قاليعۇمار قابدەشوۆ – قازاقتىڭ بەلگىلى فوتوسۋرەتشىلەرىنىڭ ءبىرى. بىرنەشە حالىقارالىق, رەسپۋبليكالىق فوتوكورمەلەردىڭ جۇلدەگەرى. كەڭەس وكىمەتى كەزىندە شەتەلدەرمەن ىنتىماقتى بايلانىس ورناتۋمەن شۇعىلداناتىن «دوستىق» قوعامى ارقىلى ۇيىمداستىرىلعان سۋرەت كورمەلەرىمەن ءۇندىستان, بولگاريا, رۋمىنيا, چەحوسلوۆاكيا جانە ت.ب. مەملەكەتتەردە بولعان.
1964 جىلدان باستاپ سۋرەتتەرى اۋداندىق, وبلىستىق, رەسپۋبليكالىق باسىلىمداردا, ونىڭ ىشىندە «سوتسياليستىك قازاقستان», «كازاحستانسكايا پراۆدا», «قازاق ادەبيەتى» گازەتتەرىندە, «مادەنيەت جانە تۇرمىس» جۋرنالىندا ءجيى شىعىپ تۇرىپتى. 1974 جىلدان قازاقستان جۋرناليستەر وداعىنىڭ ايگىلى «جۋرناليست» فوتوستۋدياسىندا قىزمەتتە بولىپ, فوتووبەكتيۆىمەن تالاي-تالاي تاعىلىمى مول قاس-قاعىم ءساتتى قالت جىبەرمەي قاعىپ الىپ جۇرگەن...
– 1981 جىلدىڭ اقپان ايى ەدى, – دەيدى بىزبەن اڭگىمەسىندە وي كوزىمەن وتكەن كۇندەردىڭ تەرەڭ سىرىنا ۇڭىلگەن قاليعۇمار اعا اڭقىلداي سويلەپ. – ماسكەۋدە كەڭەس وداعى كومپارتياسىنىڭ XXVI سەزى ءوتىپ جاتقان. سەزگە مەن الماتىداعى «جۋرناليست» فوتوستۋدياسى اتىنان باردىم. دەلەگاتتار «موسكۆا» قوناق ۇيىنە ورنالاسقان. مەن مىنا سۋرەتتى تۇسىرەردە سوندا ءجۇر ەدىم. ءبىر ۋاقىتتا قاراسام, انادايدان شىڭعىس ايتماتوۆ پەن راسۋل عامزاتوۆ كەلە جاتىر ەكەن! سودان الدارىنان شىعىپ, اسىعىس وبەكتيۆكە الۋعا نيەتتەنگەنىممەن, مەنى بايقاسا دا, ول كىسىلەردىڭ توقتايتىن ءتۇرى كورىنبەدى, جانىمنان تەزدەتىپ وتە شىقتى. سول كەزدە سوڭدارىنان جۇگىرە جونەلدىم دە, اياق استىنان بويىما بارىنشا باتىلدىق ءبىتىپ:
«شىڭعىس اعا, مەن ءوزىڭىز جاقسى كورەتىن قازاقستاننان كەلگەن ءفوتوتىلشىمىن, سىزدەردەي ادامزاتتىڭ اسىلدارىن, وسى زاماننىڭ عۇلامالارىن تۇسىرمەگەندە, ءبىز كىمدى تۇسىرەمىز؟!» دەپ داۋىستادىم. ويتكەنى مۇنداي مۇمكىندىكتى جىبەرىپ السام, ءومىر بويى وكىنەر ەدىم. وسى ساتتە شىڭعىس اعا كىلت توقتاي قالدى دا, «راسۋل, قوي, مىنا باۋىرىمىز, قازاق جىگىتىنىڭ بەتىن قايتارمايىق. ءوزىنىڭ ءسوزى وزگەشە جاقسى ەكەن!» دەپ جارقىلداي كۇلدى. مىناۋ سول سۋرەت, ورتادا تۇرعان زايىبىم.
جالپى, بۇل سۋرەت باسپاسوزدە جاريالانباعان ەكەن, تەك بىرنەشە رەت اۆتوردىڭ جەكە كورمەلەرىنە عانا قويىلىپتى.
بەرىكباي قادىقوۆ,
جۋرناليست
الماتى وبلىسى,
قاراساي اۋدانى
