07 اقپان، 2019

«109» - اپاتتى جاعدايدا ارىز-شاعىم ايتاتىن ورتالىق

229 رەتكورسەتىلدى

ورال قالاسىنىڭ تۇرعىندارى ەندى كوممۋنالدىق قىزمەتتىڭ كەز كەلگەن تۇرىنەن اقاۋ بولعان جاعدايدا ورتالىقتاندىرىلعان «109» نومىرىنە حابارلاسىپ، ارىز-شاعىم، ءوتىنىشىن قالدىرا الادى. بۇگىندە «109» call-center-ءدىڭ شتاتى جاساقتالىپ، وپەراتورلار ارنايى كۋرستا ءبىلىم الىپ جاتىر.

– اپىرىم-اي، مىنا جارىققا نە بولدى؟! قالالىق ەلەكتر جۇيەسى مەكەمەسىنىڭ تەلەفونى بار ما؟ 54-34-84 نومىرىنە حابارلاسسام، ۇنەمى بوس ەمەس...

– قاپ، ىستىق سۋ توقتاپ قال­دى عوي. كىمگە حابارلاسۋ كە­رەك ەدى؟ «باتىسسۋارناسى» ما، «جايىق­جىلۋقۋات» پا؟ تەلەفونىن ايتىپ جىبەرىڭىزشى، كورشى!

قالادا تۇراتىن اعايىنعا مۇنداي ديالوگتار ابدەن تانىس شىعار. اياق استىنان جارىق ءسونىپ، سۋ توقتاپ، گاز كىدىرىپ، جى­­لۋ بەرىلمەي قالسا، جالما-جان كوممۋنالدىق اپاتتىق قىز­مەت­تەرگە قوڭىراۋ شالىپ، كومەك سۇرايتىنىمىز راس قوي. ويتكەنى قالا دەگەن – الىپ اعزا سياقتى، ءبىر قىزمەتتەن اقاۋ شىقسا، سول جەردە «كەپتەلىس» پايدا بولادى. ادەتتە ىركىلىسسىز بەرىلىپ تۇرعان سان ءتۇرلى قىزمەتتىڭ قادىرىن اياق استىنان توقتاپ قالعاندا عانا بىلەسىز. ءسويتىپ بىردە ليفت مەكەمەسىنىڭ، بىردە بايلانىس قىزمەتىنىڭ تەلەفوندارىن ىزدەپ، سابىلىپ قالاسىز.

– كوپ كەشىكپەي ورال قالا­سىندا اۆاريالىق-كوممۋنالدىق قىزمەت بويىنشا قالالىق بىر­ىڭعاي «109» Call-ورتالىعى اشىلادى. بۇگىندە ورتالىققا قاجەتتى جيھازدار مەن تەحنيكالىق قۇ­رالدار تۇگەلدەي ساتىپ الىندى، وندا قىزمەت ەتەتىن پەرسونال ار­نايى كۋرستا ءبىلىم الۋدا. وسى كۋرس اياقتالعان سوڭ ورتالىق ىسكە قو­سىلادى، – دەيدى وبلىستىق ءباس­­پاسوز قىزمەتىنىڭ جەتەكشىسى داۋرەن ساكەن ۇلى. 

ايتا كەتەيىك، مۇنداي ورتالىق دامىعان ەلدەر تاجىريبەسىندە اۋەلدەن بار. ورال قالاسى اكىمدىگى مەن باتىس قازاقستان وبلىسىنىڭ اقپاراتتاندىرۋ، مەملەكەتتىك كور­سەتىلەتىن قىزمەتتەر جانە ار­­حيۆ­تەر باسقارماسى بىرلەسىپ قول­عا العان جاڭا جوبادا وسى ەلدەر تاجىريبەسى تولىق ەسكەرىل­گەن. ماسەلەن، اقش-تا گاز، سۋ، جىلۋ، ەلەكتر، تۇرعىن ءۇي-كوم­مۋنالدىق شارۋاشىلىق، قاتتى تۇر­مىستىق قالدىقتار جانە باس­قا كوممۋنالدىق قىزمەت تۇر­لەرىندە بولعان اقاۋ مەن اپاتتى جاعدايلاردى «311» نومىرىنە حابارلاسىپ، شەشۋگە بولادى ەكەن. ورالدىق جاڭا جوباعا بالاما رەتىندە وسى قىزمەت الىنىپ وتىر. 
قاناتقاقتى جوبا وسى جىل­دىڭ ءبىرىنشى توقسانىندا ىسكە قو­سىلماق. وپەراتورلار Smart Uralsk عيماراتىنىڭ ءبىرىنشى قاباتىندا ورنالاساتىن بولادى. 
Call-ورتالىقتىڭ باستى ماق­ساتى – قالا تۇرعىندارىنا قولاي­لى جاعداي جاساۋ، كوممۋ­نال­دىق ماسەلەلەردى جەدەل ءارى ءبىر ور­تا­لىقتان شەشۋ. 

