ج.قاسىمبەكتىڭ ايتۋىنشا, مەملەكەت باسشىسىنىڭ وڭىرارالىق ينفراقۇرىلىمدى جۇيەلى تۇردە دامىتۋ جونىندەگى تاپسىرماسىن ورىنداۋ ماقساتىندا بىلتىردان باستاپ جەرگىلىكتى جەلى جولدارىن جوندەۋگە بولىنەتىن قاراجات تەپە-تەڭ نەگىزدە 2 ەسە ۇلعايتىلىپ, 150 ملرد تەڭگەگە دەيىن جەتكىزىلدى. بۇعان دەيىن ەلىمىزدە 4 مىڭنان استام اۆتوجول جوندەلدى. 2025 جىلعا قاراي جەرگىلىكتى جولداردىڭ 85-90% جاقسى جانە قاناعاتتانارلىق جاعدايدا بولادى دەپ كۇتىلۋدە. مينيستر كەلتىرگەن اقپاراتقا سۇيەنسەك, اۆتوكولىك جولدارىنىڭ نورماتيۆتىك قامتىلۋى مەن ساقتالۋىن قامتاماسىز ەتۋ ماقساتىندا جولداردى اقىلى ەتۋ جۇيەلەرىن ەنگىزۋ بويىنشا جوبالاردى جۇزەگە اسىرۋ جالعاسۋدا. قازىرگى تاڭدا جالپى ۇزىندىعى 471 كم بولاتىن الماتى – قورعاس, الماتى – قاپشاعاي جانە استانا – تەمىرتاۋ جول ۋچاسكەلەرىندە اقى الۋ باستالدى. ج.قاسىمبەك اقىلى جولداردىڭ قۇنى وزگە كورشى ەلدەرمەن سالىستىرعاندا الدەقايدا ارزان ەكەنىن ايتتى.
− اقىلى جولداردىڭ باعاسى قولجەتىمدى, مىسالى, جەڭىل اۆتوكولىكتەر ءۇشىن كيلومەترىنە 1 تەڭگەدەن. بۇل كورشى قىتاي مەن رەسەيدەگى اقىلى جولداردىڭ باعاسىنان الدەنەشە ارزانعا تۇسەدى. ەكى جىل ىشىندە تاعى 5,5 مىڭ كم جولدا اقى تولەۋ جۇيەسىن ىسكە قوسۋ جوسپارلانعان. وسى قاراجات ەسەبىنەن اۆتوجولداردى ساقتاۋعا جۇمسالاتىن شىعىندار ايتارلىقتاي قىسقارادى, - دەدى مينيستر.
ال بىلتىر ەلىمىزدە 1,5 مىڭ كم رەسپۋبليكالىق ماڭىزى بار جول جوندەلىپ, 528 كم رەكونسترۋكتسيالانعان. بيىل رەسپۋبليكالىق ماڭىزى بار 4,4 مىڭ كم اۆتوجول جوندەۋدەن ءوتتى. جوبالارعا 100 مىڭنان استام جول قۇرىلىسشىلارى تارتىلعان. جىلدىڭ سوڭىنا دەيىن ۇزىندىعى 654 كم ۋچاسكەدە قوزعالىس اشىلادى.
