10 جەلتوقسان مەن 8 قاڭتار ارالىعىندا «باتىس» وڭىرلىك قولباسشىلىعىنىڭ تولىق جەكە قۇرامى ماماندىق بويىنشا دايارلىق ساباقتارىنا جۇمىلدىرىلعان بولاتىن. بۇل ءىس-شارانىڭ باستى ماقساتى اسكەري بولىمدەردە وقىتۋ پاندەرى بويىنشا جەكە قۇرامىنىڭ وقىتىلۋ دەڭگەيىن, اسكەري قىزمەتشىلەردىڭ وزدەرىنىڭ لاۋازىمدىق جانە ارنايى مىندەتتەرىن ورىنداي ءبىلۋ شەبەرلىكتەرى مەن دارەجەسىن ايقىنداۋ بولدى.
دايارلىقتى ساپالى وتكىزۋ ماقساتىندا 22 ماماندىق بويىنشا تاجىريبەلى وفيتسەرلەر مەن سەرجانتتار قۇرامىنان تاعايىندالعان 400-گە جۋىق ينسترۋكتور-مامان ىرىكتەلگەن بولاتىن. ساباقتار بارىسىندا ولار ءاۆتوموبيلدى تەحنيكا جۇرگىزۋشىلەرى, بروندى تانكتى تەحنيكانىڭ مەحانيك-جۇرگىزۋشىلەرى, كوزدەۋشى وپەراتورلار, ارتيللەرياشىلار, بايلانىس, ينجەنەرلىك-ساپەرلىك, بارلاۋ بولىمشەلەرىنىڭ ماماندارى بويىنشا اسكەري قىزمەتشىلەردى دايىنداۋعا ەرەكشە نازار اۋداردى, سونداي-اق جەكە قۇرامنىڭ ءارتۇرلى وق-دارىلەردى, تەحنيكانى, م ۇلىكتى قولدانۋ جانە ولاردى پايدالانۋ قاعيدالارىنىڭ تاسىلدەرى مەن ارەكەت ەتۋ قاعيداتىن جان-جاقتى وقىپ-ۇيرەنۋىنە زەيىن قويدى.
ماماندىق بويىنشا دايىندىقتان وتكەن اسكەري قىزمەتشىلەردى وقىتۋدىڭ نەگىزگى پاندەرى بويىنشا سىناقتاردى قابىلداۋ تالداۋى, جالپى العاندا, ماماندار وزدەرىنىڭ فۋنكتسيونالدىق مىندەتتەرىن ورىنداۋى ءۇشىن قاجەتتى ءبىلىم العاندارىن كورسەتتى.
باقىلاۋ ساباقتارىنىڭ قورىتىندىسى بويىنشا ۇزدىك ماماندارى انىقتالدى. ولاردىڭ قاتارىندا «ۇزدىك بولىمشە كومانديرى» - كىشى سەرجانت ەلدار بۋزرۋكوۆ, «ۇزدىك تانك كومانديرى» – سەرجانت جالعاس اديلوۆ, «ۇزدىك نۇسقاۋشى-وپەراتور» - مەرزىمدىك قىزمەتتەگى قاتارداعى جاۋىنگەر الەكساندر سلاۆسكي, «ۇزدىك جۇرگىزۋشى» – اعا سەرجانت رادمير اليسانوۆ, «ۇزدىك گراناتااتقىش» - مەرزىمدىك قىزمەتتەگى قاتارداعى جاۋىنگەر يۆان زەلينسكي بار. ەندىگى كەزەكتە, اسكەري قىزمەتشىلەر اسكەرلەردى دايارلاۋدىڭ كەلەسى كەزەڭى - بولىمشەلەردىڭ ۇيلەسۋىن باستاپ كەتتى. وندا اسكەري قىزمەتشىلەر وزدەرىنىڭ بولىمشەلەرى قۇرامىندا جيناقتاعان ماشىقتىقتارىن ءىس جۇزىندە پىسىقتايدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
