چەحيادا قۇراستىرىلعان «L-410» ماركالى ۇشاق جاقىن قاشىقتىقتاعى اۋە ساپارىنا شىعۋعا ارنالعان, جولاۋشىلار سانى دا ىشكى رەيستەرگە شاقتالعان زاماناۋي تەحنيكا ساناتىندا. «جەتىسۋ» اۋە كومپانياسى بۇل ۇشاقتاردى ساتىپ الۋعا «نۇرلى جول» مەملەكەتتىك باعدارلاماسى اياسىندا قول جەتكىزدى.
- الماتى وبلىسى جاڭا جىلدى يگى جاڭالىقپەن باستادى. جاقىندا عانا تالعار اۋدانىندا دەمالىس ورىنىن اشىپ, ءوڭىر تۇرعىندارىنىڭ دەمالۋىنا, سپورتپەن شۇعىلدانۋىنا جاعداي جاسادىق. بۇل - ىشكى ءتۋريزمدى دامىتۋعا باعىتتالعان شارا. بۇگىن تالدىقورعان اۋەجايىنا كەلىپ قونعان جاڭا ۇشاقتار دا وسى ماقساتقا قىزمەت ەتەتىن بولادى. قازىر استاناعا ساپار شەگەتىن جولاۋشىلار سانى ارتتى. سونداي-اق, الاكول جاعالاۋىنا دەمالۋ ءۇشىن كەلەتىن تۋريستەر لەگى كوبەيدى. ەندى ولاردىڭ اۋە جولى ارقىلى كەلۋىنە جاعداي جاساۋىمىز كەرەك. بۇل ءبىزدىڭ الدىمىزعا مەملەكەت باسشىسى نۇرسۇلتان نازارباەۆ جۇكتەگەن مىندەت بولاتىن, - دەيدى وبلىس اكىمى اماندىق باتالوۆ.
ايتپاقشى, بۇل ون توعىز جولاۋشىعا ارنالعان «L-410» ۇشاقتارى «جەتىسۋ» اۋە كومپانياسىنىڭ قۇرىلعالى بەرى ساتىپ العان العاشقى جاڭا تەحنيكاسى ەكەن. ەكى ۇشاقتىڭ ءبىرى تالدىقورعان – استانا – تالدىقورعان باعىتىندا جولاۋشىلار تاسىسا, ەكىنشىسى الاكول جاعالاۋىنا, تالدىقورعان – ءۇشارال – تالدىقورعان باعىتى بويىنشا قىزمەت كورسەتپەك.
قالماحانبەت مۇقامەتقالي,
«ەگەمەن قازاقستان»
تالدىقورعان قالاسى
