مەملەكەتتىك ەڭبەك ينسپەكتسياسى باسقارماسى وڭىردە ەڭ تومەنگى جالاقى الاتىن جۇمىسكەرلەردىڭ ەڭبەكاقىسىن كوتەرۋ بويىنشا مونيتورينگ جانە ءتۇسىندىرۋ جۇمىستارىن جۇرگىزىپ, تەكسەرىس ناتيجەسىندە كەيبىر جۇمىس بەرۋشىلەردىڭ 28-30 مىڭ تەڭگە عانا ايلىق تولەپ وتىرعانى بەلگىلى بولدى. جۇمىسشىلاردىڭ جالاقىسىن كوتەرۋى ءتيىس 13852 كاسىپورىن انىقتالدى. ولاردىڭ 84,5 پروتسەنتى ىشكى رەزەرۆتەر ەسەبىنەن 38 مىڭنان استام جۇمىسشىنىڭ جالاقىسىن ارتتىرۋعا كەلىسكەن. وسىعان وراي جۇمىس بەرۋشىلەرمەن 3327 مەموراندۋم جاسالىپ, 928 ۇجىمدىق كەلىسىمشارتقا قول قويىلدى.
ايماق باسشىسى قۇمار اقساقالوۆ بيۋدجەت سالاسىندا 43 مىڭ, ناقتى سەكتوردا 101 مىڭ ادامنىڭ جالاقىسىن كوتەرۋ بويىنشا جوسپارلى جۇمىس جۇرگىزۋ قاجەتتىگىن اتاپ ايتىپ, ءتيىستى باسشىلارعا ناقتى تاپسىرمالار بەرگەن بولاتىن. ەڭبەكاقىنى كوتەرۋگە بايلانىستى ءتيىستى شارالاردى قولدانۋ, مۇمكىندىكتەردى ىزدەستىرۋ ارقاسىندا ەڭبەكاقىنى ەسەلەۋگە نيەتتىلەر قاراسى مولايدى. «يزوليت» جشس-ءى ەلەكتر وقشاۋلاعىش ماتەريالدار شىعارۋمەن اينالىسادى. وندا تۇراقتى جۇمىسپەن 97 ادام قامتىلعان. ورتاشا جالاقى 100 مىڭ تەڭگەنى قۇرايدى. مۇندا بىلتىر جۇمىسشىلاردىڭ جالاقىسى 13 پروتسەنتكە ارتسا, بيىل تاعى 10 پروتسەنتكە كوبەيىپ, 110 مىڭ تەڭگەنى قۇراماق.
«جبي ەدينستۆو» جəنە «اليانس جولى» سياقتى كاسىپورىنداردا 350-گە جۋىق ادام ەڭبەك ەتسە, ولاردىڭ ۇشتەن ءبىرى ەڭ تومەنگى جالاقى الادى ەكەن. كاسىپورىن باسشىلىعى ەلباسىنىڭ تومەنگى جالاقىنى ءوسىرۋ جونىندەگى تاپسىرماسىنا وراي ەڭ تومەنگى جالاقىنى 58-62 مىڭ, ال ورتاشا جالاقىنى 110 مىڭ تەڭگەگە دەيىن ارتتىرۋدى جوسپارلاپ وتىر. سول سياقتى «بلوك» جشس-ءى دە ءوز قىزمەتكەرلەرىنىڭ تۇرمىس ساپاسىن جاقسارتۋ ماقساتىندا ەڭبەكاقىنى ارتتىرۋ تۋرالى شەشىم قابىلدادى. «ريزولين» اتتى ەلەكتر وقشاۋلاعىش ماتەريالدارىمەن تانىمال وسى اتتاس زاۋىتتا سوڭعى ءۇش جىلدا ەڭبەككەرلەردىڭ جالاقىسى 30 پروتسەنتكە ارتىپ, ورتاشا ايلىق جالاقى 120 مىڭ تەڭگەنى قۇراعان. سەرىكتەستىك الداعى ۋاقىتتا جالاقىنى تاعى 10-15 پروتسەنتكە ۇلعايتۋدى بەلگىلەپ وتىر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
