ايماقتار • 07 اقپان، 2019

سىرتقى ىستەر مينيسترلىگىندە ديپلوماتيالىق كورپۋسپەن كەزدەسۋ ءوتتى

372 رەتكورسەتىلدى

سىرتقى ىستەر ءمينيسترى بەيبىت اتامقۇلوۆ قازاقستاندا تىركەلگەن ديپلوماتيالىق ميسسيالاردىڭ جانە حالىقارالىق ۇيىمدار وكىلدىكتەرىنىڭ باسشىلارى ءۇشىن بريفينگ وتكىزدى. بۇل تۋرالى ءسىم ءباسپاسوز قىزمەتى حابارلادى.

ۆەدومستۆو باسشىسى قازاقستان پرەزيدەنتى نۇرسۇلتان نازارباەۆ ۇكىمەتتىڭ باستى مىندەتى - ەل ازاماتتارىنىڭ ءال-اۋقاتى مەن ءومىر ءسۇرۋ ساپاسىن ارتتىرۋ ەكەندىگى بەلگىلەگەنىن اتاپ ءوتتى. «سىرتقى ىستەر مينيسترلىگىنىڭ باستى مىندەتى - ساياسي جانە ديپلوماتيالىق جولمەن ەلدىڭ تۇراقتى الەۋمەتتىك-ەكونوميكالىق دامۋى ءۇشىن قولايلى سىرتقى جاعدايلاردى قامتاماسىز ەتۋ»، - دەدى كەزدەسۋدى اشقان مينيستر.

قازاقستان كوپجاقتى جانە كوپدەڭگەيلى ديپلوماتيانى سىرتقى ساياساتتىڭ ستراتەگيالىق رەسۋرسى رەتىندە قاراستىرادى. استانانىڭ مەسسەدجى انىق - «بلوكتىق ويلاۋدى» جەڭۋ جانە الەمنىڭ كۇن تارتىبىندەگى نەگىزگى ماسەلەلەر بويىنشا كونسەنسۋسقا قول جەتكىزۋ ءۇشىن جەتەكشى دەرجاۆالار اراسىنداعى ينكليۋزيۆتى ديالوگ قاجەت. شيەلەنىستەر ۇجىمدىق جاۋاپكەرشىلىك قاعيداتى نەگىزىندە ديپلوماتيالىق جولمەن شەشىلۋ قاجەت. بۇنداي ۇندەۋلەردى ەلباسى بارلىق جوعارى دەڭگەيدەگى تريبۋنالاردان جەتكىزەدى. ونىڭ جاھاندىق ويىنشىلار اراسىندا (اقش، رف، قحر، ەۋروپالىق وداق) كەزدەسۋدى ۇيىمداستىرۋ جانە حەلسينكي اكتىسىن جاڭارتۋ بويىنشا باستامالارى بۇل ماقساتقا جەتۋگە باعىتتالعان. قازاقستان جاھاندىق انتيادرولىق قوزعالىستى نىعايتۋ ءۇشىن بەلسەندى جۇمىسىن جالعاستىرادى. وعان قوسا، الماتىداعى بۇۇ وڭىرلىك حابىن قۇرۋ بويىنشا جۇمىس جالعاسادى.

2019 جىلدىڭ كۇن تارتىبىندە ۇجىمدىق قاۋىپسىزدىك تۋرالى شارت ۇيىمى، ازياداعى ءوزارا ىقپالداستىق جانە سەنىم شارالارى جونىندەگى كەڭەسى، شانحاي ىنتىماقتاستىق ۇيىمى، يسلام ىنتىماقتاستىق ۇيىمى جانە تۇركىتىلدەس ەلدەر ىنتىماقتاستىق كەڭەسى اياسىندا جوعارى دەڭگەيدەگى ءىس-شارالاردى دايىنداۋ ماسەلەلەرى بار.

مەملەكەت باسشىسىنىڭ باستاماسى بويىنشا استانادا العاشقى تۇركىتانۋشىلاردىڭ دۇنيەجۇزىلىك كونگرەسىنىڭ وتكىزىلۋى جوسپارلانۋدا. بيىلعى جىلى ەاەو تۋرالى شارتىنا قول قويىلۋىنىڭ 5 جىلدىعى جانە پرەزيدەنت ن. نازارباەۆتىڭ ەۋرازيالىق ينتەگراتسيا بويىنشا يدەياسىنىڭ 25 جىلدىعى اتاپ وتىلەدى. سونداي-اق XII-ءشى استانا ەكونوميكالىق فورۋمى مەن «ۇلكەن ەۋرازيا. ديالوگ. سەنىمدىلىك. ارىپتەستىك» تاقىرىبىندا ەۋرازيا ەلدەرى پارلامەنتتەرى سپيكەرلەرىنىڭ IV-ءشى كەڭەسى جوسپارلانۋدا. 2020 جىلعى ماۋسىمدا استانا قالاسىندا دۇنيەجۇزىلىك ساۋدا ۇيىمىنىڭ 12-ءشى مينيسترلىك كونفەرەنتسياسى وتەدى.

