اقتوبە قالاسىنىڭ تۇرعىندارى 5 شىلدە كۇنى دەنساۋلىق ساياباعىنا جينالىپ, قان قىسىمىن ولشەتتى. الاڭدا 500 دارىگەر وتىرىپ, ءاربىر اقتوبەلىكتىڭ قان قىسىن ولشەپ, ولارعا قاجەتتى كەڭەس بەردى. ءار دارىگەر ءبىر ادامعا 3-4 مينۋت ۋاقىتىن عانا ءبولدى. الاڭدا كەزەك بولىپ, الدىمەن ادامداردىڭ جەكە كۋالىگى تىركەلدى. كەيىن ولار قان قىسىمىن ولشەتىپ, ارنايى ءنومىر الدى.
بارلىعى 80 باقىلاۋشى جۇمىس ىستەپ, دارىگەرلەردىڭ ءىس-ارەكەتىن بەينەكامەراعا ءتۇسىردى.
«اقتوبە وبلىسىنىڭ دارىگەرلەرى ءۇشىن بۇگىن ەرەكشە كۇن. گيننەستىڭ رەكوردىن جاڭارتقانى تۋرالى اقپارات رەسمي راستالدى. 5 شىلدە كۇنى ءبىر ساعات ىشىندە 4270 ادامنىڭ قان قىسىمى ولشەندى. الەمدىك رەكورد ورناتۋ ءۇشىن وبلىستىق دەنساۋلىق ساقتاۋ باسقارماسى سۇرانىس بەردى. اكتسيا دەنساۋلىق ساياباعىندا ءوتتى. وسى ارقىلى ءبىز قان قىسىمى دەرتىنە نازار اۋدارتۋدى قالادىق. اقتوبە وبلىستىق دەنساۋلىق ساقتاۋ باسقارماسى سول ۋاقىتتا قىزمەت ەتكەن دارىگەرلەرگە العىس بىلدىرەدى»,- دەپ حابارلادى وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ.
