنىڭ ءتىپ-تىك قاراعايلارى, باياناۋىلدىڭ بالاۋسا قايىڭدارى جەرسىندىرىلىپ كوكتەتىلەدى. بۇل كۇنى «جاسىل ەلدىڭ» 100-گە جۋىق بەلسەندىلەرىمەن بىرگە اتالعان ساياباقتا 300 بۇتاعىنا ءبۇرشىك جاردىرىلدى.
مۇنداي شارا سونداي-اق ءوڭىردىڭ بارلىق جەرلەرىندە ءوتتى. سونىمەن بىرگە, ءساۋىر مەن مامىردىڭ ءار سەنبىسى قورشاعان ورتانى جاسىل جەلەككە بولەۋ كۇندەرى بولادى. اعاش – اينالاعا كورىك, اۋاعا تىڭ تىنىس, ادامدارعا سايا. سونى كەڭەيتۋ جولىندا يگىلىكتى ءىستى ءوز قولدارىنا العان جاسىلەلدىكتەردىڭ تاماشا اكتسياسى اياسىندا ءوربيتىن جۇمىستاردىڭ ۇلكەنى الدا. كوكتەم – جاڭارۋ مەن جاسارۋدىڭ, كورىكتەنۋدىڭ باسى. بۇرشىك جارادى ءالى تالاي اعاش.
ايقىن نەسىپباي,
قاراعاندى.