قازاقستان جانجالداردى شەشۋگە قولعابىس كورسەتۋدى جالعاستىرادى، اتاپ ايتقاندا استانا پروتسەسى شەڭبەرىندەگى سيرياداعى داعدارىستى.

ءسىم باسشىسى قازاقستاننىڭ رەسەي، قىتاي، اقش، ورتالىق ازيا، ەۋروپالىق وداق، تمد ەلدەرى، تۇركيا، يران، شىعىس اراب، ازيا مەن افريكا مەملەكەتتەرى، سونداي-اق كانادا جانە لاتىن امەريكا ەلدەرىمەن ءوزارا ءىس-قيمىلىنىڭ باسىمدىقتارى تۋرالى اڭگىمەلەدى.

سىرتقى ىستەر مينيسترلىگىنىڭ جاڭا فۋنكتسيالارىن ەسكەرە وتىرىپ، ەكونوميكالىق ىنتىماقتاستىق جانە دامۋ ۇيىمىنىڭ ستاندارتتارىنا سايكەس ينۆەستيتسيالىق احۋالدى ودان ءارى جەتىلدىرۋ بويىنشا كەشەندى جۇمىس كۇشەيتىلەتىن بولادى. دۇنيەجۇزىلىك بانكپەن بىرلەسە وتىرىپ، ينۆەستيتسيالاردى دامىتۋعا جاردەمدەسۋ بويىنشا «ۇلتتىق ينۆەستيتسيالىق باعدارلاماسى» ازىرلەنىپ قابىلداندى. ەلدەگى يننوۆاتسيالىق جانە سەرۆيستىك سەكتورلاردى دامىتۋعا باعىتتالعان پراگماتيكالىق ەكونوميكالىق قاتىناستاردىڭ گەوگرافياسىنىڭ كەڭەيتىلۋى كۇتىلۋدە.

«استانا» حالىقارالىق قارجى ورتالىعى، حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى، سونداي-اق ەكسپو نەگىزىندە «AstanaHub» حالىقارالىق IT-ستارتاپتار تەحنوپاركىنىڭ ىسكە قوسىلۋى بىرلەسكەن باستامالارعا جاقسى مۇمكىندىك بەرەدى.

«رۋحاني جاڭعىرۋ» باعدارلاماسى اياسىندا قازاقستاننىڭ تاريحي-مادەني مۇراسىن جان-جاقتى زەردەلەۋ جانە ونى الەمدىك دەڭگەيدە كوتەرۋ جونىندەگى جۇمىس كۇشەيتىلەتىن بولادى. قازاقستان مادەني-گۋمانيتارلىق ىنتىماقتاستىق الەم ەلدەرىمەن قارىم-قاتىناستا ماڭىزدى فاكتورعا اينالاتىنىنا سەنىمدى.

ۆيزالىق رەجيمدى ليبەراليزاتسيالاۋ بويىنشا جۇمىس جالعاسادى. بۇگىنگى كۇنى 45 ەلدىڭ ازاماتتارى وتىز كۇنتىزبەلىك كۇنگە دەيىن قازاقستانعا ۆيزاسىز كىرۋگە قۇقىلى. 20 ەلمەن ازاماتتىق پاسپورتتاردىڭ يەلەرى ءۇشىن ۆيزالىق تالاپتاردان بوساتۋ تۋرالى كەلىسىمگە قول قويىلعان. 2019 جىلدىڭ 1 قاڭتارىنان باستاپ قازاقستان رەسپۋبليكاسىندا شەتەلدىك ازاماتتار ءۇشىن ەلەكتروندىق فورماتتا بىرىڭعاي ۆيزا بەرۋدىڭ پيلوتتىق جوباسى ىسكە قوسىلعان. تۋريستىك ەلەكتروندىق ۆيزالار - 117 مەملەكەتتىڭ ازاماتتارىنا، سونداي-اق ىسكەرلىك جانە ەمدەۋگە ارنالعان ۆيزالار - 23 مەملەكەتكە بەرىلەدى.

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار