الدەكىم سالعان ىزدەردى اۋەستەمەي, شىعارماشىلىق الەمىندە ءوز تاڭباسىن سىزۋعا تالپىنعان تالانت يەسىنىڭ ايرىقشا تۋىندىلارىنا قىزىعۋشىلىق زور. سۋرەتشىنىڭ ءا. قاستەەۆ اتىنداعى ونەر مۋزەيىندە اشىلعان «قۇم جازۋى» دەپ اتالعان جەكە كورمەسى تىلسىم ونەردىڭ تۇڭعيىعىنا بويلاتاتىنداي.
ەكسپوزيتسيادا اۆتوردىڭ گرافيكا جانە كەسكىندەمەلىك مانەردە ورىنداعان جۇزدەن اسا شىعارماسى ۇسىنىلعان. قىلقالام شەبەرىنىڭ «جىرشى», «مايقاڭباق», «ساعىم», «قورقىت پەن اسان», «كوكتەبە ەتيۋدتەرى», «كۇز ءتۇنى», «اجە», «باتىرلىق داستان», «جۋساعان جىلقىلار», «قايران نارىن», «بەۋ, بالالىق» سىندى وتتى تۋىندىلارى ۇلتتىق ناقىشپەن, تۋعان جەرگە دەگەن ىستىق سەزىممەن, نازىك تە اسقاق شەشىمدەرمەن ورىلگەن. ونەرتانۋشى ساۋلە بەكقۇلوۆا بۇل تۋرالى: «تابىلدىنىڭ تاقىرىپتارىنىڭ كوكجيەگى كەڭ, بۇكىل ادامي اسىل قاسيەتتەردى التىن وزەگىنە اينالدىرعانداي ايدىندى, ايبىندى بولا تۇرا, وسى يدەيالاردىڭ بارلىعىن ول تۋعان جەر ارقىلى, تۋعان توپىراعى ارقىلى كوتەرەدى» دەپتى. شىنىندا دا, ءوزىنىڭ بۇكىل ارمان-اڭسارىن تاڭعان تۋعان جەر سۋرەتشىنىڭ ونەرىنە دەم بەرىپ, ومىرىنە وزەك بولىپ, شىعارماشىلىق ءورىسىن كەڭەيتكەنى انىق. ول كەيىپتەگەن كەسكىندەرگە كوز سۋارعان كەز-كەلگەن كورەرمەن مۇنى بىردەن اڭعارادى.
– «قۇم جازۋى» كورمەسىندە ۇسىنىلعان ۇلتتىق ەرەكشەلىكتەر مەن ىشكى رۋحاني قۇندىلىقتاردى كورسەتەتىن تۋىندىلار كورەرمەنگە وتكەن ۋاقىتپەن ءوزارا سۇحباتقا تۇسۋگە مۇمكىندىك بەرەدى. سۋرەتشى ءوز جەرىنىڭ, ونىڭ تابيعاتى, تاريحى مەن داستۇرلەرىنىڭ جىرلاۋشىسى. ول ءوز حالقىنىڭ جان دۇنيەسىن نازىك سەزىنە بىلەدى. ونىڭ باستى ماقساتى – تۋعان ەلىنىڭ كۇندەلىكتى ومىرىندەگى سۇلۋلىق, ونىڭ دارحان دالاسى مەن تابيعاتىنا, ادامدارىنا دەگەن سۇيىسپەنشىلىگىن ءبىلدىرۋ. بالا كەزىندە ول اكەسىمەن بىرگە جايلاۋعا بارىپ, دالا ءومىرىنىڭ ءار ءتۇرلى داۋىسىن باقىلايدى – سول بالالىق اسەرلەر ونىڭ جان دۇنيەسىنە تەرەڭ اسەر قالدىرىپ تۋعان جەر تاقىرىبىنا دەگەن قۇمارلىعىن وياتقان, – دەيدى كورمە جەتەكشىسى انجەليكا اقىلبەكوۆا.
تابىلدى مۇقاتوۆ كوپشىلىك قاۋىمعا كىتاپ يلليۋستراتورى رەتىندە دە جاقسى تانىس. ول بەزەندىرگەن ەڭبەكتەر قازاق اقىن-جازۋشىلارىنىڭ شىعارمالارىنداعى بىرقاتار ۇلتتىق بەينەلەردى جاساۋعا سەپتىگىن تيگىزدى. ونىڭ گرافيكاسىنا كومپوزيتسيانىڭ قاراپايىمدىلىعى مەن ايقىندىلىعى, ىقشامدىلىق, تازالىق, اشىق ءتۇس, سۇلبالاردىڭ ناقتىلىعى ءتان. كورەرمەندى ىنتىقتىرعان كورمە اقپان ايىنا دەيىن جالعاسىن تابادى.
ارمان وكتيابر,
«ەگەمەن قازاقستان»
الماتى
