وبلىستىق دەنەشىنىقتىرۋ جانە سپورت باسقارماسىنىڭ باسشىسى رينات يبراگيموۆتىڭ ايتۋىنشا, 2018 جىلى وڭىردە 1200 سپورتتىق شارا ءوتىپ, 245 مىڭ ادامدى قامتىعان. قازىر وبلىس بويىنشا 858 دەنە تاربيەسى ۇجىمى جۇمىس ىستەيدى. بالالار مەن جاسوسپىرىمدەرگە سپورتتىڭ 22 تۇرىمەن اينالىسۋعا مۇمكىندىك جاسالعان. وليمپيادالىق رەزەرۆ دايىنداۋ ورتالىعىندا 159 وقۋشى سپورتپەن شۇعىلدانادى.
– 2018 جىلى ءبىزدىڭ سپورتشىلار ءارتۇرلى دەڭگەيدەگى سپورتتىق شارالارعا قاتىسىپ, 1194 مەدال جەڭىپ الدى. ءبىر جىلدىڭ وزىندە وبلىستا 10 حالىقارالىق دارەجەدەگى سپورت شەبەرى, 18 سپورت شەبەرى, 145 سپورت شەبەرلىگىنە ۇمىتكەر دايىندالدى. وسى جىلى 220 اتىراۋلىق سپورتشى بىرنەشە سپورت تۇرىنەن قازاقستان رەسپۋبليكاسىنىڭ ۇلتتىق قۇراما كومانداسىنا كىردى, – دەيدى باسقارما باسشىسى.
ايماقتا سپورتتىق ينفراقۇرىلىمدى دامىتۋ ايرىقشا نازاردا. وتكەن جىلى 52 نىسان پايدالانۋعا بەرىلدى. بۇل كورسەتكىش بيىل تاعى دا ارتا تۇسپەك. قازىر ماحامبەت اۋدانى اقجايىق اۋىلىنداعى دەنەشىنىقتىرۋ-ساۋىقتىرۋ كەشەنىنىڭ قۇرىلىسى اياقتالۋعا جاقىن. جىلىوي, قۇرمانعازى اۋداندارىندا سپورت كەشەندەرى سالىنىپ جاتىر. جاقىن بولاشاقتا دەنەشىنىقتىرۋ جانە سپورتپەن اينالىسۋ ءۇشىن 45 نىسان قۇرىلىسى جۇرگىزىلەدى. ءبىر اتاپ وتەرلىگى, سپورتتى دامىتۋعا قاراجات تەك مەملەكەتتىك بيۋدجەتتەن عانا بولىنبەيدى. سپورتتىق ينفراقۇرىلىمدى دامىتۋعا كوممەرتسيالىق قۇرىلىمدار دا ۇلەس قوسۋدا.
– وڭىردە ۇلتتىق سپورت تۇرلەرى دە وركەندەپ كەلەدى. سپورتتىق مەكتەپتەردە توعىزقۇمالاق, قازاقشا كۇرەس ۇيىرمەلەرى بار, جەكپە-جەكتەن وبلىستىق فەدەراتسيا قۇرىلعان. 2018 جىلى اتىراۋدا ۇلتتىق سپورت تۇرلەرى بويىنشا «كاسپي كۋبوگى – جايىق جاعاسىندا» حالىقارالىق ءتۋرنيرى ءوتتى, – دەيدى رينات يبراگيموۆ. – وبلىستا 8 سپورت كلۋبى بار. مۇمكىندىگى شەكتەۋلى جانداردىڭ دا سپورتپەن اينالىسۋلارى ءۇشىن جاعداي جاسالعان. اتىراۋ وبلىسىنان پاراليمپيادا قۇراماسىنا 44 سپورتشى ەندى. 13 سپورتشىنىڭ حالىقارالىق دارەجەدەگى سپورت شەبەرى اتاعى بار, 27 سپورتشى قازاقستان رەسپۋبليكاسىنىڭ سپورت شەبەرى, 45 سپورت شەبەرلىگىنە ۇمىتكەر بار.
سپورت پەن سالاماتتى ءومىر سالتىن ناسيحاتتاۋدىڭ تاعى ءبىر ءتيىمدى جولى رەتىندە وبلىس ورتالىعىندا «سپورتتىق ايالدامالار» – كوشەدەگى جاتتىعۋ قوندىرعىلارى ورناتىلدى. اتىراۋ قالاسىنىڭ ءار بولىگىندە 30 جاتتىعۋ قۇرالى, 4 «Street Workout» الاڭى بار. ەندى سكەيت-پاركۋر, ستريت-ۆوركاۋتپەن اينالىساتىن ورىندار قاراستىرىلعان جاستار ساياباعى سالىنادى. مەملەكەت-جەكەمەنشىك ارىپتەستىك ارقىلى جابىق جەڭىل اتلەتيكا مانەجىن سالۋ دا جوسپاردا بار. مۇنىڭ ءبارى بۇقارالىق سپورتتى دامىتۋعا باعىتتالعان قادامدار. سوڭعى مالىمەت بويىنشا, وبلىس تۇرعىندارىنىڭ 31 پايىزى سپورتپەن اينالىسادى. بۇل كورسەتكىشتىڭ دە جىلدان-جىلعا ارتىپ كەلە جاتقانى كوڭىل قۋانتادى.
باقىتگۇل باباش,
«ەگەمەن قازاقستان»
اتىراۋ
