كليماتتىڭ وزگەرۋىنە قارسى كۇرەستە وسىمدىكتەر ماڭىزدى ءرول اتقارادى. ولار كومىرقىشقىل گازىن ءسىڭىرىپ, ونى جاپىراقتار مەن بۇتاقتارعا اينالدىرادى. ادامدار قانشالىقتى كوپ اعاش وتىرعىزسا, سوعۇرلىم اۋادا جىلۋدى ۇستاپ تۇراتىن سو2 ازايا تۇسەدى. وكىنىشكە قاراي, وسىمدىكتەر سۋ مەن جەردى ۇلكەن كولەمدە قاجەت ەتەتىندىكتەن ادامداردىڭ اۋانى تازارتۋدىڭ وزگە التەرناتيۆالارىن ىزدەۋىنە تۋرا كەلەدى.
نەمىس عالىمدارىنىڭ جاڭا زەرتتەۋلەر توپتاماسىنا سۇيەنسەك, بۇل ماسەلەدە بىزگە جاساندى فوتوسينتەز كومەكتەسەدى. ولاردىڭ ايتۋىنشا, ءدال قازىرگى ۋاقىتتا بۇل تەحنولوگيا تاجىريبە جۇزىندە قولدانۋ ءۇشىن تىم قىمبات, بىراق ينۆەستيتسيا قۇيۋعا تۇرارلىق باستاما بولماق.
جاساندى فوتوسينتەز وسىمدىكتەردى قورەكتەندىرۋدى ءدال تابيعي قالىپتا جۇزەگە اسىرادى. بۇل تەحنولوگيا دا تابيعي جۇيە سياقتى كومىرقىشقىل گازى مەن سۋدى قورەك رەتىندە, ال كۇن ساۋلەسىن ەنەرگيا كوزى رەتىندە پايدالانادى. بىراق ولاردان بۇتاقتار مەن جاپىراقتاردى ەمەس, سپيرت سياقتى كومىرتەككە باي ونىمدەردى ءبولىپ شىعارادى.
«ونىڭ ەرەكشەلىگى, ءبىز جۇيەنىڭ تيىمدىلىگىن ارتتىراتىن ورگانيكالىق ەمەس ماتەريالداردى قولدانامىز», - دەيدى گەلمگولتس اتىنداعى بەرليندەگى ماتەريالدار مەن ەنەرگيا ورتالىعىنىڭ فيزيگى جانە Earth System Dynamics جۋرنالىندا جاريالانعان زەرتتەۋ اۆتورلارىنىڭ ءبىرى ماتتياس ماي.
ونىڭ ايتۋىنشا, جاساندى فوتوسينتەزدىڭ اسەرى تابيعيدان دا ءتيىمدى.
«جاساندى فوتوسينتەزبەن اينالىساتىن عالىمدار كۇن ساۋلەسى مەن كومىرقىشقىل گازىنىڭ كومەگىمەن الىناتىن سۇيىق وتىنعا باستى نازار اۋدارعان. ونى جاعۋ كەزىندە جينالعان گاز اۋاعا ورالادى, ماسەلە وسىندا», - دەيدى فيزيك.
ماي جانە ونىڭ ارىپتەستەرى ۇسىنعان جۇيەدە سو2-ءنى جەر استىنا «كومۋ» قاراستىرىلعان.
