جەتىسۋدىڭ كىندىك قالاسىنىڭ ساۋلەتى مەن سالتاناتىن, ادامدار اراسىنداعى سىيلاستىق پەن قۇرمەت, ماحاببات سەزىمىن دارىپتەيتىن تۋىندى كورەرمەنىن بىردەن باۋراپ الدى.
ەگىز ۇلدىڭ بالالىق شاعىنان باستاۋ الاتىن وقيعا ميۋزيكل جانرىندا ادەمى ادىپتەلىپ, قازىرگى زامان جاستارى اراسىنداعى ادامگەرشىلىك قاتىناس, ماماندىق تاڭداۋ مەن وتانشىل, مەملەكەتشىل بولۋ ۇعىمدارىن ايشىقتاۋعا ۇلاسقان. تاعدىر قالاۋىمەن ەكى بولەك ورتادا وسكەن ەگىزدەردىڭ ۇلكەن ءومىر جولىن تاڭداۋداعى قاتەلىگى مەن جەتىستىگى, اۋىل مەن قالا تىرشىلىگىنىڭ شىنايى كورىنىستەرى, جاستار ساناسىنداعى قايشىلىقتى سۇراقتارعا جاۋاپ ىزدەۋ سيىقتى تارتىمدى سيۋجەتتەر كورەرمەندى ماعىنالى ازىلمەن كۇلدىرىپ, ءماندى مۋزىكامەن شابىتتاندىرىپ جانە استارلى ويمەن تولعانۋعا جەتەلەيدى.
- اۋەلگىدە بۇل ميۋزيكلدى قىسقا مەتراجدى فيلم رەتىندە ءتۇسىرۋدى ويلاعان ەدىك. وقيعا جەلىسىنىڭ ءوربۋى ءتۇسىرۋ توبىن دا اكتەرلەردى دە قىزىقتىرىپ, لەنتا 50 مينۋتقا سوزىلدى. ءبىز بۇل جۇمىسىمىزدا جالاڭ اقىل ايتۋدان اۋلاق بولدىق: اۋىل مەن قالا ءومىرى اراسىنداعى الشاقتىق, ادامداردىڭ داۋلەتتى تۇرمىسى مەن الەۋمەتتىك جاعدايى تومەن ورتانىڭ كەرەعار سيپاتىن, تۋعان جەرگە دەگەن قۇرمەت پەن الەم تانۋعا دەگەن قۇشتارلىقتىڭ دا قىرلارىن جاستارعا, جالپى كورەرمەنگە ۇىعىنىقتى جەتكىزۋگە تىرىسىتىق. وسى ءفيلمدى تۇسىرۋگە قولداۋ بىلدىرگەنى ءۇشىن الماتى وبلىسىنىڭ اكىمى اماندىق باتالوۆقا شىعارماشىلىق توپ اتىنان راحمەت ايتقىم كەلەدى, - دەيدى ميۋزيكل رەجيسسەرى ەرلان وشاقباەۆ.
تالدىقورعان قالاسىندا نەبارى 15 كۇننىڭ ىشىندە تۇسىرىلگەن ءفيلمنىڭ باستى كەيىپكەرى – ەگىزدەر ءرولىن جاس اكتەر ەرىك قامي سومداسا, بۇعان دەيىن كورەرمەنگە كوزتانىس بولعان كارينا جۇمالى, ايان تولەپبەرگەن, بەكسۇلتان قازىبەك سياقتى ارتىستەر دە ميۋزيكلدەگى رولدەرىن ءساتتى ويناپ شىقتى.
تالدىقورعانداعى «اتامەكەن» كينوتەاترىندا وتكەن كورسەتىلىمگە ارانيى كەلگەن وبلىس اكىمى اماندىق باتالوۆ ميۋزيكلدى تاماشالاعان كەيىن ءتۇسىرىلىم توبىن قۇتتىقتادى.
- ميۋزيكل كوڭىلدى ءارى شىنايى فيلم بولىپ شىققان ەكەن.. بۇگىنگى فيلمدە تەك قالانى عانا ەمەس, ونىڭ ەڭ باستى بايلىعى – ونىڭ مەيىرىمدى دە دارىندى تۇرعىندارىن دا كورسەتە بىلدىڭدەر. كرەاتيۆتى ويلارىڭ ءۇشىن كوپ راحمەت ايتامىن. جۋىردا جۋرناليستەرگە بەرگەن سۇحباتىندا ەلباسى تالدىقورعان تۋرالى جاقسى پىكىرىن ءبىلدىردى. ءبىز سول باعاعا قۋانىپ قانا قويماي, سوعان لايىق بۇدان ءارى دە جۇمىس جاساۋعا ءتيىسپىز. ءبىز ءوز تاراپىمىزدان جاستاردىڭ باستامالارىن قاشاندا قولدايمىز. وسى جىلدى پرەزيدەنت جاستار جىلى دەپ جاريالادى. بۇل جىل ءوز مۇمكىندىكتەرىڭدى بارىنشا اشۋعا مۇمكىندىك بەرەتىن ەرەكشە جىل بولماق, – دەدى اماندىق باتالوۆ.
قالماحانبەت مۇقامەتقالي,
«ەگەمەن قازاقستان»
الماتى وبلىسى
