ماڭعىستاۋ اۋدانىندا العاش رەت وتكىزىلگەن تاجىريبە تاراتۋ سەمينارى التى سەكتسيا بويىنشا جۇمىس ىستەدى. مەكتەپ ديرەكتورلارىنىڭ باسىن قوسقان «جاڭارتىلعان ءبىلىم مازمۇنىن ەنگىزۋ جاعدايىندا ءبىلىم بەرۋ پروتسەسىن ۇيىمداستىرۋ ەرەكشەلىكتەرى» سەكتسياسىندا مەكتەپ ديرەكتورى جاھاندىق ازامات تۇسىنىگى جانە ونى ورتا مەكتەپتەردە ەنگىزۋدىڭ ماڭىزدىلىعى جونىندە بايانداپ, كاسىبي باعدار بەرۋ جۇمىستارىن ۇيىمداستىرۋ تۋرالى ايتتى. وڭىردەگى پەداگوگيكالىق شەبەرلىك ورتالىعىنىڭ ديرەكتورى ق.بورانباەۆا «ۇجىمدى باسقارۋ: كوشباسشىلىق جانە كوماندالىق جۇمىس» تاقىرىبىندا وي ءوربىتتى.
«مۇعالىمنىڭ كاسىبي دامۋى – ساپالى ءبىلىم نەگىزى» سەكتسياسىندا زياتكەرلىك مەكتەپتىڭ ۇستازدارى ماڭعىستاۋ اۋدانىنداعى مەكتەپ ديرەكتورلارىنىڭ بەيىندى جۇمىستار جونىندەگى ورىنباسارلارىنا مۇعالىم كوشباسشىلىعى ارقىلى مۇعالىمنىڭ كاسىبي دامۋىنا ىقپال ەتۋ جولدارىمەن, ءىس-ارەكەتتەگى جانە ساباقتى زەرتتەۋ تاجىريبەسى, ءادىس-تاسىلدەرى تۋرالى باياندادى.
بيىل كۇزدە استانا قالاسىندا وتكەن ح «جاڭا ءداۋىردىڭ مەكتەبى» عىلىمي-تاجىريبەلىك كونفەرەنتسياسىندا الەمنىڭ 24 ەلىنەن جينالعان ءبىلىم ساراپشىلارى بالانى تاربيەلەۋ جۇمىستارى جايىندا ماسەلە كوتەرىپ ونى مەكتەپتە جۇيەلەۋ تۋرالى, بالانى مەكتەپ اياسىندا تاربيەلەۋ وزەكتىلىگىن جويماعانىن ايتقان ەدى. بۇل تۇرعىدا زياتكەرلىك مەكتەپتىڭ تاربيە بەرۋ جۇمىستارى وزگە مەكتەپتەرگە ۇلگى رەتىندە تاراتىلۋدا. ماسەلەن, مەكتەپ ديرەكتورىنىڭ تاربيە جۇمىستارى جونىندەگى ورىنباسارى ا.يحسانوۆا مەن مەكتەپ كۋراتورلارى «ماڭگىلىك ەل» ۇلتتىق يدەياسى مەن «رۋحاني جاڭعىرۋ» باعدارلاماسىن جۇزەگە اسىرۋ ارقىلى مەكتەپتەگى تاربيە جۇمىسىن ۇيىمداستىرۋ» سەكتسياسىندا بالا جانە اتا-
انامەن جۇمىس, اتا-انانى مەكتەپپەن بىرگە جۇمىس ىستەۋگە بەت بۇرعىزۋ ادىستەرى جايلى ايتتى. وبلىستاعى مەكتەپتەرگە تاربيە باعىتىندا تاجىريبە تاراتۋ ماڭىزدى ماسەلەلەر قاتارىندا بولعاندىقتان, وڭىردەگى زياتكەرلىك مەكتەپتە «نازارباەۆ زياتكەرلىك مەكتەپتەرىنىڭ تاربيە جۇيەسىنىڭ تاجىريبەسىنەن» تاقىرىبىنداعى وبلىستىق سەمينار ءوتىپ, مەكتەپ كۋراتورلارى ءوڭىر مۇعالىمدەرىمەن ءوز تاجىريبەلەرىمەن بولىسكەن ەدى. بالاعا ءبىلىم