ەلوردا بيلىگى استانانىڭ ىسكەرلىك تۋريزم جانە يننوۆاتسيالار ورتالىعى رەتىندەگى مارتەبەسىن نىعايتۋ باعىتىنداعى شارالاردى جۇزەگە اسىرۋدى جالعاستىرۋدا. قالا اكتيۆىمەن كەزدەسۋ بارىسىندا استانا اكىمى باقىت سۇلتانوۆ بيىل ەلوردادا قالالىق تۋريزم بويىنشا دۇنيەجۇزىلىك UNWTO ءسامميتى وتەتىنىن ايتتى.
ەستەرىڭىزگە سالا كەتەيىك, سەگىزىنشى مارتە وتكىزىلگەلى وتىرعان سامميت ورتالىق ازيادا تۇڭعىش رەت ۇيىمداستىرىلماق. جيىننىڭ قازاقستاننىڭ باس قالاسىندا وتەتىنى وڭتۇستىك كورەيانىڭ استاناسىندا ۇيىمداستىرىلعان 7-ءشى جاھاندىق UNWTO ءسامميتى كەزىندە بەلگىلى بولدى.
سونىمەن قاتار, Routes Silk Road اۆيامارشرۋتتار فورۋمى, Comic Con كوستيۋمدەر فەستيۆالىن وتكىزۋمەن قاتار, جەنەۆا قالاسىندا ورنالاسقان حالىقارالىق Seedstars بيزنەس-اكسەلەراتورىمەن بىرلەسىپ, «استانا» حالىقارالىق قارجى ورتالىعى اۋماعىندا قالالىق يننوۆاتسيالىق الاڭدى اشۋ كوزدەلىپ وتىر. بۇل تمد-دا Seedstars باسقاراتىن العاشقى كوۆوركينگ-ورتالىق بولادى, ونىڭ جەلىسىنە 70 مىڭنان استام ستارتاپشى, كاسىپكەرلەر مەن ينۆەستورلار ەنەدى.
