تۇركىستان وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى ءىلياس قۇرامىسوۆتىڭ مالىمدەۋىنشە, زاڭ بۇزۋشىلىقتار بويىنشا 4,2 ملن تەڭگە اكىمشىلىك ايىپپۇل سالىنعان. ونىڭ 4 ملن تەڭگەسى, كەلتىرىلگەن 14 ملن تەڭگە زالالدىڭ 12 ملن تەڭگەسى ءوندىرىلىپتى. جانۋارلار دۇنيەسىن كۇزەتۋ باعىتىندا سىرداريا وزەنىنىڭ بويىنداعى تۇقىمباقتا جارتىلاي ەركىندىككە جىبەرىلگەن بۇقار بۇعىلارىنىڭ سانى بىلتىر 9 باسقا ارتىپ, 155-كە جەتكەن. ولاردىڭ 84-ءى ىشكى قورشاۋدا, 71-ءى ەركىندىكتە ءجۇر. سونداي-اق وتكەن جىلى بۇكىلالەمدىك تابيعات قورىمەن (WWF) وڭىرلىك پاركتەن 5 باس بۇعى ىلە-بالقاش مەملەكەتتىك تابيعي رەزەرۆاتىنا جەرسىندىرىلگەن.
باسقارمانىڭ ۇسىنىسىمەن وتىرار ورمان شارۋاشىلىعىنىڭ 66 مىڭ گەكتار اۋماعىندا ورنالاسقان قاراتاۋ ورمانشىلىعىنا تابيعي-عىلىمي نەگىزدەمە جاسالعان. اتالعان اۋماقتا ەرەكشە تابيعاتىمىزدى كەلەشەك ۇرپاققا جەتكىزۋ جانە سيرەك كەزدەسەتىن اڭ-قۇستاردى قورعاۋ, كۇزەتۋ ماقساتىندا تۇران مەملەكەتتىك وڭىرلىك تابيعي پاركىن اشۋ جوسپارلانۋدا. بۇل اۋماقتى مەكەن ەتەتىن قاراتاۋ ارقارى, تاس سۋسارى, ءۇندى جايراسى سەكىلدى جانۋارلار دا كوزدىڭ قاراشىعىنداي قورعاۋدى قاجەت ەتەدى.
عالىمجان ەلشىباي,
«Egemen Qazaqstan»
تۇركىستان وبلىسى