بەرۋدەگى ماڭىزىن جويمايتىن تاعى ءبىر ماسەلە – وقۋشىنى كىتاپ وقۋعا مەكتەپ قابىرعاسىندا باۋلۋ. سەميناردا بۇعان قاتىستى «وقۋشىلاردا كىتاپ وقۋ مادەنيەتىن قالىپتاستىرۋدىڭ بەلسەندى ادىستەرى» سەكتسياسى ۇيىمداستىرىلدى. مەكتەپ كىتاپحاناشىسى بالاعا «كىتاپ دجەمى» جانە ەرتەگىلەر مەن شىعارما نەگىزىندە «3D كىتاپ جاساۋدى» 20-دان اسا كىتاپحاناشىعا كورسەتتى, بىرىگىپ كىتاپ جاسادى. كىتاپحاناشىلار مۇنداي شارالاردىڭ بالالاردى كىتاپ وقۋعا باۋليتىندىعىن ايتتى. سونداي-اق ديرەكتوردىڭ بەيىندى-ەكسپەريمەنتالدىق جۇمىستار بويىنشا ورىنباسارىنىڭ جەتەكشىلىگىمەن «كريتەريالدى باعالاۋ جۇيەسىن ەنگىزۋ پروتسەسىن باسقارۋ» سەكتسياسى ءوتتى. مەكتەپ كوورديناتورلارىنا پەداگوگيكالىق شەبەرلىك ورتالىعىنىڭ ترەنەرلەرى جاڭارتىلعان ءبىلىم مازمۇنى جاعدايىندا وقۋشىلاردى جيىنتىق باعالاۋدىڭ ەرەكشەلىكتەرى تۋرالى باياندادى.
كوپتەگەن ءپان مۇعالىمدەرىنە قىزىقتى بولعان سەكتسيا – «جاڭارتىلعان ءبىلىم مازمۇنى بويىنشا وقىتۋ ەرەكشەلىكتەرى». بۇل سەكتسيا بويىنشا 200-دەن اسا ۇستاز زياتكەرلىك مەكتەپتەگى ءپان مۇعالىمدەرىنە جاڭا ءبىلىم مازمۇنىنا قاتىستى قىزىقتى ءادىس-تاسىلدەردى تىڭدادى.
– زياتكەرلىك مەكتەپتەگى ارىپتەسىمىزدىڭ كومەگىمەن بۇگىنگى سەميناردا جاڭارتىلعان ءبىلىم بەرۋ مازمۇنىن ءتيىمدى پايدالانۋ بويىنشا ءوز پانىمىزگە قاجەتتى ماڭىزدى ماعلۇماتتاردى الدىق. اسىرەسە كريتەريالدى باعالاۋ جانە توقساندىق باعالاۋ بويىنشا سۇراقتارىمىزعا جاۋاپ بەرىلدى. سەمينار ءتيىمدى ءوتتى دەپ ەسەپتەيمىن, – دەيدى قاراتوبە ورتا مەكتەبىنىڭ حيميا ءپانى مۇعالىمى ج.تەڭىزباەۆا.
تاجىريبە تاراتۋ پروتسەسى بارىسىندا ۇستازدار تاراپىنان زياتكەرلىك مەكتەپ مۇعالىمدەرىنىڭ ساباق وتكىزۋ پروتسەسىنە قاتىسۋ تۋرالى ۇسىنىس كوپ بولدى. وسىعان وراي, ءبىلىم ورداسىنىڭ مۇعالىمدەرى وبلىستاعى 200 ءپان مۇعالىمىنە ارناپ 40 اشىق ساباق وتكىزدى. ارنايى اشىق ساباق كۇنىندە بالالاردى ساباق بارىسىندا باعالاۋ, تاقىرىپتى ءتۇسىندىرۋ, كەرى بايلانىس پروتسەستەرىنە توقتالدى.
ۇرپاققا زاماناۋي ءبىلىم بەرۋ ءادىس-تاسىلدەرىن جەتىلدىرۋ باعىتىنداعى زياتكەرلىك مەكتەپتىڭ كوشباسشىلىعى – بارشا مەكتەپتەرگە ۇلگى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
