«وكىنىشكە قاراي, بىزدە ەت, قۋىرداق پەن باۋىرساقتان باسقا ۇلتتىق تاعام جوق سەكىلدى كوزقاراس قالىپتاسقان. تۋريستەرگە كوبىنە وسى تاعامداردى ۇسىنامىز. بۇگىندە ەلىمىزدە قازاقتىڭ ەجەلگى داستارحانىن قايتا جاڭعىرتۋ جۇمىستارى جۇرگىزىلىپ جاتىر. قۋانتارلىق, قۇپتارلىق دۇنيە. مەنىڭ بىلۋىمشە, شىعىس قازاقستاندا, وسكەمەندە بۇل جۇمىسپەن شۇعىلدانىپ جاتقان ەشكىم جوق. سوندىقتان وسى ءىستى قولعا الۋدى ءجون دەپ شەشىپ, التى تاعام ءتۇرىن ازىرلەدىك. ءبىزدىڭ ماقسات – وزبەك اسحاناسى, ۇيعىر اسحاناسى دەگەن سەكىلدى «التاي داستارحانى» برەندىن قالىپتاستىرۋ, ۇمىتىلا باستاعان ۇلتتىق تاعامداردى زامانعا ساي جاڭعىرتۋ. ەڭ ماڭىزدىسى, ۇلتتىق تاعامدارىمىزدى شەت ەلدىك تۋريستەرگە تانىستىرۋ», - دەيدى وسكەمەندىك كاسىپكەر مۇحتار تويبازاروۆ.
كاسىپكەر دايىنداعان التى اس ءمازىرىنىڭ ۇشەۋى - جاۋجۇرەك, ۇلپەرشەك, مي پالاۋ اتالاتىن قازاقتىڭ ەجەلگى تاعامدارى. قالعان ءۇش تاعام ەۋروپالىق ۇلگىدە ازىرلەنىپتى. ماسەلەن, تارتىلعان جىلقى ەتىنەن دايىندالعان تار-تار اتالاتىن تاعامعا كادىمگى ەزىلگەن قۇرت پەن قىزىل سارىمساق پەن چەرەمشا, ىستالعان قۇيرىققا سارىمساق پەن قىزىل جيدەكتىڭ قايناتپاسى, جىلقى ەتىنە شىرعاناق قوسىلىپتى. «التايدا وسەتىن شوپتەردى دە پايدالاندىق. مي پالاۋعا ءۇي قايماعىن قوستىق, قازىدان پاشتەت جاساپ, قويدىڭ جۇرەگىنە سالدىق. ۇلپەرشەكتى وسىنداي ادىسپەن دايىندادىق. ءار ايماقتىڭ تاعام دايىنداۋ ەرەكشەلىگى بار. ماسەلەن, سەمەي جاقتىڭ قۇرتى وزگەشە دايىندالادى. ءۇرجاردىڭ قىزىل ىرىمشىگى قانداي! وڭىرىمىزدە تۇرىپ جاتقان دياسپورالاردىڭ دا وزىندىك اس ءمازىرى قالىپتاسقان. ءبىز سونىڭ ءبارىن قاراستىرىپ, «التاي داستارحانى» برەندىن قالىپتاستىرىپ, شىعىس قازاقستاننىڭ ەرەكشەلىگىن كورسەتكىمىز كەلەدى», - دەيدى كاسىپكەر.
ازامات قاسىم,
«ەگەمەن قازاقستان»
وسكەمەن
