باسقارما باسشىسى اۋەلى وتكەن جىلى جول سالاسىندا اتقارىلعان جۇمىستارعا توقتالدى. بىلتىر بۇل باعىتتا قازىنادان 12,1 ميلليارد تەڭگە بولىنسە, ونىڭ 1,8 ميلليارد تەڭگەسى رەسپۋبليكالىق, 10,3 ميلليارد تەڭگەسى جەرگىلىكتى بيۋدجەتتەن قارالعان. بۇل قارجىعا بارلىعى 532,6 شاقىرىم جول كۇردەلى, ورتاشا جوندەۋلەردەن ءوتىپ, شاعالدى جول سالۋ جۇمىستارى اتقارىلعان. ونىڭ 145,4 شاقىرىمى وبلىستىق, 211 شاقىرىمى اۋداندىق ماڭىزى بار اۆتوجولدار بولسا, 187,4 شاقىرىمى ەلدى مەكەن كوشەلەرى بولىپ تابىلادى. سونداي-اق, 1 كوپىردىڭ قۇرىلىسى جۇرگىزىلىپ, 2 جول وتكەلى قايتا جاڭعىرتىلعان. ال, «نۇرلى جول» مەملەكەتتىك باعدارلاماسى اياسىندا 3,1 ميلليارد تەڭگەگە 7 جوبا ىسكە اسقان. ناقتىلاي ايتساق, 1 نىسان جاڭا كوپىر قۇرىلىسى, 1 نىسان كۇردەلى جوندەۋ جانە 5 نىسان ورتاشا جوندەۋدەن ءوتۋى جوسپارلانعان. ونىڭ 3-ءى بىلتىر پايدالانۋعا بەرىلسە, 4-ءى وسى جىلعا وتپەلى بولىپ تابىلعان.
سونىمەن قاتار, ەلدى مەكەندەردى قوعامدىق كولىكپەن قامتۋ ماسەلەسى تولىعىمەن شەشىلگەن. وبلىستا سالىنۋى كوزدەلگەن 5 اۆتوستانتسيا تىزىلىمگە ەنگىزىلىپ, بەلگىلەنگەن مەجەگە قول جەتكىزىلگەن. بۇگىندە «تسيفرلى قازاقستان» مەملەكەتتىك باعدارلاماسى اياسىندا ينتەللەكتۋالدى كولىك جۇيەسىنىڭ جوبالارىن ىسكە اسىرۋ بويىنشا جول كارتاسى بەكىتىلگەن. جول كارتاسىندا قوعامدىق كولىكتەردە ەلەكتروندى بيلەتتەندىرۋ جۇيەسىن ەنگىزۋ بويىنشا ءتيىستى شارالار اعىمداعى جىلدىڭ ماۋسىم ايىنان باستاپ قولعا الىناتىن بولادى.
ەسەپتى جيىندا وڭ ناتيجەلەرمەن بىرگە وزەكتى ماسەلەر دە تالقىلاندى. وتكەن جىلى تۇرعىندار تاراپىنان تۇسكەن 78 ارىز-شاعىمنىڭ 56-سى تاراز قالاسىنا تيەسىلى بولعان. ونىڭ 44-ءى جولاۋشىلار كولىگىنە, 34-ءى اۆتوموبيل جولدارى ماسەلەرىنە قاتىستى.
ءوز كەزەگىندە اكىم تۇسكەن ارىز-شاعىمدارمەن جۇيەلى جۇمىس جاساۋ كەرەكتىگىن باسا ايتىپ, «باتىس قىتاي-باتىس ەۋروپا» اۆتوجولىنىڭ بويىنداعى تازالىق, جولاۋشىلارعا جايلى جاعداي جاساۋ جۇمىستارىنىڭ السىزدىگىن سىنعا الدى. ءوڭىر باسشىسى جول بەلگىلەرىن تيىسىنشە ورناتۋ, جوندەلگەن جولدىڭ ساپالىلىعى, بەكىتىلگەن ءىس-شارا بويىنشا جۇمىستار جۇرگىزۋ كەرەكتىگىن دە ەسكەرتتى.
حاميت ەسامان,
«ەگەمەن قازاقستان»
جامبىل وبلىسى
