وبلىستىق ەكولوگيا دەپارتامەنتىنىڭ باسشىسى مۇرات قۇرمانباەۆ كوپتەگەن الەۋمەتتىك نىسانداردا لاس سۋ جيناقتايتىن سەپتيك سالىنعانىمەن كەيبىر اۋداندا ءالى دە قالدىققا ارنالعان كارىز جۇيەسى شەشىمىن تاپپاي وتىرعاندىعىن ايتتى. دەپارتامەنت باسشىسى ەكولوگيالىق احۋالعا اسەر ەتەتىن وسىنداي جاۋاپسىزدىقتاردى رەتكە كەلتىرۋ جونىندەگى ءوز ۇسىنىستارىن بايانداپ بەردى. قاتتى قالدىقتاردى وڭدەۋ ماسەلەسىندە تۇيتكىلدى تۇستار جوق ەمەس.
قىزىلوردا وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى ايدار ابدۋاليەۆ ايماقتىڭ ەكولوگيالىق ماسەلەلەرىنىڭ ىشىندەگى ماڭىزدىسى پوليگونداردى ەكولوگيالىق جانە سانيتارلىق تالاپتارعا سايكەستەندىرۋ ەكەندىگىن ايتتى.
– بارلىق اۋدان مەن قالا اكىمدىكتەرى ءوندىرىس جانە تۇتىنۋ قالدىقتارىن ورنالاستىرۋعا 145 جەر ۋچاسكەسىن بەلگىلەپ, ءتيىستى قۇجاتتارىن تولىعىمەن رەسىمدەدى. 2013-2015 جىلدارى قارماقشى, قازالى اۋداندارىنىڭ ورتالىقتارىندا پوليگون قۇرىلىستارى جۇرگىزىلدى. 2018 جىلى 1-ءشى كەزەكتە وبلىستىق بيۋدجەتتەن ارال قالاسىنا پوليگون سالۋعا قارجى ءبولىندى. قالعان قاراجات 2019 جىلعى ناقتىلانعان بيۋدجەتكە ۇسىنىلدى. مەملەكەت-جەكەشەلىك ارىپتەستىگى اياسىندا قىزىلوردا قالاسىندا تۇرمىستىق قاتتى قالدىقتاردى سۇرىپتاۋ كەشەنى مەن پوليگون قۇرىلىسىن ىسكە اسىرۋ جوباسى باستالدى. اتالعان جۇمىستاردى جالعاستىرۋ ماقساتىندا سەكسەۋىل مەن تەرەڭوزەك كەنتىنە پوليگون قۇرىلىستارىنا بيۋدجەتكە ءوتىنىم ۇسىنىلدى. قالعان جاڭاقورعان, شيەلى, جالاعاش اۋداندارى پوليگوننىڭ جوبا-سمەتالىق قۇجاتتارىن ءالى كۇنگە دەيىن سوزۋدا, – دەدى ول.
وبلىستىڭ بارلىق اۋدانىندا قالدىقتاردى وڭدەۋ بويىنشا ءتيىستى جۇمىستار ءوز دەڭگەيىندە جۇرگىزىلمەيدى. وبلىس بويىنشا 2018 جىلى جيناقتالعان 147,0 مىڭ توننا قاتتى تۇرمىستىق قالدىقتاردىڭ 4700 تونناسى وڭدەلگەن. ياعني, بۇل سالادا اتقارىلاتىن جۇمىس جەتكىلىكتى.
باقتيار تايجان,
«ەگەمەن قازاقستان»
قىزىلوردا وبلىسى
