وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى گۇلنار ابەنوۆانىڭ مالىمدەۋىنشە, وبلىس وڭىرىندە ءوزىن-ءوزى جۇمىسپەن قامتىعان تۇرعىندار سانى 38 مىڭ بولادى. سونىڭ ىشىنەن 26 مىڭ ادام ءوزىن-ءوزى جۇمىسپەن بەيرەسمي قامتىعان دەپ مويىندالدى. وسى ادامدارمەن بىرىڭعاي جيىنتىق تولەم تولەۋدى ەنگىزۋ ءۇشىن ءتۇسىندىرۋ جۇمىستارىن جۇرگىزۋ جوسپارلانىپ وتىر. ول ءۇشىن باسقارما قىزمەتكەرلەرى بۇقارالىق اقپارات قۇرالدارى ارقىلى تۇرعىندارعا قۇلاققاعىس جاسادى, ادامدار ءجيى جۇرەتىن ورىندارعا بيلبوردتار ءىلىندى, الەۋمەتتىك جەلىلەرگە اقپاراتتىق ماتەريالدار سالىندى.
وسى تاقىرىپ قوزعالعان ماجىلىستە وبلىس اكىمى ارحيمەد مۇحامبەتوۆ بىرىڭعاي جيىنتىق تولەم تۋرالى تۇرعىندار 100 پروتسەنت اقپاراتتانۋى, ونىڭ كەيبىر تۇستارى جەتە ءتۇسىندىرىلۋى كەرەكتىگىن ايتتى. ول باسقارما ماماندارىنىڭ شالعاي اۋىلدارعا ءجيى شىعۋىن, ادامدار اراسىندا بولىپ, ولارعا ءتۇسىندىرۋ جۇمىستارىن جۇرگىزۋدى تاپسىردى. وبلىس اكىمىنىڭ ايتۋىنشا, قوستاناي وبلىسى بويىنشا ءوزىنىڭ مارتەبەسىن راسىمدەۋدەن باس تارتقاندار سانى باسقا وڭىرلەرگە قاراعاندا تىم كوپ.
«وبلىستا 18 مىڭ ادام ءوزىن-ءوزى جۇمىسپەن قامتىعانى تۋرالى مارتەبەسىن راسىمدەۋدەن باس تارتىپ وتىر. بۇل وزگە وڭىرلەرگە قاراعاندا كوپ. سانىنىڭ كوپتىگى جونىنەن رەسپۋبليكادا ەكىنشى ورىندا تۇرمىز. باتىس قازاقستان وبلىسىندا بۇل كورسەتكىش مىڭ ادامعا دا جەتپەيدى, تۇركىستان وبلىسىندا 2 ميلليون ادامنىڭ 20 مىڭى باس تارتقان. ال بىزدە 800 مىڭ ادامنىڭ 18 مىڭى ءوزىنىڭ مارتەبەسىن راسىمدەۋگە قارسى. وسىنىڭ سەبەبىن انىقتاپ, ولارمەن تۇسىنىك جۇمىستارىنا بارىنشا ءمان بەرۋ كەرەك» دەدى ارحيمەد بەگەجان ۇلى.
ەسكە سالا كەتسەك, وتكەن جىلى ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا بىرىڭعاي جيىنتىق تولەم ەنگىزۋدى ۇسىنعان بولاتىن. بۇل ءتورت سالىق ءتۇرى: جەكە تابىس, الەۋمەتتىك ساقتاندىرۋ قورىنا, مەديتسينالىق ساقتاندىرۋ قورىنا, زەينەتاقى قورىنا اۋدارىلاتىن تولەمدەردى ءبىر مەزگىلدە تولەۋ تەتىگى بولىپ تابىلادى. بۇعان قازاقستان تۇرعىندارىنىڭ بارلىعى مىندەتتەلەدى. بىراق, ءوزىن-ءوزى جۇمىسپەن قامتۋشىلار ەڭبەك كەلىسىمشارتى جوق بولعاندىقتان, جەكە كاسىپكەر رەتىندە تىركەلمەگەندىكتەن حالىقتىڭ ءبىراز بولىگى الەۋمەتتىك قامتۋ مەن ساقتاندىرۋ, زەينەتاقىمەن قامتۋ جۇيەسىنە ەنبەي قالادى. ادامداردىڭ الەۋمەتتىك قامتۋدان تىس قالماۋى ءۇشىن ءوزىن-ءوزى جۇمىسپەن قامتىعانداردىڭ مارتەبەسىن راسىمدەۋ جانە ولاردىڭ بىرىڭعاي جيىنتىق تولەمدەردى تولەۋى ءۇشىن تۇسىنىك جۇمىستارى بارىنشا جۇرگىزىلەدى.
ءنازيرا جارىمبەت,
«ەگەمەن قازاقستان»
قوستاناي
