باقىتجان ورازبەكوۆ 1993 جىلى وزبەكستان رەسپۋبليكاسىنداعى ۇشقۇدىق قالاسىندا دۇنيەگە كەلگەن. اناسىنىڭ «بالالارىمنىڭ جارقىن بولاشاعىنا جول اشىلسا, قازاقستاندا ءبىلىم السا» دەگەن ويىمەن ورازبەكوۆتەر وتباسى قوستاناي وبلىسىنىڭ ليساكوۆ قالاسىنا كوشىپ كەلەدى.
كەيىپكەرىمىز الماتىداعى يادرولىق فيزيكا ينستيتۋتى, استاناداعى ەۇۋ, دۋبناداعى يادرولىق زەرتتەۋ ينستيتۋتى جانە دۋبناداعى «دۋبنا» مەملەكەتتىك ۋنيۆەرسيتەتىنىڭ مەملەكەتارالىق تورتجاقتى كەلىسىمىنىڭ نەگىزىندە ەكى ديپلومدى باعدارلاما اياسىندا باكالاۆر دارەجەسىن الادى. سونداي-اق يتاليانىڭ نەاپول قالاسىندا لۋيدجي ۆانۆيتەللي اتىنداعى كامپانيا ۋنيۆەرسيتەتىنە دوكتورانتۋراعا تۇسەدى.
«قازىرگى تاڭدا ەلىمىزدە يادرولىق فيزيكانى جاقسى تۇسىنەتىن ماماندار تاپشى. زامان وزگەرە كەلە ماماندىقتار دا وزگەرەدى. ال يادرولىق فيزيكانى, كۆانتتىق مەحانيكانى تۇسىندىرەتىن ادامداردىڭ ورنىن روبوتتار ەش ۋاقىتتا باسا المايدى. ۋنيۆەرسيتەتتەگى باسقا ماماندىقتارمەن سالىستىرعاندا ەرەكشەلىگىمىز – وقۋىمىز بەس جىلدىق», دەيدى باقىتجان.
كەيىپكەرىمىزدەن «عىلىم جولىن ءوز ەلىمىزدە ۇيرەنۋگە نە كەدەرگى؟ قازاقستاندىق جاستاردىڭ شەتەلگە كەتۋىنە نە سەبەپ؟» دەگەن كوپتىڭ كوكەيىندە جۇرگەن سۇراققا جاۋاپ بەرۋىن وتىندىك. ونىڭ ايتۋىنشا, زامانداستارىنىڭ شەتەل ومىرىنە ىنتىق بولىپ, ەلدەن ءبىرجولا كەتۋىنە اسەر ەتەتىن ءبىر عانا فاكتور بار. بۇل – الەۋمەتتىك جاعداي.
«عىلىمدى ەلىمىزدە ۇيرەنۋدىڭ وسال تۇسى – قارجىلاندىرۋ. مەملەكەتتەن تالاي قارجى بولىنەتىنىن ەستىپ قۋانساق, قولعا قىسقارىپ-قىسقارىپ ارزىمايتىن پۇل تۇسەدى. بىلتىر ەلىمىزدەگى عىلىمي جوباعا قاتىسقان ەدىم. الايدا جوباعا بولىنگەن قارجى اۋىز تولتىرىپ ايتارلىقتاي بولمادى. عىلىم سالاسىندا تاجىريبە جۇرگىزۋگە كەرەكتى قۇرىلعىلارىن الۋ قارجىعا كەلىپ تىرەلەدى», دەيدى.
باقىتجان شەتەلدە جيعان بىلىمىمەن سوندا ءجۇرىپ عىلىمي جاڭالىق اشۋىنا مۇمكىندىك مول. بىراق ونىڭ باستى ماقساتى – شەتەلدەن ءبىلىم الىپ, عىلىم ۇيرەنىپ, ولاردى قازاقستاندىق جاستارعا ۇيرەتۋ.
«ەلگە كەلگەن سوڭ ءبىلىم بەرۋ سالاسىندا ءوزىمنىڭ جاڭا يدەيالارىمدى ۇسىنۋدى جوسپارلاپ وتىرمىن. قازاقستانداعى يادرولىق فيزيكانى دامىتۋعا ۇلەس قوسسام دەيمىن. الەمدە بۇل سالادا جاڭالىقتار وتە كوپ. قازاقستانعا ونداي اقپارات سيرەك. استانادا يادرولىق زەرتتەۋ ينستيتۋتىنىڭ فيليالىندا اۋىر يونداردى ۇدەتەتىن عىلىمي قۇرىلعى بار. ول ەلىمىزدەگى ەڭ جاڭا ۇلگىدە سالىنعان ۇدەتكىش. سوعان ەكسپەريمەنت قويۋعا تەوريالىق باستاما قاجەت. ال ونى ەلىمىزدە مەڭگەرگەن ماماندار تاپشى. سوندىقتان ۇيرەنۋىمىز ءتيىس دۇنيەنى مەڭگەرىپ, قولدا بار مۇمكىندىكتى جۇزەگە اسىرۋ ءۇشىن شەتەلدە ءبىلىم الۋ قاجەت دەپ ويلايمىن», دەيدى باقىتجان ورازبەكوۆ.
اقمارال اعزامقىزى,
«Egemen Qazaqstan»
