بالاقاي قاسىم-جومارتتى پارلامەنت سەناتىنىڭ توراعاسى قاسىم-جومارت توقاەۆ تۋعان كۇنىمەن ارنايى قۇتتىقتاپ, سىيلىق جىبەردى.
ونى كىشكەنتاي بۇلدىرشىنگە «نۇر وتان» پارتياسى قىزىلوردا وبلىستىق فيليالى توراعاسىنىڭ ورىنباسارى ەرجان بايتىلەس تابىس ەتتى.
مەديتسينا سالاسىنىڭ ارداگەرى ۇسەن ماقاجان ۇلى بىلتىر دۇنيەگە كەلگەن ون ءبىرىنشى نەمەرەسىنىڭ ەسىمىن قاسىم-جومارت دەپ قويعان ەكەن.
- قاي اتا-انانىڭ دا ەڭ ۇلكەن قۋانىشى بالالارى, - دەيدى ۇسەن ماقاجان ۇلى. - نەمەرەمىزگە ىرىمداپ قازاقتىڭ مەملەكەت جانە قوعام قايراتكەرى قاسىم-جومارت اتاسىنىڭ نىسپىسىن قويدىق. توقاەۆ - قازاقستان تاۋەلسىزدىگىن ورنىقتىرۋعا, ەلدىڭ بولاشاعىن كەمەل ەتۋگە قىزمەت ەتىپ جۇرگەن ەل اعاسى. سول اتاسىنداي بولىپ ءوسىپ, وتانىمىزدىڭ ءبىر كەرەگىنە كىرپىش بولىپ قالانىپ جاتسا دەگەن نيەت ۇستىندەمىز.
كىشكەنتاي قاسىم-جومارت ءۇشىن ۇلكەن قاسىم-جومارت اتاسىنىڭ سىيلىعى الداعى ومىرىندە ايتۋلى وقيعا بولارى ءسوزسىز.
باقتيار تايجان,
«ەگەمەن قازاقستان»
قىزىلوردا وبلىسى
