ماسەلەن, اقساي تەحنيكالىق كوللەدجى كونتينگەنتتى نەگىزسىز 116 تۇلعاعا كوبەيتىپ, بيۋدجەتتەن زاڭسىز 3 ملن تەڭگە العان. قاراجاتتى الۋ ءۇشىن وقۋدان شىعارىلعان جانە وقۋىن اياقتاعان تۇلعالار جالپى تىزىمگە ادەيى ەنگىزىلگەن.
بوكەيوردا, جالپاقتال, قاراتوبە, تەرەكتى, سىرىم جانە شىڭعىرلاۋ اۋداندارىنىڭ كوللەدجدەرىندە ساباققا قاتىسپاي, ءار جەردە جۇمىس جاساعان ستۋدەنتتەرگە شاكىرتاقى تولەۋ فاكتىلەرى انىقتالىپتى.
مىسالى, س. ەسىمدى ستۋدەنت 2016-2017 جىلدارى تەرەكتى كوللەدجىندە وقي تۇرا, «شىڭعىرلاۋ اۋدانىنىڭ ۆەتەريناريالىق ستانتسياسى» مكك-دا تۇراقتى جۇمىس جاساعان. جانە اي سايىن شاكىرتاقىسىن الىپ تۇرعان.
تەكسەرىلگەن كوللەدجدەردىڭ بارىندە وقۋىن اياقتاعان كوللەدج تۇلەكتەرىنىڭ جۇمىسپەن قامتىلۋى جونىندەگى مالىمەت شىندىققا ساي ەمەس, ياعني اسىرا كورسەتىلگەن.
«اتاپ ايتساق, جالپاقتال اۋدانىنىڭ كوللەدجىندە 2017 جىلى جۇمىسقا ورنالاسۋ كورسەتكىشى قاعاز جۇزىندە 92%-دى قۇراعان. تەكسەرىس كورسەتكىشتىڭ ءىس جۇزىندە 48% ەكەندىگىن كورسەتتى, ويتكەنى 41 ستۋدەنت جۇمىسقا ورنالاسۋ تۋرالى وتىرىك مالىمەت تاپسىرعان» - دەيدى پروكۋراتۋرا.
ورال قالاسىنىڭ گاز, مۇناي جانە سالالىق تەحنولوگيالار كوللەدجىنىڭ كەيبىر ستۋدەنتتەرىنە وقۋ جۋرنالىنا بەلگى قويىلعانمەن, ولار سول كۇندەرى شەتەلدە بولعانى انىقتالدى.
تاسقالا اۋدانىنىڭ كوللەدجىندە باسقا جەردەن كەلىپ وقيتىن ستۋدەنتتەرگە جازعى جانە قىسقى مەرزىمدە جەڭىلدىكپەن جول جۇرۋىنە بولىنگەن 75 مىڭ. تەڭگە بەرىلمەي, شاكىرتتەردىڭ قۇقىعى بۇزىلعان.
زاڭ بۇزۋشىلىقتىڭ ءبىر پاراسى جاتاقحانا ماسەلەسىنە وراي انىقتالعان. ماسەلەن, تەكسەرىلگەن التى كوللەدجدە باسقا قالادان كەلىپ وقيتىن ستۋدەنتتەرگە ارنالعان جاتاقحانا جوقتىعى انىقتالدى. ولار – ورال اقپاراتتىق-تەحنولوگيالىق, ورال پوليتەحنيكالىق, باتىس قازاقستان يندۋستريالدىق, اقساي تەحنيكالىق, ەكونوميكا جانە اقپاراتتىق تەحنولوگيالار, باتىس قازاقستان ينجەنەرلىك-تەحنولوگيالىق كوللەدجدەرى. ال مەملەكەتتىك تاپسىرىستى الۋ ءۇشىن جاتاقحانانىڭ بولۋى – مىندەتتى شارت.
باتىس قازاقستان وبلىسىنداعى جوعارى جانە ارناۋلى وقۋ ورىندارىندا جاتاقحانا جەتىسپەۋشىلىگى بۇرىن دا ايتىلىپ كەلەدى. ءوڭىر باسشىسى التاي كولگىنوۆ وتكەن جىلدىڭ سوڭىندا وبلىستىق ءماسليحات دەپۋتاتتارى الدىندا ەلباسىنىڭ بەس الەۋمەتتىك باستاما باعدارلاماسى بويىنشا 1800 ستۋدەنتكە ارنالعان 5 جاتاقحانا سالۋ بويىنشا دايىندىق جۇمىستارى باستالعانىن حابارلاعان بولاتىن.
پروكۋرورلىق تەكسەرىس ناتيجەسىندە بيۋدجەتكە بارلىعى 8 ملن. تەڭگەدەن استام قاراجات قايتارىلدى جانە جاۋاپكەرشىلىككە 72 لاۋازىمدى تۇلعا تارتىلدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
