ماسەلەن, تالدىقورعان قالاسىنىڭ ساۋلەت جانە قالا قۇرىلىسى ءبولىمىنىڭ باسشىسى مەن قاتارداعى قىزمەتكەرلەرى جەكە كاسىپكەردىڭ وتىنىشىنە بىرنەشە اي بويى قۇلاق اسپاي, زاڭمەن بەلگىلەنگەن ءتارتىپ بويىنشا جاۋاپ بەرمەي كەلىپتى. جەكە كاسىپكەر جانار يمانعاليەۆا وتكەن جىلدىڭ ماۋسىم ايىندا قالالىق ساۋلەت جانە قالا قۇرىلىسى بولىمىنە يەلىگىندەگى پاتەرىن تۇرعىن ءۇي قورىنان شىعارىپ, كوممەرتسيالىق نىسانعا اۋىستىرۋ بويىنشا ءوتىنىش بەرگەن. جەكە كاسىپكەر جەكە پاتەرىن ءدارىحانا ەتىپ قايتا جابدىقتاپ, ساۋدا نىسانىنا اينالدىرۋدى ماقسات تۇتادى. وتىنىشكە ساي ءتيىستى قۇجاتتارىن تولىق وتكىزگەن. الايدا مەملەكەتتىك ورگان مەملەكەتتىك قىزمەت كورسەتۋ ستاندارتىن بۇزىپ, حاتقا بىرنەشە اي وتكەن سوڭ عانا ءوتىنىشتى قاناعاتتاندىرماۋ جونىندە جاۋاپ بەرەدى.
امالى تاۋسىلعان كاسىپكەر قۇقىقتىق كومەك الۋ ماقساتىندا كاسىپكەرلەر پالاتاسىنا جۇگىنۋگە ءماجبۇر بولدى. ءوز كەزەگىندە «اتامەكەندىكتەر» قالالىق ساۋلەت جانە قالا قۇرىلىس ءبولىمى قىزمەتىنىڭ زاڭدىلىعىن انىقتاۋ ماقساتىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنە حات جولدايدى. ال, دەپارتامەنت وكىلدەرى بولىمگە جوسپاردان تىس تەكسەرۋ جۇمىستارىن جۇرگىزدى.
- ءبولىم باسشىسى «قازاقستان رەسپۋبليكاسىنداعى ساۋلەت, قالا قۇرىلىسى جانە قۇرىلىس قىزمەتى تۋرالى» زاڭىنىڭ 60-بابى 1-تارماعىنا سايكەس, ەگجەي-تەگجەيلى جوسپارلاۋ جوباسىنا سۇيەنىپ تۇرعىن ءۇي قورىنىڭ فۋنكتسيونالدىق ماقساتىن, كوممەرتسيالىق نىسانعا وزگەرتۋگە, ياعني دارىحانعا اۋىستىرۋعا رۇقسات بەرۋدەن باس تارتقان. بىراق, ءبولىم باسشىسى شىعارعان شەشىمدى ينۆەستيتسيالار جانە دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى نەگىزسىز دەپ تاپتى. زاڭ تالاپتارىن ورىنداماعانى ءۇشىن ءبولىم باسشىسى انارقۇلوۆ مۇرات «اكىمشىلىك قۇقىق بۇزۋشىلىق تۋرالى» كودەكسىنىڭ 465-بابىنىڭ 2-تارماعىنا سايكەس اكىمشىلىك جاۋاپكەرشىلىككە تارتىلدى, - دەيدى وقيعاعا قۇقىقىتىق باعا بەرگەن كاسىپكەرلەر پالاتاسىنىڭ ساراپشىسى اقبوتا ابيشەۆا.
ياعني, ساۋلەت جانە قالا قۇرىلىس ءبولىمى سىلتەمە جاساعان زاڭ نورماسى بويىنشا تۇرعىن ءۇي قورىنىنىڭ فۋنكتسيونالدىق ماقساتىن, كوممەرتسيالىق نىسانعا وزگەرۋگە تىيىم سالۋ كورسەتىلمەگەنى انىقتالدى. سونىمەن بىرگە, كاسىپكەرلەر پالاتاسى مەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنىڭ ارالاسۋىنان كەيىن عانا كاسىپكەرگە ء بولىم وكىلدەرىنىڭ 115 كۇنگە كەشىكتىرىلىپ جاۋاپ بەرگەنى بەلگىلى بولدى. جاۋاپ حاتىندا مەملەكەتتىك قىزمەتتەردى كورسەتۋ ءتارتىبى تۋرالى تولىق اقپارات ۇسىنىلماۋىنا بايلانىستى قالالىق ءبولىمنىڭ جەتەكشى مامانىنا «ەسكەرتۋ» تۇرىندە تارتىپتىك جازا قولدانىلدى.
جالپى, مەملەكەتتىك قىزمەت كورسەتۋ ستاندارتىنا سايكەس, ءوتىنىشى بىلدىرگەن ازاماتتاردىڭ حاتىنا جاۋاپ بەرۋ مەرزىمى 15 جۇمىس كۇننەن اسپاۋى كەرەك بولاتىن.
قالماحانبەت مۇقامەتقالي,
«ەگەمەن قازاقستان»
الماتى وبلىسى
