Winter CAMP - قىستىق وقۋ-جاتتىعۋ لاگەرى بيىل قاتارىنان بەسىنشى رەت ۇيىمداستىرىلىپ وتىر. ءىس-شاراعا رەسپۋبليكا مەكتەپتەرىنەن ەڭ ۇزدىك اتانعان ءبىتىرۋشى تۇلەكتەر ىرىكتەلىپ الىنعان.
بەس كۇندىك باعدارلاما اياسىندا قاتىسۋشىلارعا ەلىمىزدىڭ بىلىكتى ماماندارى مەن ۇستازدارى ءدارىس وقىدى. سونىمەن قاتار سۇلەيمان دەميرەل ۋنيۆەرسيتەتىنىڭ رەكتورى قانات قوجاحمەت جانە بەلدى جوعارى وقۋ ورىندارىنىڭ رەكتورلارىمەن قاتار بەلگىلى قوعام قايراتكەرلەرى دە جاسوسپىرىمدەرگە پايدالى سەمينارلار وتكىزدى. وقۋ باعدارلاماسىنىڭ جوسپارى بارىسىندا ءبىتىرۋشى تۇلەكتەردى ماماندىق تاڭداۋعا باعىتتايتىن ەلىمىزدىڭ بەدەلدى ون ۋنيۆەرسيتەتىنىڭ قاتىسۋىمەن ارنايى ءبىلىم كورمەسى ءوتتى.
«قىسقى لاگەردىڭ باستى ماقساتى – تالاپكەرلەرگە ۇلتتىق بىرىڭعاي تەستىلەۋ كەزەڭىنىڭ الدىندا جاڭا باعىت-باعدار مەن سەرپىلىس بەرۋ. وقۋ باعدارلاماسى جان-جاقتى قىزىقتى ءوتۋ ءۇشىن قاتىسۋشىلارعا ءتۇرلى سپورتتىق ويىندار مەن زاماناۋي كۆەست ويىندارى وتكىزىلدى» دەيدى ۇيىمداستىرۋشىلار.
شارا سوڭىندا ۇزدىك اتانعان توپتار ارنايى العىس حاتتار جانە باعالى سىيلىقتارمەن ماراپاتتالدى.
ەسكە سالا كەتسەك, وسى جىلدان باستاپ جوعارى وقۋ ورنىنا اقىلى نەگىزدە ءتۇسۋ ءۇشىن ۇبت جىلىنا 4 رەت, ياعني قاڭتار, ناۋرىز, ماۋسىم-شىلدە, تامىز ايلارىندا وتكىزىلەدى. بۇل تۋرالى قر ءبىلىم جانە عىلىم ۆيتسە-ءمينيسترى اسحات ايماعامبەتوۆ مالىمدەگەن بولاتىن. سوندىقتان مۇنداي الاڭدار مەن دايىندىق ورتالىقتارى بالالارعا ەرەكشە سەرپىن بەرەدى. مامانداردىڭ سوزىنشە, وتكەن جىلى ۇبت-دان جوعارى ۇپايعا يە بولعان شيارا قۇدايبەرگەنوۆا (2018, 140 ۇپاي) ءوز ءبىلىمىن وسىنداي دايىندىق ورتالىقتارىندا شىڭداعان.
ارمان وكتيابر,
«ەگەمەن قازاقستان»
الماتى
