«مەملەكەتتىڭ باستى مىندەتى - ءوز ازاماتتارىن قورعاۋ. سوندا عانا ازاماتتار قاي جەردە جۇرمەسىن ءوزىنىڭ قورعاۋشىسى بار ەكەنىنە سەنىمدى بولادى», - دەدى ي. گريگۋلە-پەتەرس.
ونىڭ ايتۋىنشا, سيريادان 47 قازاقستان ازاماتىنىڭ ەۆاكۋاتسيالانۋىن ەۋروپالىق پارلامەنت جوعارى باعالاعان.
«قۇقىق قورعاۋ ورگاندارى سىرتقى ىستەر مينيسترلىگىمەن بىرلەسىپ جۇرگىزگەن گۋمانيتارلىق وپەراتسيانى ءبىز وتە جوعارى باعالايمىز. وسىنداي قيىن جاعدايدا ءارى كيكىلجىڭ ورتالىعىندا كۇردەلى وپەراتسيانى ءساتتى ىسكە اسىرۋ وڭاي ەمەس», - دەدى ەۋروپارلامەنت دەپۋتاتى.
ونىڭ پىكىرىنشە, قازاقستاندىق ازاماتتاردى سيرياداعى كيكىلجىڭ ايماعىنان قايتارۋ بويىنشا ارنايى جۇرگىزىلگەن گۋمانيتارلىق وپەراتسيا وتاندىق ديپلوماتتاردىڭ دايىندىعىنىڭ جوعارى دەڭگەيدە ەكەندىگىن كورسەتەدى.
«مەن بۇعان دەيىن سىزدەردىڭ ديپلوماتتارىڭىزبەن بىرگە جۇمىس ىستەگەنمەن, سىرتقى ىستەر مينيسترلىگىنىڭ كادرلارى الەمدىك دەڭگەيدە دەۋگە بولاتىنداي وتە جوعارى بىلىكتى ماماندار. سوڭعى وپەراتسيا سونى دالەلدەدى», - دەدى ي. گريگۋلە-پەتەرس.
«وسى وقيعاعا قاراي وتىرىپ قازاقستان ءاربىر ازاماتىن قورعايتىنىن كورەمىن, ءاربىر نازىك جان, قاريا نەمەسە بالا - بۇل مەملەكەتتىك باعا جەتپەس بايلىعى. سولاي دا بولۋى كەرەك», - دەدى ول.
ونىڭ ويىنشا, ەو, رف, اقش سەكىلدى الەمدەگى بىرنەشە مەملەكەت قانا اينالىساتىن ءوز ازاماتتارىن ماقساتتى تۇردە ەلىنە قايتارۋ ءىسى «باسقالارعا جاقسى ۇلگى بولماق».
«بۇل وقيعا قازاقستاننىڭ كۇردەلى جاعدايدا شەشىم قابىلداۋدا جاقسى ءارى سەنىمدى ارىپتەس ەكەندىگىن كورسەتەدى», - دەپ تۇيىندەدى ي. گريگۋلە-پەتەرس.
