مينيستردەن تۇرمىسى تومەن وتباسىلارىنىڭ باسپانا الۋ مۇمكىندىكتەرى تۋرالى سۇراعان ەدىك. جەڭىس قاسىمبەكتىڭ ايتۋىنشا, 2018 جىلى «نۇرلى جەر» مەملەكەتتىك باعدارلاماسى رەكوردتىق كورسەتكىش ورناتىپ, 12,5 ملن شارشى مەتر جاڭا تۇرعىن ءۇي پايدالانۋعا بەرىلىپتى. ەلىمىزدە 113 مىڭنان استام وتباسى وزدەرىنىڭ تۇرعىن ءۇي جاعدايلارىن جاقسارتسا, سونىڭ ىشىندە 14 مىڭنان استام وتباسى مەملەكەتتىك قاراجات ەسەبىنەن ارەندالىق جانە نەسيەلىك باسپانامەن قامتاماسىز ەتىلگەن. الەۋمەتتىك جاعىنان از قامتىلعان, مۇمكىندىگى شەكتەۋلى وتباسىلارعا 4 مىڭ پاتەر بەرىلسە, سونىڭ 700-ءى كوپ بالالى جاندارعا تيەسىلى. بيىل جەرگىلىكتى اكىمدىكتەرگە قوسىمشا ارەندالىق باسپانالار ءۇشىن 10 ملرد تەڭگە بولىنبەك. وعان قوسا, «7-20-25» يپوتەكالىق باعدارلاماسى جانە «تۇرعىن ءۇي-قۇرىلىس جيناق بانكىنىڭ» سالىمشىلارىنا العاشقى جارنانى تولەۋ ءۇشىن سەرتيفيكات بەرۋ كوزدەلگەن. الداعى ۋاقىتتا بۇل جەڭىلدىكتەرگە كوپ بالالى وتباسىلار دا ىلىنەدى دەپ سەندىردى مينيستر.
− باسپانا الۋعا العاشقى جارنانى تولەۋ ءۇشىن بەرىلەتىن سەرتيفيكاتتىڭ ەكى ءتۇرى بار. ءبىرىنشىسى, اكىمدىكتەر ارقىلى بەرىلەتىن قايتارىمسىز نەگىزدەگى قاراجات. مىسالى, «7-20-25» باعدارلاماسىنىڭ العاشقى جارناسىنىڭ جارتىسىن سول سەرتيفيكات ارقىلى تولەۋگە بولادى. ءبىر ەسكەرەتىنى, بۇل قاراجات كولەمى ءار وبلىستىڭ بيۋدجەتىنە بايلانىستى ءارتۇرلى بولادى. ەكىنشىسى, 10-15 جىلدان كەيىن قايتارۋعا ارنالعان سەرتيفيكات. قازىر ءتيىستى زاڭعا وزگەرىستەر ەنگىزىلۋدە. الداعى 2-3 ايدا بۇل ۇسىنىستار جۇزەگە اسادى, – دەدى ج.قاسىمبەك.
تاياۋدا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى وڭىرارالىق ينفراقۇرىلىمدى جۇيەلى تۇردە دامىتۋدى تاپسىرعان بولاتىن. ج.قاسىمبەكتىڭ ايتۋىنشا, پرەزيدەنت تاپسىرماسىن ورىنداۋ ماقساتىندا بىلتىردان باستاپ جەرگىلىكتى جەلى جولدارىن جوندەۋگە بولىنەتىن قاراجات 2 ەسە ۇلعايتىلىپ, 150 ملرد تەڭگەگە جەتتى. بۇعان دەيىن ەلىمىزدە 4 مىڭنان استام اۆتوجول جوندەلدى. 2025 جىلعا قاراي جەرگىلىكتى جولداردىڭ 85-90 پايىزى جاقسى جانە قاناعاتتانارلىق جاعدايدا بولادى دەپ كۇتىلۋدە. مينيستر كەلتىرگەن اقپارعا سۇيەنسەك, جولداردى اقىلى ەتۋ جۇيەلەرىن ىسكە اسىرۋ جالعاسۋدا. قازىرگى تاڭدا جالپى ۇزىندىعى 471 شاقىرىم بولاتىن الماتى – قورعاس, الماتى – قاپشاعاي جانە استانا – تەمىرتاۋ جول ۋچاسكەلەرىندە اقى الۋ باستالدى. ءمينيستردىڭ ايتۋىنشا, ەكى جىل ىشىندە تاعى 5,5 مىڭ شاقىرىم جولدى اقى تولەۋ جۇيەسىنە ىسكە قوسۋ جوسپارلانعان. وسى قاراجات ەسەبىنەن اۆتوجولداردى ساقتاۋعا جۇمسالاتىن شىعىندار ايتارلىقتاي قىسقارادى.
ال بىلتىر ەلىمىزدە 1,5 مىڭ شاقىرىم رەسپۋبليكالىق ماڭىزى بار جول جوندەلىپ, 528 شاقىرىم رەكونسترۋكتسيالانعان بولاتىن. بيىل رەسپۋبليكالىق ماڭىزى بار 4,4 مىڭ شاقىرىم اۆتوجول جوندەۋدەن وتەدى. جوبالارعا 100 مىڭنان استام جۇمىسشى تارتىلادى. جىلدىڭ سوڭىنا دەيىن ۇزىندىعى 654 شاقىرىم ۋچاسكەدە قوزعالىس اشىلۋى ءتيىس.
سونىمەن قاتار مينيستر ازاماتتىق اۆياتسيادا كورسەتكىشتەردىڭ تۇراقتى ءوسىپ كەلە جاتقانىن اتاپ ءوتتى. ءمينيستردىڭ ايتۋىنشا, وسى جىلدىڭ ءى جارتىجىلدىعىندا FlyArystan العاشقى ۇلتتىق اۋە تومەن بيۋدجەتتى اۋەكومپانياسى ىسكە قوسىلماق. ءبىرىنشى جىلدا «ەير استانا» اۋە كومپانياسىنداعى باعادان ەكى ەسە تومەن اقىمەن 1 ملن جولاۋشىعا دەيىن تاسىمالداۋ جوسپارلانىپ وتىر. جاڭا اۋە تاسىمالداۋشىسىنىڭ باستى مىندەتى – حالىقتى بارىنشا بيۋدجەتتىك تاسىمالمەن قامتاماسىز ەتۋ.
−جاڭا لوۋكوستەردە ۇشۋ قۇنى 40-50 دوللار شاماسىندا بولادى. FlyArystan بيلەتتەرىن ساتۋ ناۋرىز ايىنىڭ سوڭىندا – ءساۋىر ايىنىڭ باسىندا باستالادى, – دەپ ناقتىلادى ج.قاسىمبەك.
ايتا كەتەرلىگى, بيىل FlyArystan اۋە كومپانياسىنىڭ رەيستەرى الماتىدان استانا, اتىراۋ, كوكشەتاۋ, پاۆلودار, قاراعاندى, قوستاناي جانە تاراز قالالارىنا ۇشادى دەپ جوسپارلانىپ وتىر.
ەركەجان ايتقازى,
«Egemen Qazaqstan»