– راسىندا بۇعان دەيىن اپاتتىق-كوممۋنالدىق ماسەلەلەردى شەشۋ ءۇشىن ءار كوممۋنالدىق قىزمەتكە بولەك قوڭىراۋ شالۋشى ەدىك. بۇل تۇرعىندارعا ىڭعايسىز ەكەنى تۇسىنىكتى عوي. جاڭا جوبانى ەن­گىزسە، اپاتتى جويۋعا ۋاقىت تا ۇنەم­دەلىپ، ماسەلەنى جەدەل شەشۋگە مۇمكىندىك تۋادى دەپ ويلاي­مىز، – دەيدى ورال قالاسىنىڭ تۇرعىنى بەرىك شادىعالي.

سارالاپ قاراساق، اپاتتىق قىزمەتتىڭ قازىرگى جاعدايى شى­نىندا دا سىن كوتەرمەيدى. جو­عارىدا ايتىلعان كوممۋ­نالدىق قىزمەتتەردىڭ سايتىن اشىپ قا­راساڭىز، نارازى تۇرعىنداردىڭ اشۋ-ىزاعا تولى حاتتارىن كورەسىز. ولار اپاتتىق نومىرگە ۇزاق قو­ڭىراۋ شالىپ الا المايتىنىن، شاعىم تىركەۋشى ماماننىڭ قى­زمەت ساپاسى تومەندىگىن، كەيبىر ءوتىنىشتى قاعاز تۇرىندە تالاپ ەتە­تىنىن، وتىنىشتەر بازاسىنىڭ جانە وعان باقىلاۋدىڭ جوقتىعىن ايتىپ، دابىل قاعىپ-اق جاتىر. 

ال جاڭا جوبا قانداي بولماق؟ 

«109» Call-ورتالىعىنا حا­بارلاسقان ادامعا 5-10 سەكۋند ىشىندە جاۋاپ بەرىلەدى» دەپ سەن­دىرەدى جوبانى ۇيىمداس­تى­رۋشىلار. جانە «109» قىزمەتى اپتانىڭ جەتى كۇنى 24 ساعات بويى قىزمەت ەتەدى. ياعني ءبىر مينۋت تا دەمالىس بولمايدى.

وسى جوبا ارقىلى تۇرعىن­دار­دىڭ جەرگىلىكتى ورگاندارعا جەكە كەلۋىن قىسقارتۋ، وتىنىشكە جاۋاپ بەرۋ ۋاقىتىن قىسقارتۋ كوزدەلىپ وتىر. سونداي-اق ءار ءوتىنىش جىكتەلىپ، اشىق ورىندالادى. جەرگىلىكتى اتقارۋشى ورگان­داردىڭ تۇرعىندار مەن بيزنەس قۇرىلىمدارمەن ءوزارا ارەكەتى جاقسارادى. ءجيى كەزدەسەتىن تيپتىك ماسەلەردى شەشۋ ءۇشىن ارنايى ء«بىلىم بازاسى» قۇرىلادى. اپاتتى جويۋمەن اينالىساتىن ءاربىر ورىنداۋشىمەن تىكەلەي بايلانىس ورناتىلىپ، تاپسىرىستىڭ ورىندالۋ مەرزىمى باقىلاۋدا بولادى. 

ورال قالاسىندا «Smart city – اقىلدى قالا» اتتى كەشەندى جوبا قولعا الىنعانىنا ەكىنشى جىلدىڭ ءجۇزى بولدى. باستى ماق­سات – تۇرعىندار ومىرىنە قو­لايلى جاعداي جاساۋ، ولاردىڭ قاۋىپسىزدىگىن قامتاماسىز ەتۋ، قور­شاعان ورتانى قورعاۋ. بۇيىرسا جاقىندا ىسكە قوسىلعالى وتىرعان «109» Call-ورتالىعى دا وسى با­عىتتاعى ءبىر اسۋ بولماق.

قازبەك قۇتتىمۇرات ۇلى،

«Egemen Qazaqstan»

باتىس قازاقستان وبلىسى

سوڭعى جاڭالىقتار

مەشىتتە بەتپەردە تسەحى اشىلدى

ايماقتار • بۇگىن، 07:35

اۋدان ءومىرىنىڭ ايناسى

ايماقتار • بۇگىن، 07:27

ارمان الاسارماسىن

رۋحانيات • بۇگىن، 07:22

ديقان ديزەلدى تومەن باعاعا الادى

ەكونوميكا • بۇگىن، 07:11

كوروناۆيرۋسسىز قوستاناي

ايماقتار • كەشە

ۇقساس جاڭالىقتار