بۇل مەكتەپتە كىر تاسىن كوتەرۋ سپورتىنان الەمگە تانىمال بىرنەشە سپورتشى تۇلەپ ۇشقان. جارىستىڭ وسى جەردە ۇيىمداستىرىلۋى دا وسىنداي داستۇرگە بايلانىستى. قازىرگى كۇنى ساڭلاق سپورتشىلاردىڭ ءىزىن لايىقتى جالعاستىرىپ كەلە جاتقان ۇمىتكەرلەر از ەمەس. ولار ءار سالماق دارەجەسىندە 16 جانە 24 كەلىلىك كىر تاسىن ۇرشىقشا ءۇيىرىپ, ۇزدىك ناتيجەلەرگە قول جەتكىزدى.
–وتكەن 2018 جىل اقمولا وبلىسىنىڭ كىر تاسىن كوتەرۋشى سپورتشىلار ءۇشىن جاقسى جەتىستىكتەرمەن اياقتالدى. بيىلعى جاستار جىلىنىڭ العاشقى جارىسىندا بىلىكتى باپكەر ءارى ۇستاز باقتيار جۇمابەكوۆتىڭ جۇلدىزدى شاكىرتىنىڭ ءبىرى, الەمنىڭ 2 دۇركىن چەمپيونى مەرۋەرت سۇلەيمەنوۆا دا كۇش سىناساتىن بولادى. وسى توڭىرەكتەگى جارسۋات اۋىلىنىڭ ارۋى مەرۋەرتتەن وزگە ءىنى-سىڭلىلەرى ۇلگى الادى دەگەن ءۇمىت بار,–دەيدى جارىستىڭ باس تورەشىسى سەرگەي پروحوروۆ.
تارتىستى وتكەن جارىس بارىسىندا ساندىقتاۋ اۋدانىنان اندرەي دۋلين, اندرەي كورج, ماكسيم شنيد, تاتيانا ەرمولاەۆا جانە شالعايداعى جارقايىڭ جەرىنەن ابىلاي قاليبەك, قۋانىش نۇرعوجين, اناتولي شەگلوۆسكي جەڭىستىڭ بيىك تۇعىرىنا كوتەرىلدى. استراحان اۋدانىنىڭ بىرنەشە ورەنى چەمپيون اتانىپ, جۇلدەگەر بولدى.
–الەم چەمپيوناتىنان كەيىن از-كەم تىنىعىپ, وبلىستىق جارىسقا قاتىستىم. وبلىس رەكوردىن جاڭعىرتىپ, بابىمدا ەكەندىگىمدى دالەلدەدىم. ەڭ باستى مەجە ۇستىمىزدەگى جىلى قوستانايدا وتەتىن الەم چەمپيوناتىنا تىڭعىلىقتى دايىندالۋ. ءسويتىپ, الەم بىرىنشىلىگىنە جولداما جەڭىپ الۋ,–دەيدى حالىقارالىق دارەجەدەگى سپورت شەبەرى مەرۋەرت سۇلەيمەنوۆا.
سپورتتىڭ وسىناۋ ءتۇرىنىڭ الداعى بولاشاقتا اقمولا وبلىسىنىڭ ءار ايماعىندا قانات قاعاتىنىنا ماماندار نىق سەنىپ ارتىپ وتىر.
بايقال ءبايادىل,
«ەگەمەن قازاقستان»
اقمولا وبلىسى
