بۇگىن ءوڭىر باسشىسىنىڭ توراعالىعىمەن وتكەن وتىرىستا مەرەكەلىك شارالاردىڭ الدىن الا جوسپارى قارالدى, سولاردىڭ ىشىندە الەمگە تانىمال اقتوبەلىك ديماش قۇدايبەرگەننىڭ دە كونتسەرتى بار.
سونىمەن بىرگە وبلىس اكىمى بيىل جىل بويى حالىقارالىق, رەسپۋبليكالىق, وڭىرلىك جانە وبلىستىق دەڭگەيدەگى كوپتەگەن ءىس-شارا وتەتىنىن جانە ۇيىمداستىرۋشىلار كوڭىل كوتەرەتىن باعدارلامالارمەن شەكتەلمەيتىنىن اتاپ ءوتتى.
«باستىسى – بۇل كەيىن قالا تۇرعىندارى مەن قوناقتارىنا وسى كۇندى ەسكە سالاتىن, وبلىس ورتالىعىنىڭ ءارى قاراي دامۋىنا قىزمەت ەتەتىن جاڭا الەۋمەتتىك جانە وندىرىستىك نىسانداردىڭ اشىلۋى. ەشبىر اقتوبەلىك بۇل ۇلكەن ءىس-شارادان تىس قالماۋى ءتيىس»,- دەدى بەردىبەك ساپارباەۆ.
بۇگىندە شارالار جوسپارىنا 3 600 جاڭا جۇمىس ورنىن قۇرا وتىرا, كەم دەگەندە جيىرما ونەركاسىپ نىسانىن, التى كوكونىس قويماسى مەن جىلىجاي, 28 قىزمەت كورسەتۋ سالاسىنىڭ نىساندارىن اشۋ كىردى. 3100-دەن اسا پاتەر, جاڭا مەكتەپتەر مەن بالاباقشالار, ساياباقتار مەن گۇل باقتارى پايدالانۋعا بەرىلەدى.
سونداي-اق, اقتوبەدە بوكەنباي باتىرعا, ەسەت باتىر مەن اقتوبە كەڭەسىنىڭ ءبىرىنشى توراعاسى ۆاسيلي زينچەنكوعا ەسكەرتكىشتەر اشىلادى. اقتوبەنىڭ 150 جىلدىعىنا ارناپ مونۋمەنت, جيىرما كىشىگىرىم ساۋلەتتىك پىشىن تۇرعىزۋ, مەرەكە ەمبلەماسى – لوگوتيپتى ازىرلەۋ, قالانىڭ تاريحى مەن دامۋى جايلى دەرەكتى فيلم ءتۇسىرۋ جۇمىستارى باستالىپ كەتتى. سول كۇنى قايىرىمدىلىق شارالارىنا دا ەرەكشە نازار اۋدارىلاتىن بولادى.
ايتا كەتەيىك, ءوڭىردىڭ 12 اۋدانى وبلىس ورتالىعىنىڭ مەرەيتويىنا ارناعان سىيلىعى رەتىندە جاڭا الەۋمەتتىك نىسانداردى سالۋعا جانە اباتتاندىرۋعا نيەتتى.
بۇل - اقتوبەنىڭ 150 جىلدىعىنا وراي وتكىزىلەتىن ءىس-شارالاردىڭ كىشكەنە بولىگى عانا.
