جاقىندا قازاقستان رەسپۋبليكاسىنىڭ ستاتيستيكا جونىندەگى كوميتەتى ەلىمىزدەگى ارزان جانە قىمبات پاتەرلەردىڭ رەيتينگىن شىعاردى. ادەتتەگىدەي, ەڭ قىمبات پاتەرلەر استانا, الماتى جانە اتىراۋ قالالارىنا تيەسىلى ەكەن.
قىمبات قالالاردا تۇراتىن تۇرعىندار ءۇشىن مۇنداعى ۇيلەردىڭ ءار شارشى مەترى ءۇش ءجۇز قىرىق مىڭ تەڭگەگە دەيىن جەتەدى.
ال, ەڭ ارزان ۇيلەر تاراز قالاسىنىڭ ەنشىسىندە ەكەن. مۇندا تۇرعىندار شارشىسىنا 116 مىڭ تەڭگەنى شىتىرلاتىپ ساناپ بەرىپ, پاتەرگە قول جەتكىزە الادى.
ودان كەيىن ارزان پاتەرلەر پەتروپاۆل مەن قىزىلوردا قالاسىندا شامالاس دەسە بولادى. قىزىلوردانىڭ ورتالىعىندا ءۇيدىڭ ءبىر شارشى مەترى ورتاشا 141 مىڭ تەڭگەگە پاراپار. وسىعان قاراپ قىزىلوردادا مەملەكەتتىك باعدارلامالار جاقسى جۇمىس جاساپ جاتقاندىعىن انىق بايقاۋعا بولادى. بۇگىندە سىرداريانىڭ سول جاعالاۋىندا سالىنىپ جاتقان ۇيلەردىڭ العاشقى كەزەگى پايدالانۋعا دايىن. وسىعان بايلانىستى وتكەن جىلدىڭ سوڭىندا «تۇرعىن ءۇي قۇرىلىس جيناق بانكى» ء«وز ءۇيىم» باعدارلاماسى بويىنشا كونكۋرس جاريالاعان بولاتىن. بايقاۋ شارتى بويىنشا بىلتىرعى جىلدىڭ 24 جەلتوقسانى مەن بيىلعى جىلدىڭ 14 قاڭتارى ارالىعىندا سول جاعالاۋداعى ەكى ءۇش بولمەلى ۇيلەرگە سالىم سالعاندار ايتۋلى جەڭىلدىككە يە بولادى.
– ء«وز ءۇيىم» باعدارلاماسى 2015 جىلدان باستاپ جۇزەگە اسىپ كەلەدى. ادەپكىدە باعدارلاما تالابى بويىنشا العاشقى جارنا ءۇي باعاسىنىڭ 30 پروتسەنتىن جيناقتاۋ جانە نەسيەنىڭ جىلدىق ۇستەمەسى 8,5 پروتسەنت بولسا, وتكەن جىلدان باستاپ العاشقى جارنا 20 پروتسەنت جانە نەسيە 7 پروتسەنتپەن بەرىلە باستادى. باعدارلامانىڭ ءبىر ءتيىمدى تۇسى كەز كەلگەن ادام قاتىسا الاتىندىعىندا. ەڭ باستىسى, تولەم قابىلەتىن راستاسا بولدى. اتىندا جىلجىمايتىن م ۇلىك بولعانى دا كەدەرگى ەمەس جانە كەز كەلگەن قالادان ءۇي الۋعا مۇمكىندىگى بار,– دەيدى بانك فيليالىنىڭ ورىنباسارى ءىلياس جۇرىنوۆ.
بۇگىندە پايدالانۋعا بەرىلەتىن 115 پاتەردى الۋعا بەس جۇزدەن استام سالىمشى بايگەگە تۇسكەن ەكەن. بايقاۋ شارتى بويىنشا ەڭ ءبىرىنشى كەزەكتە پاتەر الاتىندار كومپيۋتەر ارقىلى اۆتوماتتى تۇردە انىقتالادى. پاتەر الۋ ءۇشىن ەڭ كوپ قارجى قۇيعان سالىمشىلارعا باسىمدىلىق بەرىلەدى. بۇل دەگەنىڭىز, ەشكىمگە داۋ تۋدىرمايتىن قيسىن.
ء«وز ءۇيىم» باعدارلاماسى 14 جىلعا نەسيە ەسەبىمەن بەرىلەدى. مۇنداعى ارتىقشىلىق, العاشقى سەگىز جىلدا نەسيەنى 7 پايىزبەن وتەسەڭىز, سوڭعى التى جىلدا 3,8 پايىزبەن تولەۋگە مۇمكىندىك الاسىز.
