ول اتاسى كيم ير سەن مەن اكەسى كيم چەن ءيردىڭ سۋرەتى ىلىنگەن جەكە كابينەتىندە ديۆانعا وتىرىپ, بۇرىنعى ستيلدەگى كيىم ۇلگىسىن تاستاپ, باتىستىڭ ستيلىندە گالۋستۋك پەن كوستيۋم كيىپ, جاڭا جىلدىق قۇتتىقتاۋىن وتىز مينۋت بويى كىدىرمەي ايتىپ شىقتى. ادەتتە تۇرىپ سويلەيتىن كيم مىرزا بۇل جولى, ديۆانعا وتىرىپ, ەمىن-ەركىن قۇتتىقتاۋ جولدادى. ونىڭ بۇل جولعى قۇتتىقتاۋ سوزىنەن ەڭ ماڭىزدى باعىتتار بايقالدى. ءبىرىنشى, ەلدىڭ ەكونوميكالىق ءال-اۋقاتىنا باسىمدىق بەردى. ەكىنشى, حالىقارالىق قارىم-قاتىناس بويىنشا اقش جانە وڭتۇستىك كورەيامەن وتكىزگەن كەلىسسوزدەرگە توقتالدى. ءۇشىنشى, يادرولىق قارۋسىزدانۋ تۋرالى باعىت-باعدارعا قاتىستى, سولتۇستىك تاراپىنىڭ يادرولىق قارۋسىزدانۋعا دەگەن وزگەرمەس نيەتى مەن ۇستانىمدارىن مالىمدەدى. باسا نازار اۋداراتىن نارسە, ەگەر اقش سەكىلدى ەل ءوز ۋادەسىندە تۇرسا قارۋسىزداناتىندىعى, ەگەر ۋادەسىندە تۇرماي, ءتۇرلى سىلتاۋ تاۋىپ, باياعىشا حالىقارالىق قاۋىمداستىقتىڭ كومەگىمەن قىسىمدى ۇدەتەتىن بولسا, باسقا شىعار جولدى قاراستىراتىنىن قاداپ ايتتى. سونىمەن قاتار قوس كورەيانىڭ بىرجىلدىق قارىم-قاتىناسىنا قاتىستى باعا بەردى. 2018 جىلدى 70 جىلدىڭ ىشىندە ۇلكەن وزگەرىسكە بەت بۇرعان جىل دەپ, ەكى ەلدىڭ اراسىندا بولعان كەزدەسۋ ناتيجەسىنە قاناعاتتاناتىنىن جەتكىزدى. كورەي تۇبەگىن بەيبىتشىلىك تۇبەگىنە اينالدىرۋ, كەسون زاۋىتى مەن كىمگانسان تۋريستىك زوناسىن وڭتۇستىك تاراپتا يگەرۋگە بايلانىستى ۇسىنىس-ويىن ورتاعا سالدى. اسكەري سالا بويىنشا كورەي تۇبەگىن بەيبىتشىلىك الاڭى جاساۋ ءۇشىن ەكى ەلدىڭ اراسىنداعى اسكەري تەكەتىرەستى جۇمسارتۋعا دەگەن نيەتىندە وزگەرىستىڭ بولمايتىنىنا توقتالدى. اسكەري تەكەتىرەستى بولدىرماۋ ماقساتىندا امەريكا مەن وڭتۇستىك كورەيانىڭ اسكەري جاتتىعۋلارىن وتكىزبەۋدى جانە سىرتقى ستارەگيالىق كۇشتەردى تۇبەككە اكەلمەۋ جانە ەنگىزبەۋگە اسا ءمان بەرىپ سويلەدى. تۇبەكتىڭ بەيبىتشىلىگى ءۇشىن, ونىڭ جاعدايىنا قاتىستى ەلدەرمەن دە كوپجاقتى كەلىسسوزدەردى وتكىزەتىندىگىن ءبىلدىردى.
كيم چەن ىن جاڭا جىلدىق قۇتتىقتاۋدا «اقش پرەزيدەنتى دونالد ترامپپەن كەز كەلگەن ۋاقىتتا بەتپە-بەت وتىرىپ سويلەسۋگە دايىنبىز» دەدى. سونىمەن قاتار قۇتتىقتاۋ سوزىندە «تولىق يادرولىق قارۋسىزدانۋ» تۋرالى ءبىرىنشى رەت كيم چەن ىن جالپى جۇرتقا جاريالادى. «تولىق يادرولىق قارۋسىزدانۋعا ءوتۋ دەگەنىمىز ءبىزدىڭ پارتيامىز بەن رەسپۋبليكالىق ۇكىمەتىمىزدىڭ وزگەرمەيتىن پوزيتسياسى جانە مەنىڭ وزگەرمەيتىن ەرىك-جىگەرىم مەن نيەتىم» دەپ اتاپ ءوتتى. الايدا وسىنداي تولىق يادرولىق قارۋسىزدانۋعا دەگەن نيەتىنىڭ بارلىعىن بايقاتقان كيم چەن ىننىڭ امەريكا ءوز ۋادەسىندە تۇرماي, بەرگەن ۋادەلەرىن ورىندامايتىن بولسا, باسقا جول تابامىز دەگەن ءسوزى ءالى دە بارلىق ماسەلە اقش-قا تىرەلىپ تۇرعانىن اڭعارتادى. سولتۇستىك كورەيا ءۇشىن اقش سەكىلدى ەلدىڭ ۋادەسىندە ناقتى تۇرۋى ماڭىزدى. اقش ۋادەسىندە تۇرسا عانا كيم چەن ىن دا يادرولىق قارۋسىزدانۋعا دايىن ەكەنى اڭعارىلدى. سوندىقتان وسى جىلى اقش پەن سولتۇستىك كورەيانىڭ اراسىندا جوسپارلانعان كەلەسى سامميت پەن كيم چەن ىننىڭ سەۋلگە قارىمتا ساپارى كورەي ماسەلەسىن شەشۋگە ءبىرشاما ىقپال ەتۋ كەرەك. سوندا عانا اقش پەن سولتۇستىك كورەيانىڭ كەزدەسۋلەرى مەن كەلىسسوزدەرىنەن الەم ناقتى ناتيجەلەردى كورە الادى.
داستان اقاش, ارنايى «ەگەمەن قازاقستان» ءۇشىن
وڭتۇستىك كورەيا,
سەۋل قالاسى
