ىشكى ىستەر ءمينيسترىنىڭ ءبىرىنشى ورىنباسارى جانات سۇلەيمەنوۆ ورتالىق كوممۋنيكاتسيالار قىزمەتىندە وتكەن بريفينگتە وسى دەرەكتەردى كەلتىرە وتىرىپ, بيىل پوليتسياعا قاتىستى جۇزەگە اسىرىلاتىن جاڭاشىلدىقتاردى تانىستىردى. ونىڭ ايتۋىنشا, ءبىرىنشى كەزەكتە ىشكى ىستەر ورگاندارىنىڭ ۇيىمداستىرۋ-شتاتتىق قۇرىلىمىن جاڭعىرتۋ ماسەلەسى تۇر. ناقتىراق ايتقاندا, بيىل پوليتسيانىڭ باسقارۋشى لاۋازىمدارىن 10 پايىزعا نەمەسە 450 بىرلىككە ازايتۋ كوزدەلگەن.
– قىزمەتكەرلەردى الەۋمەتتىك قولداۋ, جالاقىسىن كوتەرۋ ماسەلەسى دە نەگىزگى مىندەتتەردىڭ ءبىرى. جالاقى كوتەرۋ قىزمەتكەرلەردى قىسقارتۋ ارقىلى ۇنەمدەلگەن 16 ملرد تەڭگە جانە قوسىمشا بولىنەتىن قاراجات ەسەبىنەن جۇزەگە اسىرىلادى. ونىڭ ىشىندە پاترۋلدىك پوليتسيا قىزمەتكەرلەرىنىڭ جالاقىسى – 65 پايىزعا, شۇعىل ارەكەت ەتۋ-تەرگەۋ قۇرىلىمدارى قىزمەتكەرلەرىنىڭ جالاقىسى – 55 پايىزعا, ۋچاسكەلىك ينسپەكتورلاردىڭ جالاقىسى – 25 پايىزعا جانە باسقا قىزمەتكەرلەردىڭ ەڭبەكاقىلارى 20 پايىزعا كوبەيتىلەدى, – دەدى ىشكى ىستەر ءمينيسترىنىڭ ءبىرىنشى ورىنباسارى.
سونىمەن قاتار بيىلدان باستاپ ۆەدومستۆولىق وقۋ ورىندارىن وڭتايلاندىرىپ, قازىرگى 12 وقۋ ورنىنىڭ تەك بەسەۋى عانا قالدىرىلادى. وسى ايدىڭ سوڭىنا تاياۋ پوليتسيا قاتارىنا جوعارى زاڭگەرلىك ءبىلىمى بار 1200 قىزمەتكەردى جۇمىسقا قابىلداۋ شارالارى باستالماق. ولار الدىمەن 3 ايلىق دايارلىقتان وتكىزىلەدى.
جانات سۇلەيمەنوۆتىڭ ايتۋىنا قاراعاندا, جوعارىدا اتالعان جول كارتاسىنا بايلانىستى ىشكى ىستەر سالاسى كەيبىر فۋنكتسيالاردان ازات ەتىلمەك. ونىڭ اياسىندا كۇزەت قىزمەتىن باسقا مەملەكەتتىك ورگاندارعا نەمەسە باسەكەلەستىك ورتاعا بەرۋگە دايىندىق باستالعان. بۇل شارا ساپتاعى پوليتسەيلەر سانىن قىسقارتۋعا جول اشادى. دالىرەك ايتقاندا, قازىر پوليتسەيلەر كۇزەتۋگە مىندەتتەلگەن 748 نىساندى كۇزەتۋدەن بوساتىلىپ, 4,5 مىڭ قىزمەتكەر قىسقارتىلىپ, 5,5 ملرد تەڭگە ۇنەمدەلمەك.
ىشكى ىستەر ءمينيسترىنىڭ ءبىرىنشى ورىنباسارى مەملەكەت باسشىسىنىڭ تاپسىرماسىنا ساي اۋداندىق جانە قالالىق, وبلىستىق پوليتسيا عيماراتتارىندا حالىقتىڭ ارىز-شاعىم قابىلداۋعا ارنالعان فرونت-كەڭسەلەردىڭ اشىلىپ جاتقاندىعىنان دا حاباردار ەتتى. بۇل باعىتتاعى جۇمىستار جىلدىڭ العاشقى جارتىسىندا تولىق جۇزەگە اسىرىلماقشى.
سونداي-اق قازىر پوليتسيا قىزمەتكەرلەرىن كەزەكتەن تىس اتتەستاتسيادان وتكىزۋدىڭ قامى جاسالۋدا.
ج.سۇلەيمەنوۆ اتالعان رەفورمانىڭ قىلمىستىق اتقارۋ جۇيەسى مەن توتەنشە جاعدايلار سالاسىن دا قامتيتىندىعىن اتاپ ءوتتى.
جالپى, 2018 جىلدىڭ قورىتىندىسىن دا جاريا ەتكەن ىشكى ىستەر ءمينيسترىنىڭ ءبىرىنشى ورىنباسارى بىلتىر ەلىمىزدە قىلمىس دەڭگەيىنىڭ ازايعاندىعىن دا اتاپ ءوتتى. ونىڭ ىشىندە اۋىر قىلمىس 22 پايىزعا جانە اسا اۋىر قىلمىس 12 پايىزعا تومەندەگەن. ال ورتاشا دارەجەلى قىلمىس – 66 پايىزعا, اسا اۋىر ەمەس قىلمىستار 10 پايىزعا ازايعان.
ج. سۇلەيمەنوۆ توناۋ قىلمىسى – 14 پايىزعا, بۇزاقىلىق – 23 پايىزعا, ۇرلىق – 6 پايىزعا, سونداي-اق قاراقشىلىق شابۋىل 15 پايىزعا تومەندەگەن ايتتى.
سەرىك ابدىبەك,
«ەگەمەن قازاقستان»