ياعني, تولەم سوماسى 67 مىڭ 800 تەڭگە مەن 49 مىڭ 863 تەڭگە ارالىعىندا بولىپ, وسى مەرزىمدە ءۇش بولمەلى ۇيگە قول جەتكىزە الاسىز. الماتى مەن استانا قالاسىندا ءۇش بولمەلى ءۇيدى جالداۋعا پاتەرشى ءجۇز مىڭ تەڭگەدەن ارتىق تولەيتىنىن ەسكەرسەڭىز, تەگىن ءتۇستى دەۋگە دە بولاتىن شىعار. ويتكەنى, پاتەر جالداپ تۇرعان ادام ون جىل وسى قارجىنى ۇزبەي تولەپ تۇرسا دا جالدامالى پاتەر وعان تيەسىلى ەمەس. ال, ءسىز ءوزىڭىزدىڭ جەكەمەنشىك باسپاناڭىز ءۇشىن تەر توگىپ جاتىرسىز.
سونىمەن قاتار, «تۇرعىن ءۇي قۇرىلىس بانكى» فيليال ديرەكتورىنىڭ ورىنباسارى ءىلياس جۇرىنوۆ ەلوردانىنىڭ 20 جىلدىعى, قىزىلوردا قالاسىنىڭ 200 جىلدىق مەرەيتويلارىنا بايلانىستى سول جاعالاۋداعى العاشقى ۇيلەردىڭ شارشى مەترى 120 000 تەڭگەدەن سانالىپ جاتقاندىعىن ايتادى.
پاتەر مۇقتاجدىعىن تارتقان قىزىلوردالىق تۇرعىندار «نۇرلى جەر» باعدارلاماسى بويىنشا دا ءبىر شارشى مەترى - 120 000 تەڭگە بولاتىن ءجاڭا ۇيلەرگە قول جەتكىزىپ جاتىر. وسىنداعى «نۇرلى جەر» باعدارلاماسىنا قاتىسقان قۇرىلىس كومپانيالارىنا «دامۋ» قورى سۋبسيديا ءبولىپ وتىر.
سونىڭ ءبىرى ء«سات سەرۆيس» جشس-ءى قۇرىلىس كومپانياسى. سەرىكتەستىكتىڭ ديرەكتورىنىڭ ورىنباسارى نۇرلان سادىبەكوۆ «نۇرلى جەر» باعدارلاماسى ارقىلى «دامۋ» قورىنان جەتى پايىزبەن نەسيە الىپ, العاشقى ۇيلەردى پايدالانۋعا تاپسىرىپ جاتىرمىز. مەملەكەتتىك قولداۋ وتاندىق كاسىپكەرلىكتى قاناتتاندىرىپ وتىر. اكىمدىكپەن باستاپقى كەلىسىم بويىنشا ءۇيدىڭ شارشى مەترىن 120 000 تەڭگەدەن بەكىتتىك, ەندى سول ۇدەدەن شىعىپ وتىرمىز. حالىقتىڭ قۋانىشى بىزگە دە ورتاق. كومەگىمىز ءتيىپ جاتقاندىعى ءبىزدى دە قۋاندىرادى» دەيدى.
«دامۋ» كاسىپكەرلىكتى دامىتۋ قورى اق ايماقتاىق ديرەكتورى الماس داستانوۆ بۇل باعدارلامانىڭ 2017-2019 جىلدارعا ارنالعاندىعىن ەسكە سالعان. «دامۋ» قورى ءبىر جىل ارالىعىندا 7 پايىزدىق سۋبسيديامەن ءۇش جىلعا توعىز قۇرىلىس كومپانياسىمەن كەلىسىم شارتقا وتىرعان ەكەن. وسى بولىنگەن 1,4 ميلليارد تەڭگەگە قۇرىلىس كومپانيالارى 34 مىڭ شارشى مەتر تۇرعىن ءۇي سالادى.
بۇگىندە قىزىلوردا وبلىسى «نۇرلى جەر» باعدارلاماسىن ىسكە اسىرۋدا رەسپۋبليكاداعى ۇشتىكتە كەلەدى. قالادا قازىر 12 قاباتتى تۇرعىن ءۇيدىڭ قۇرىلىسى اياقتالعان.
ياعني, جاقىن كۇندەردە 560 پاتەردە قونىس تويىن تويلانادى. مەملەكەتتىك باعدارلامالار وسىلايشا ءتاتتى جەمىسىن جەگىزىپ جاتىر.
باقتيار تايجان,
«ەگەمەن قازاقستان»
قىزىلوردا وبلىسى
