بىرىنشىدەن, جاھاندىق تسيفرلاندىرۋ ەلەكتروندى كوممەرتسيا نارىعىنا جول اشتى. بۇل ەل ەكونوميكاسىنىڭ باستى ءبىر بۋىنىنا اينالىپ كەلەدى. سوڭعى التى جىلدىڭ ىشىندە ەلەكتروندى كوممەرتسيا رىنوگى 2,5 ەسەگە دەيىن ءوستى. سونداي-اق بۇل ءۇردىس پوشتا جونەلتىلىمدەرى كولەمىنىڭ وسۋىنە دە العىشارت قالادى.
وسى ورايدا «قازپوشتا» اق تاياۋ ۋاقىتتا 35 ميلليون زاتتاي جونەلتىلىمدى (پوسىلكا) دىتتەگەن جەرىنە جەتكىزۋدى جوسپارلاپ وتىر. ونىڭ 45 پايىزى ەل ىشىندەگى ۇلەستى قۇرايدى. ەكىنشىدەن, جونەلتىلىمدى جەتكىزۋ ۋاقىتىن قىسقارتا وتىرىپ, ەلىمىزدىڭ باتىس وڭىرلەرىن قامتۋ ءۇشىن قىتايدان جانە رەسەيدەن اقتوبەگە تىكەلەي اۋە رەيستەرىن اشۋ جولدارى بەلگىلەندى. قازىرگى كەزدە ەلىمىزدە پوشتا جونەلتىلىمدەرىنىڭ كولەمى مەن اۋقىمى اجەپتاۋىر وسكەندىكتەن الماتى قالاسىنداعى اقپاراتتىق-لوگيستيكالىق ورتالىققا تۇسەتىن سالماق پەن جۇكتەمە وسە تۇسكەنى دە بەلگىلى بولىپ وتىر. اقتوبەدەگى وسى تەكتەس جاڭا قۇرىلىم جۇكتەمەنى ازايتۋعا جانە حالىقارالىق پوشتا جونەلتىلىمدەرىنىڭ ۋاقىتى مەن جولىن اجەپتاۋىر قىسقارتۋعا وڭ اسەرىن تيگىزبەك. بۇل الو-نىڭ ءۇشىنشى ارتىقشىلىعى.
تورتىنشىدەن, الداعى ۋاقىتتا تەمىر جول ماگيسترالدارى باعىتتارىندا ارناۋلى پوشتا ۆاگوندارىن پايدالانۋ تاجىريبەسى توقتاتىلماق. ياعني پوشتا بولاشاقتا ەلىمىزدەگى تاياۋ جانە الىس شەتەلدەرگە اۋە رەيستەرى ارقىلى جەتكىزىلەدى. ال ەل ىشىندە بۇل ماقساتتا جۇيرىك اۆتوكولىكتەر ءتيىمدى دەپ تابىلعان.
اقتوبە اقپاراتتىق-لوگيستيكا ورتالىعى وڭىرلەر اراسىندا تۇڭعىش رەت پايدالانۋعا بەرىلۋىمەن ەرەكشەلەنەدى. بۇل جونىنەن وندىرىستىك ءوڭىر الماتى مەن استانا مەگوپوليستەرىنە عانا جول بەرەدى. ايتالىق بۇعان دەيىن مۇنداعى پوشتا سۇرىپتاۋ ۋچاسكەسى كۇنىنە 6000 جونەلتىلىمدى جۇيەگە كەلتىرىپ ازىرلەسە, «باتىس» جاڭا لوگيستيكا ورتالىعىنىڭ اشىلۋىنا وراي بۇل كورسەتكىشتى ءتورت ەسەگە دەيىن ۇلعايتۋعا مۇمكىندىك تۋدى. ونىڭ 40 پايىزى ۇساق پاكەتتەر بولسا, 25 پايىزىن حاتتار قۇرايدى. 35 پايىزى – زاتتاي سالەمدەمەلەر.
زاماناۋي لوگيستيكا مەن سۇرىپتاۋ ورتالىعىنىڭ جالپى كولەمى 3500 شارشى مەتردى قۇرايدى. ونىڭ ىسكە قوسىلۋىنا بايلانىستى 80 جاڭا جۇمىس ورنى اشىلدى. «باتىس» بۇگىنگى زامانعى قوندىرعىلارمەن جانە جاڭا تسيفرلى تەحنيكالارمەن تولىقتاي جابدىقتالعان. مۇندا قاۋىپسىزدىك جانە بەينە باقىلاۋ جۇيەلەرى جۇمىس ىستەيدى. كەشەندى قۇرىلىم حالىقارالىق جونەلتىلىمدەردى كىدىرتپەي جەتكىزۋگە مۇمكىندىك تۋعىزادى. سونداي-اق ءىرى ءارى سالماعى اۋىر پوشتا جونەلتىلىمدەرىن قابىلداۋعا, جونەلتۋگە جانە تاسىمالداۋعا نەگىز قالايدى. بۇعان قوسا «فۋلفيلمەنت» قىزمەتىن جولعا قويۋعا جاردەمدەسەدى. اتالعان جاڭا تەرمين قانداي تۇسىنىكتى بىلدىرەدى؟ ءبىز بۇل ساۋالدى «قازپوشتا» اق اقتوبە وبلىستىق فيليالىنىڭ توراعاسى سەرىك بەردەنوۆكە قويعان ەدىك.
– «فۋلفيلمەنت» قىزمەتى «تسيفرلى قازاقستان» مەملەكەتتىك باعدارلاماسىن جۇزەگە اسىرۋعا سايكەس «قازپوشتا» جۇيەسىنە ەنگىزىلگەن. اتالعان جوبا ەلىمىزدىڭ اۋماعىندا ەلەكتروندىق كوممەرتسيا قىزمەتىن جاپپاي ورىستەتۋدى كوزدەيدى. ياعني «فۋلفيلمەنت» ورتالىعى دەگەنىمىز, تۇرعىندارعا ينتەرنەت-دۇكەننىڭ كەشەندى قىزمەتىن ۇسىنادى. بۇگىندە اقتوبەدەگى وسى تەكتەس ورتالىق قاجەتتى قوندىرعىلارمەن تولىق جابدىقتالعان. سونىڭ ارقاسىندا جىلدا 160 مىڭ ينتەرنەت-دۇكەن جونەلتىلىمدەرىن رەتتەۋ مۇمكىندىگى تۋدى. بۇل رەتتە بىزگە «اكرۋنو» جشس اتالعان اۋقىمدى جوبانى ازىرلەۋ مەن ەنگىزۋگە ۇلكەن كومەگىن تيگىزدى, – دەدى ول.
«قازپوشتا» جۇيەسىنە ەنگىزىلگەن جاڭا جوبا بيزنەس جۇرگىزۋ ءۇشىن جايلى ورتا قالىپتاسۋىنا دا اسەرىن تيگىزەدى. جوبا جەتەكشىلەرى رەسپۋبليكا بويىنشا «قازپوشتانىڭ» 3500 بولىمشەسى بار ەكەنىن ەسكەرگەن جاعدايدا ينتەرنەت-دۇكەنگە ارقا سۇيەيتىن سالالىق بيزنەس وتە ءتيىمدى ەكەنىن العا تارتادى.
تەمىر قۇسايىن,
«ەگەمەن قازاقستان»
اقتوبە
